2Kòrɛ̃tòtɔwo 1 - GƐ̃GBE BIBLIA 2014

Ègbèdodowo

¹ Paolò, Yesù Kristò be *àmèdɔ̃dɔ̃ to Mawu be èjro ji, ku nɔ̀vi Timòteo le ŋlɔ̀ xoma kèa ɖoɖa Mawu be èhabɔ̀bɔ kè lè Kòrɛ̃tò ku àɖèsã kèwo keŋu lè Akayìa bliboa.

² Mawu, mia Tɔ ku Tɔhonɔ̀ Yesù Kristò ne na mì, màje ku fàfa.

Paolò do àkpe na Mawu

³ Woa na gogo Mawu, mia Tɔhonɔ̀ Yesù Kristò be Ètɔ, kè nyi ŋuzĩzĩkuku be Ètɔ kudo màje keŋu be Mawu,

⁴ àmè kè fana àkɔ na mi lè miabe àyàɖùɖuwo keŋu mè, ne mia teŋu fa àkɔ na àmè kèwo lè àyàɖùɖuwo mè, to àkɔfa kè ji Mawu fa àkɔ na mi toa.

⁵ Sìgbè àlekè Kristò be àyàɖùɖuwo sùgbɔ lè mia mèa, nènea ke ye, to Kristò jia, miabe àkɔfa la sùgbɔa yeŋu.

⁶ Ne e nyi be, mi le ɖù àyàa, mìabe àkɔfa kudo mìabe hlùɛ̃gã ŋuti ye; ne e nyi be, wo le fa àkɔ na mia, mìabe àkɔfa kè nana jìdo lè mìabe àyàɖùɖu kèwo mè mia cã mi le toawo ŋuti ye.

⁷ Eye miabe ŋùɖo likè ɖo mìa ŋuti, ekè mi nya be, sìgbè àlekè mì ma miabe àyàɖùɖuwoa, nènea ke mì la mã miabe àkɔfa cã.

⁸ Đo nɔ̀viwo, mi mu jro be, mìa dã àfɔ̀ku kè kpe mi lè Azìa ò: e nɔ̀ mia ji, eye be wu lekè mi teŋu kpe e jia, àleke be mi mu gbà susu be mi la ci àgbè ŋutɔ cã ò.

⁹ Ɛ̃ɛ, mi kã ɖo e ji lè mia ɖokoewo mè be, miabe èku-zã ɖo vɔ̀. Nène a, mi mu gbà teŋu dojì ɖo mia ŋutɔ mia ɖokoewo ŋuti ò, vɔ̀a, ɖo Mawu kè fɔ̃na àmèkukuwoa ŋuti.

¹⁰ Mawu ye hlùɛ̃ mi gã so èku kèa mè, e ye ke la gbà hlùɛ̃ mi gã, eye mi sɔ miabe ŋùɖo dà ɖo e ji.

¹¹ Ekè mìa cã mì do àlɔ̀, lè kuefã mè, ɖo mia taa, màje kè wo na mi to àmè sùgbɔ be blìbɔ̀-blìbɔ̀ jia, ne na àmè sùgbɔ ne do àkpe ɖo mia ta.

Paolò trɔ yebe ɖoɖowo

¹² Đo miabe gòyiyia ye nyi miabe jìjigbè be ɖase kè be ɖù so mia ŋuti be: mi zɔ̃ lè Mawu be àɖèsã nyinyi kudo vevedodo mè, lè xixe kèa mè, mu nyi lè ŋutilã be ènunya mè ò, vɔ̀a lè Mawu be màje mè, veve ɖe a, lè mìa dòmè.

¹³ Đo mi mu le ŋlɔ̀ ènyà bu ɖoɖa mì, wu ènu kè mì le hlɛ̃, eye mì le sè e gɔ̃mè ò. Mù le kpɔ èmɔ be, mì la sè ènyà kè mi le gblɔ̃a mè keŋu-keŋu,

¹⁴ ɖo a, mì sè e mè vi ɖe be, miawo ye nyi mìabe gòyiyi, sìgbè àlekè mìawo cã mì nyi mia tɔ̀, lè mia Tɔhonɔ̀ Yesù be kòjoɖo-zãa gbèa nène.

¹⁵ Lè kãkãɖoji kèa mè a, mù ɖo be, ma va mìa gbɔ cucugbã, ne mìa kpɔ jìjɔɛ, zè èvè,

¹⁶ ne ma to mìa gbɔ yì Màkedonìa, ne ma gbà trɔ so Màkedonìa, va mìa gbɔ, ne mìa ɖo mù ɖoɖa Yudeà.

¹⁷ Eŋuã, ènu kè mù ɖo be ma wɔ̀a, ɖe ye mù ɖo è ètamè mà-bua? Àlo, ènu kè mù ɖoa, ɖe ye mù ɖo è, sɔ zɔ̃ ɖo ŋutilã ji, gblɔ̃ “Ɛ̃”, ku “Ò” ɖo dua?

¹⁸ Vɔ̀a, Mawu nyi ànùkuare be, miabe ènyà kè mi gblɔ̃ na mìa, mu nyi “Ɛ̃”, ku “Ò”, ɖo du ò.

¹⁹ Đo Mawu be Èvi, Kristò Yesù, àmè kè be àŋɛ̀ mi do lè mìa dòmè, to ènyè ku Silvanɔ̀, kudo Timòteo jia, mu nyi “Ɛ̃” ku “Ò” ɖo du ò; vɔ̀a, “Ɛ̃” kpò be nyi, so gɔ̃mèjèje a.

²⁰ Eye Mawu be fìãfiãwo keŋu nyi “Ɛ̃”, lè Yesù mè. Ekèa ŋuti ye, to e ye ke jia, mi gblɔ̃nà “*àmèn” na Mawu be gogoa.

²¹ Àmè kè likè mi ku mì, lè Kristò mè, eye be do àmì èta na mia, ye nyi Mawu,

²² àmè kè gbà sɔ yebe jèsi, ɖo mia ŋuti, eye be na mi Gbɔ̃gbɔ̃ a be àwòbanu lè miabe èjìwo mè.

²³ Mawu nyi àpe ɖàsèfo, ne mù lè ɖà àjèa, ma ku, ɖo mù ku ŋuzĩzĩ na mì, ye ŋuti nyè mu gbà trɔ va Kòrɛ̃tò ò.

²⁴ Mu nyi be mi jro la zĩ lekè mì ɖo la xɔ̀sèa ɖo mìa ji ò; vɔ̀a mi le wɔ̀ èdɔ kudo mì, ne mìa kpɔ jìjɔɛ, ɖo mì lètè goŋu lè xɔ̀sè mè.