1Timòteo 1 - GƐ̃GBE BIBLIA 2014

Ègbè dodo

¹ Xoma kèa so ènyè, Paolò, kè nyi *àmèdɔ̃dɔ̃a gbɔ. Mawu, mia Hlùɛ̃tɔ, kudo Kristò Yesù, miabe ŋùɖoa cã mù be ma nyi àmèdɔ̃dɔ̃.

² Timòteo, èvi nyè àdodoe lè xɔ̀sè mè, èwò ye mù le ŋlɔ̀ xoma kèa ɖoɖa. Mawu Àta, kudo mia Tɔhonɔ̀ Kristò Yesù, ne na wò màje, ŋuzĩzĩkuku kudo fàfa.

Paolò ɖo àfɔ̀ àfɔ̀ ji na Timòteo ɖo àjè-nufiɔfiɔ ŋuti

³ Sìgbè àlekè mù biɔ so gbɔ wò, wàlɛbɛ kè mù le yì Màkedonìa, be wòa nɔ̀tè lè Efesòa, wɔ̀ nènea. Đo àjè-nufiɔtɔ ɖewo lè funu; do *èse na wo be wo mu gbà fiɔ ènu bu àmèwo ò,

⁴ eye wo mu gbà tɛ ɖo èdrũwo kudo hɛ̃nunya mà ɖo kɔpe, ekèwo hɛ̃nà ènyàbiɔsè gbalowo vaa, wu ènu kè nyi Mawu be ɖoɖo lè xɔ̀sè mèa ŋuti ò.

⁵ Vɔ̀a èsedodo be nuwuwu ye nyi lɔ̃lɔ̃, kè so èjì mà ɖo èɖi ku *jìjigbè nyuɛ̃, kudo xɔ̀sè àdodoe mè.

⁶ Ènu kèawo gbɔ ye àmè ɖewo trã èmɔ jo lè, eye wo trɔ ŋùmè ɖoɖa ènyà gbalo gbɔ̃gblɔ̃wo gbɔ.

⁷ Wo jro la nyi èsefiɔtɔwo, vɔ̀a wo mu ŋɔjè ènyà kè wo le gblɔ̃, àlo ènu kèwo ji wo le kã ɖoa ŋutɔ cã mè ò.

⁸ Fifìa miawo yaa, mi nya be, èsea nyɔ, ne wo zã ɛ̀ sìgbè àlekè be jè a nène.

⁹ Mi nya ekèa be, wo mu ɖo *èse na àmèjɔ̀jɔɛ ò, vɔ̀a na àmè mà nɔ̀ èse gɔ̃mèwo ku àglajètɔwo, na àmè màsi Mawuwo ku èvuɛ̃wɔ̀tɔwo. Wo do èsea na àmè màkɔ̀màkɔwo ku ŋùkpɛ̃nuwɔ̀tɔwo, na àmè-tɔ wùtɔwo ku àmè-nɔ̀ wùtɔwo.

¹⁰ Wo do è na èhlɔ̃dãtɔwo, ku *àhasìwɔ̀tɔwo, kudo ŋusù kèwo dɔ̃na ku ŋusù buwo, gbàkudo nyɔ̃nù kèwo dɔ̃na ku nyɔ̃nù buwo, ku kluvi sàtɔwo, kudo àjèɖàtɔwo, gbàkudo àtãŋu gbalo kãtɔwo, ku ènu bu kèwo sitè ɖo fiɔfiɔ àdodoe a ŋutia wɔ̀tɔwo.

¹¹ Ènufiɔfiɔ kèa sɔ̀ ku àŋɛ̀nyuɛ̃ kè ɖè gogo be Mawu a fiɔa. Mawu kè le ji miabe nyuɛ̃a ye do àŋɛ̀nyuɛ̃ kèa àsi na mù.

Paolò do àkpe ɖo Mawu be ŋuzĩzĩ kuku ŋuti

¹² Mù le do àkpe na mia Tɔhonɔ̀ Yesù Kristò, àmè kè do mù ŋusɛ̃ be ma wɔ̀ sumɔ̃vi-dɔa. Mù le do àkpe na ɛ̀, ɖo e bù mù ànùkuame, sɔ sumɔ̃vi-dɔa do àsi na mù.

¹³ Ènyè, àmè kè nyi bùsu-nyagblɔ̃tɔ ku yomètĩtɔ kudo àmègbletɔ sãa. Vɔ̀a, Mawu ku ŋuzĩzĩ na mù, ɖo mù wɔ̀ ɛ̀ lè mànya mè, lè màxɔ̀sè mè;

¹⁴ eye mia Tɔhonɔ̀ be màje kudo xɔ̀sè gbàkudo lɔ̃lɔ̃ kè lè Kristò Yesù mèa sùgbɔ lè mè nyè.

¹⁵ Ekèa ye nyi ànùkua-nya eye be jè na àmèwo keŋu be xɔ̀xɔ be: Yesù Kristò va xixea mè, ne bèa hlùɛ̃ èvuɛ̃wɔ̀tɔwo gã. Ènyè ye nyi èvuɛ̃wɔ̀tɔ wu èvuɛ̃wɔ̀tɔwo kpata.

¹⁶ Vɔ̀a ekèa ŋuti Mawu ku ŋuzĩzĩ na mù, na Yesù Kristò ne ɖè yebe kpɔkpɔɖoemè na àmè keŋu fiɔ, lè ènyè mè cucugbã, ne bèa sɔ mù wɔ̀ kpɔwɔɛ na àmè kèwo la va xɔ̀ ɛ̀ ji sè na àgbè kòkòɖàbìa.

¹⁷ Na Èfìɔ kè lè tɛ̀gbɛ̀a, na Mawu kè mu kuna òa, kè wo mu kpɔna òa, Mawu ɖèka tɔ̀ ye nyi bùbu kudo gogo kaka sɔ yì. * Àmèn.

¹⁸ Mù le do ègbè kèa àsi na wò, èvi nyè Timòteo, sɔ zɔ̃ ɖo ènyà kèwo gblɔ̃ɖɛtɔwo gblɔ̃ ɖɛ so ŋuti wòa ji. Àleke be, ne ènyà kèawo do ŋusɛ̃ wòa, wòa drɛ̃ àvũ nyuɛ̃ lè woa mè,

¹⁹ ne wòa le xɔ̀sè kudo *jìjigbè nyuɛ̃ ɖo àsi. Jìjigbè kèa ye àmè ɖewo gbe be yèwo mu la ɖo èto ò, eye woabe xɔ̀sèa crɔ̃.

²⁰ Àmè kèawo dòmè ye Himenìo ku Àlɛ̀ksãdrò kèwo mù sɔ do àsi na Satanaa, wo lè, ne bèa dɔ̃ èto na wo, ne woa ɖè àsi lè bùsu-nyagbɔ̃gblɔ̃ ɖo Mawu ŋutia ŋuti.