ቢያፓ ባሼ ዓይኑሞ 1 - ጌኤዦ ማፃኣፖ

¹ ሴሎሞኔ ዓይናዼ፥ ቢያፓ ባሻ ዓይኑሞ

ቤርታሳ ዓይኑሞ ዑኡቴሎ ዓይኑሞ

² ናሹማ ኔኤሲ ዎይኖ ዑዣፓ ባሼ ታና ዎዛሳያ ማዔሢሮ ኔ ሙሱራ ታና ሄርቆንጎ።

³ ኔኤኒ ቲሽቴ ቲዣ ቃራ ሳውቃያኬ፤ ሱንፆ ኔኤኮ ዔኤሊፃ ሳውቃ ቲዦ ፑኡኪሢጉዲኬ፤ ዉዱራሢ ኔና ናሽካሢ ዬያሮኬ።

⁴ ኩጮ ታኣኮ ዓርቂ ጎቺ ታና ዔኪ ዓኣዼ፤ ኑ ዎላ ዑካዺ ዓኣዾም፤ ካኣቲ ፔ ቆልዖ ጋሮ ታና ዔኪ ጌልዜኔ። ኔኤኮ ናሹማ ኮሺ ኑና ዎዛሳኔ፤ ዎይኖ ዑዦይዳፓ ባሼ ናሹሞ ኔኤሲ ኑ ሄርሻኔ። ዔያታ ኔና ሃያይዲ ናሽካሢ ፒዜኬ።

ዑኡቴሎኮ ላጎ ዓይኑሞ ዑኡቴሎ ዓይኑሞ

⁵ ዒንሢ ዬሩሳላሜ ዓጮ ዉዱራሢ ዋይዙዋቴ! ታኣኒ ካርሢኬ፤ ማዔቴያ ታኣኒ ሚዛጲኬ፤ ካርሡማ ታኣኮ ቄዳሬይዳ ዓፒሎና ማዢንቴ ማኣሮጉዲኬ፤ ሚዛጱማ ታኣኮ ጋዓንቴ ሴሎሞኔኮ ካኣቱሞ ማኣሮ ጎኦቦ ዓፒሎጉዲኬ።

⁶ ታና ካርሤሢ ዓቦ ሩኡጶኬ፤ ታኣኒ ካርቴሢሮ ታና ቶኦቺፖቴ፤ ታ ዒንዶ ናኣቶ ማዔ ታ ጌርሲንሢ ታኣና ፑርቴሢሮ ዎይኖ ጎዦ ታና ዔያታ ካፒሴኔ፤ ዬያሮ ታኣኒ ታ ዎይኖ ጎዦ ካፒፆ ሃሼኔ።

⁷ ታ ዒሼ! ታኣም ሂንዳ ኬኤዜ፤ ኔኤኮ ማራቶ ኔኤኒ ዓንካ ሄንቃይ? ዓባ ሳዛ ማዓኣና ኔ ዔያቶ ዓንካ ቃኣቲሳንዳቴያ ታኣም ኬኤዜ፤ ታ ኔና ኮይፆ ኔ ላጎ ቆልሞ ጊንፆ ዓኣዺሢና ዓፒላ ቶኦኪና ጉኡሊንቴ ላኣሊጉዲ ማዒሢና ዣኣሊ ሺራሢ ዓይጎሮዳይ?

ዑኡቴሎኮ ላጎ ዓይኑሞ

⁸ ኔኤኒ ላኣሎይዳፓ ቢያ ባሼ ሚዛጴሌ! ቤዞ ኔ ዔሩዋያ ማዔቴ ማራቶ ኮጲዞ ዓርቂ ዓኣዼ፤ ዋናናኣቶ ኔኤኮ ሞኦፆ ናኣቶ ጉርዶ ዓጫ ሄንቄ።

ዑኡታሢ ዓይኑሞ

⁹ ታ ሚሼ! ጊብፄ ካኣቲኮ ሳርጌሎ ዖይቶ ጎቻ ፓራሢ ባኣካ ዓኣ ዒንዶ ፓሮ ኔኤኒ ማላኔ፤

¹⁰ ጋንጋራ ኔኤኮ ሚዛጲ ሙሊሢ ሹቺጉዲኬ፤ ባቃና ኔኤኮ ሚዛጶ ፓልማሢና ማዒ ዴንቃያኬ።

¹¹ ኑኡኒ ጋዓንቴ ቢራ ዓንጊ ፓልሞ ዎርቄና ሚዛጲሶናያ ኔኤም ኮሻንዳኔ።

ዑኡቴሎ ዓይኑሞ

¹² ካኣቲ ቃሚፆ ሻኣሎይዳ ሙዖሮ ዴይ ዓኣንቴ ታኣኮ ሳውቃ ቲዦ ሳውማ ጋሮ ዒዛኮ ዔኬኔ።

¹³ ታ ዒሼ፥ ታኣኮ ዻንፆ ባኣካ ላሃ ሳውማ ዒዛኮ ዖሺንቲ ዓኣ ኬርቤጉዲኬ።

¹⁴ ታ ዒሼ፥ ዒንጌዴ ጌይንታ ዎይኖ ቱኮ ቤዛ ባቃሊ ዓኣ ቦኦሊ ቡኒጉዲኬ።

ዑኡታሢ ዓይኑሞ

¹⁵ ታ ሚሼ! ዎዚ ኔኤኒ ሚዛጳይ! ዓውካራ ኔኤኮ ዎዚ ኮሽካይ! ዓኣፓ ኔኤኮ ዶኦሌ ዓኣፒጉዲ ሚዛጳኔ።

ዑኡቴሎ ዓይኑሞ

¹⁶ ታ ዒሼ! ኔኤኒያ ሚዛጲታንቴሞ፤ ኮሺ ኔ ታና ዎዛሳኔ፤ ሻኣላ ኑኡኮ ዋርቂ ዓኣ ማኣቲጉዲ ዎዛሳያኬ።

ዑኡታሢ ዓይኑሞ

¹⁷ ማኣሮኮ ኑኡኮ ቱርቱራ ሊባኖኦሴ ሚፆኬ፤ ሳካኣ ዚቢቆ ሚፆና ማዢንቴያኬ።