ዮሃኒሴም ፆኦሲ ዻዌ ባኮ 15 - ጌኤዦ ማፃኣፖ

ጋፒንፆ ማዔ ባይዛ ባኮ ዔኪ ዓኣ ኪኢታንቾንሢ

¹ ዬካፓ ሜሌ ዼኤፒ ሃሣ ዲቃሢ ሄርሺሳ ማላታ ጫሪንጫ ታ ዛጌኔ፤ ዬይያ፦ ፆኦሲ ዻጋ ዔያቶና ኩማያ ማዔ፥ ላንካይ ባይዛ ባኣዚ ዔኪ ዓኣ፥ ላንካይ ኪኢታንቾ ታ ዛጌኔ።

² ዒማና ሃሣ ታሚ ሲኢሪንቴያ ሌማሌኤሼ ባዚ ማላያ ታ ዴንቄኔ፤ ዒኢካ ባዞ ዓጫ ቦዓሢና ቦዓሢኮ ማላቶና ሃሣ ዒዛ ሱንፆ ፓይዶ ዖሊ ባሼ ዓሳ ዔቂ ዓኣንቴ ታ ዴንቄኔ፤ ዔያታ ፆኦሲዳፓ ዒንጊንቴ ጎኦላ ዔኪ ዓኣኔ፤

³ ዔያታ ፆኦሲም ማዻ፥ ሙሴ ዓይኑሞና ማራዓሢናኮ ዓይኑሞ፦ «ቢያ ባኣዚ ዳንዳዓ ጎዳ ማዔ ፆኦዛሢዮ! ማዻ ኔኤኮ ዼኤፒ ሃሣ ዲቃሢ ሄርሺሳያኬ፤ ሚርጌ ዴሮኮ ካኣታሢዮ! ኔኤኮ ጎይፃ ፒዜ ሃሣ ጎኔኬ።

⁴ ጎዳሢዮ! ኔና ዒጊጩዋያ ሃሣ ሱንፆዋ ኔኤኮ ቦንቹዋይ ዖናዳይ? ኔኤኒ ሌሊ ዱማዼያኬ። ኔኤኮ ፒዜ ማዻ ፔጋዺ ዔርቴሢሮ ዺቦ ዴራ ቢያ ሙኪ ኔ ቤርታ ኔኤም ዚጋንዳኔ» ጌዒ ጌዒ ዓይናዻኔ።

⁵ ዬካፓ ሃሣ ዓፒላና ማዢንቴ፥ ፆኦሲም ዱማዼ፥ ጌኤሺ ማኣሪ ጫሪንጫ ቡሊንቲ ዓኣንቴ ታ ዛጌኔ፤

⁶ ዒማና ላንካዎ ባይዛ ባኮንሢ ዔኪ ዓኣ፥ ላንካይ ኪኢታንቻ ጌኤዦ ማኣራፓ ኬስኬኔ፤ ዬያታ ዓኣፒዳ ዱካ ቦኦሬ ማኣዖ ማይንቲ ዓኣኔ፤ ሃሣ ዳዶይዳኣ ዎርቄና ኮሺንቴ ቃልሾ ቱኡቲ ዓኣኔ።

⁷ ዬኖና ዖይዶ ባኮንሢዳፓ ፔቴሢ ናንጊና ናንጋ ፆኦዛሢኮ ዻጋ ኩሚ ዓኣ፥ ዎርቆና ኮሺንቴ ላንካይ ዑሺ ዓንጊ ላንካዎ ኪኢታንቾንሢም ዒንጌኔ፤

⁸ ሃሣ ጌኤዦ ማኣራ ፆኦሲኮ ቦንቾና ዎልቆናይዳፓ ኬስካ ጩቦና ኩሜኔ፤ ላንካዎ ኪኢታንቾንሢኮ ላንካዎ ባይዛ ባኮንሢ ማዺንቲ ኩማንዳያ ሄላንዳኣና ዖኦኒያ ጌኤዦ ማኣሮ ጌላኒ ዳንዳዒባኣሴ።