ዓይኑሞ ማፃኣፖ 2 - ጌኤዦ ማፃኣፖ

ፆኦሲ ዶኦሚ ካኣታሤ ካኣቲ

¹ ዴራ ዓይጎሮ ጉንዱማይ? ዓሳኣ ጌኔ ማዻኒ ዓይጋ ዞርታይ?

² ዓጮ ካኣታ ዔቄኔ፤ ዔያቶ ዎይሣ ዓሳኣ ናንጊና ናንጋ ጎዳና ዒዚ ዶኦሚ ካኣታሤ ካኣቲናም ጌኔ ማዻኒ ሂዚ ጌይ ዞርቴኔ፦

³ «ኑና ዔያታ ቱኬ ዓንጎ ዱፆ ቶካፓ ኑ ቲቆም፤ ሱዞዋ ዱኡዚ ኑኡኒ ኬኤሮም» ጌዔኔ።

⁴ ጫሪንጫ፥ ካኣቱሞ ቤዛ ዴዔሢ ዔያቶ ሚኢጫኔ፤ ዬያ ዔያቶኮ ፓሡዋ ማሊፆ ናንጊና ናንጋ ጎዳ ቶኦቻኔ።

⁵ ሃካፓ ሴካ ዒዚ ፔ ዻጎና ዔያቶ ጎራንዳኔ፤ ታሞጉዴ ዻጎና ዔያቶ ዒዚ ዒጊቻንዳኔ።

⁶ «ታኣኮ ዱማዼ ፂዮኔ ዹኮይዳ ታኣኒ ዶኦሜ ካኣቲ ታ ካኣታሤኔ» ጋዓንዳኔ።

⁷ «ናንጊና ናንጋ ጎዳ ጌዔ ባኮ ዒላቲ ታ ኬኤዛንዳኔ፤ ዒዚ ታኣም ሂዚ ጌዔኔ፦ ‹ኔኤኒ ታኣኮ ናዓሢኬ፤ ታ ኔና ሃኖ ሾዔኔ፤

⁸ ታና ሺኢቄ፤ ዴራ ቢያ ኔ ቢታንቶ ዴማ ዎርቃንዳጉዲ ታ ማሃንዳኔ፤ ዓጪ ማዔ ካራና ቢያ ኔ ዴኔ ማዓንዳኔ።

⁹ ዓንጊ ኮኦሎና ኔ ዔያቶ ጳርቃንዳኔ፤ ዓጪና ማዢንቴ ሜሄጉዲ ኔ ዔያቶ ጋኣጫንዳኔ› » ጌዔኔ።

¹⁰ ዒንሢ፥ ካኣታ ማሊ ጶቂሡዋቴ፤ ዒንሢ፥ ዓጮ ዎይሣ ዓሳ ዒንሢና ዔሩዋቴ።

¹¹ ናንጊና ናንጋ ጎዳም ዒጊቹሞና ማዹዋቴ፤ ጎጋይቂ ጎጋይቂያኣ ዒዛ ቢታንቶ ዴማ ዎርቁዋቴ።

¹² ዻጋ ዒዛኮ ዔኤታንዳሢኮ ቤርታ ዒንሢያ ዒ ባይዙዋንቴ ቤርታ ጎጋይቂ ጎጋይቂ ናዓሢም ዳዲ ባዑዋቴ፤ ዒዛ ፑኖ ካይዚ ማሃዞንሢ ቢያ ዓንጂንቴያኬ።