ዮናኣሴ ማፃኣፖ 2 - ጌኤዦ ማፃኣፖ

ዮናኣሴ ሺኢቄ ሺኢጲፆ

¹ ዮናኣሴ ሞላሢ ጎጶይዳ ዓኣዖ ሂዚ ጌይ ናንጊና ናንጋ ጎዳ ማዔ ፔ ፆኦዛሢ ሺኢቄኔ፦

² «ናንጊና ናንጋ ጎዳሢዮ! ታኣኒ ሜታዺ ዓኣዖ ኔና ዔኤሌኔ፤ ኔኤኒያ ታኣም ዬሄኔ፤ ኔኤኒ ታና ማኣዶንጎ ጌይ ሃይቄ ዓሶ ዓጮ፥ ዔቶይዳ ዓኣዖ ኔ ዓውሳንዳጉዲ ታኣኒ ዒላቴኔ፤ ኔኤኒያ ታኣም ዋይዜኔ።

³ ኮሺ ዔታዻ ባዞኮ ዴሞይዳ ኔኤኒ ታና ኬኤሬኔ፤ ኮይላ ታኣኮ ዋኣሢ ሌሊ ማዔኔ፤ ኔኤኮ ዴቺንታ ዋኣፆና ባዞ ጉዳሢና ታኣኮ ዑሢና ዓኣዼኔ።

⁴ ኔ ዓኣፓፓ ታኣኒ ኬኤሪንቲ ባይቄኔ፤ ያዺ ማዔቴያ ኔኤኮ ጌኤዦ ማኣሮ ላሚ ታኣኒ ዛጋኔ።

⁵ ዋኣፃ ታኣኮ ሆሎ ሄላንዳኣና ዼኤፖ ባዞ ዋኣፃኣ ጋፒሲ ታና ዔኤዼኔ፤ ዼኤፖ ባዞይዳ ባቃሊ ዓኣ ማኣታ ቶኦኮ ታኣኮ ማሬኔ።

⁶ ሊካ ዹኮኮ ዴሞ ታኣኒ ኬዴኔ፤ ዬያኮዋ ዴማ ዓኣ ሳዖ ዴማ ናንጊና ታኣኒ ካራ ዎዺንቴም ዴዔኔ፤ ኔኤኒ ጋዓንቴ ናንጊና ናንጋ ጎዳ ማዔ ታ ፆኦዛሢዮ! ዬያ ዋኣፆ ዔቶይዳፓ ኬሲ ዔኪ ሼምፓሢ ታኣኮ ዓውሴኔ።

⁷ ታኣኒ ሃይቄያ ታኣም ማሌ ዎዶና ናንጊና ናንጋ ጎዳ ታኣኒ ማሊ ጶቂሤኔ፤ ኔና ታኣኮ ፆኦዛሢ ታኣኒ ሺኢቄኔ፤ ሺኢቂፆ ታኣሲ ኔኤኮ ጌኤዦ ማኣሮይዳ ኔ ዋይዜኔ።

⁸ ሉኡዚ ማዔ ፆኦዞ ካኣሽካ ዓሳ ቢያ ኔኤም ጉሙርቂንታያ ማዒፆ ሃሼኔ።

⁹ ዻቂሻሢ ናንጊና ናንጋ ጎዳታሢሮ ታኣኒ ጋላታ ዓይኑሞና ዎላ ዒንጎ ባኣዚያ ሺኢሻንዳኔ፤ ዒዛም ታኣኒ ናኣቤ ባኮዋ ዒንጋንዳኔ።»

¹⁰ ዬካፓ ናንጊና ናንጋ ጎዳ ዓይሤም ሞላሢ ዮናኣሴ ዔኪ ኬሲ ባዞ ዓጫ ጮኦሽኬኔ።