Misé 1 - GALA Daawoo Zɛʋɛi

¹ Wooiti ka ga niiti Ɠɔoɠɔ GALAGI ti laazeelini Molesɛte nui Misé ma, Zuda masa saʋagɔiti ta-yeeɠɛɠalaiti, Yotame, ta Aɠaze ta Ezekiase. Kulakɛlɛmai naati ti ʋilɛni taa wolaiti ba, ti ga, Samali ta Zeluzalɛme.

GALA ná-tukpɔɠaaleʋeai Izilayɛle laalɔɠɔma

² Nuɓusɛiti pɛ à woilo! Zooi ta wɔiti wo zooi ɠa, à ɠida bu! Maliɠii Ɠɔoɠɔ GALAGI ɠa yɛsu seizu ɲadegai, é zeele wooi wo wo laalɔɠɔma!

³ Wɛlɛ Ɠɔoɠɔ GALAGI ɠana ɠula seizuʋɛ, é yei, é ɗa ɠɔɠɔziɛ zalaɠa ɠula adaʋɛti su.

⁴ Gizeiti ti ɗa ɓusɛ kɔɠɔwu, pɛtugiti sulaa ɗa lao, eɠɛ kedoi ɠaa ɠa ɠɛ wuunsu abui ɠa, eɠɛ ziɛ a ɠɛ gizei yeizu.

⁵ Naa pɛ ka ga Zakɔɓe mavofodaiti ta-lɔ koloɠologi, Izilayɛle ʋɛlɛyeɠei ná-kotoi maaʋele ma. Ɓɛ ɠa é Zakɔɓe liizu tɔ koloɠologi ma? Ná-taa wolai Samali laade ɓaa? Ɓɛ ɠa é Zuda liizu ani ɠɔɔ vaiti ma? Zeluzalɛme laade ɓaa?

⁶ Maliɠii ɠɛni ma: «Naa ma, nà Samali ɠɛɛzu ga kɔtu ziɠigi dɔɓɔi zu, ti ɗa leezɛn ɓelei la ma, nà ná-kɔtuiti kilikili, ti la nɛmɛi zu, gè kpale ná, ma wuulaagiti ti maaɠala.

⁷ Ná-kɔɔɠɔ gani kpɛtɛaiti su ɠa ɠaleɠale, ná-tɔnɔ ɲɔiti pɛ ti ɠala. Ná-vololiba zaɠaaiti, gè naati suɓulukpulu, tɔɔzei naati ti ɓɛtɛni ga ná-koloɠologi ma ɠulanumai, ta ʋaazu ɠɛɛzu ga koloɠologi taɠiligaa ma ɠulanumai.»

GALA goo wo nui ná-gɔlɔi

⁸ Naa ɠa é kɛɛzu gè ɠaalɛizu, gè ɗa wɔlɔ, gè ɗa ziɛ ga ɠɔɠɔa ɲakai, kɔ̀ba ɲakai, gè ɗa kpeei loo eɠɛ koʋei, gè ɗa kpalagi wo eɠɛ saa wɔnigi.

⁹ Mazɔlɔɔ maanɔɠɔi seeliai Samali ma, é la ɠulaa su pɛ. É zeelia Zuda yooi ma ta Zeluzalɛme taa ziɠidaʋɛ, ʋɛ nà-nuɓusɛiti ti zeini ná.

¹⁰ À mina daazeeli Gate taazuʋɛ, à mina wɔlɔ! Ɓɛte-Leafala nuiti, à ɠilikili fufiligi zu!

¹¹ Safiil nuiti, à leʋe ga ɠɔba ɲakai ta wa-unfegi! Saanan nuiti ti la zoosu ti ʋa ɠula taa ʋa. Gɔlɔi ɠa wosu Ɓɛte-Ɠayɛsɛle taazuʋɛ, kpɔba zobo ge la mɔ ná.

¹² Malote taaʋeaiti sasu ɠa ɓalizu ta-ɠulanumaiti ma vaa zu. Mazɔlɔɔ nimiza vai Ɠɔoɠɔ GALAGI teʋegai é zeelia Zeluzalɛme taa ziɠidaʋɛ ma.

¹³ Lakise laaʋeaiti, à wa-ɠɔɔɠɔ wotoloiti ta sooiti kɛʋele ɓɛtɛ. Wo ʋokɔɠɔni Izilayɛle ná-wooʋaladai ma, wo Zeluzalɛme lɔ tɔ koloɠologiti su.

¹⁴ Naa ma, Zuda nuɓusɛiti à bali ma wa Molesɛte-Gate nuiti. Akiziɓe taa wolai la ɠɛa ga kula faa zu ani Izilayɛle nuɓusɛiti ta-masagiti bɛ.

¹⁵ Maliɠii ɠa wo lɔɔzu nu niinɛ yeezu Malesa nuiti. Izilayɛle ɠundiɠiiti ti lɔɠɔɠulaai, ta ʋelazuʋɛ ɠaiziɛ Adulame ʋugi zu.

¹⁶ À wɔungiti bo, wo ti ɓuye ma, Zeluzalɛme taaʋeaiti, kpaanagi ɠɛ wo-unmaʋɛ, eɠɛ ɗuai nɔungi, à wo yiima lointi ta-wɔlɔi wo, mazɔlɔɔ ta liizu ga tiye duɔlai zu, ti maaɠooza wo ʋa.