Guyeiti 5 - GALA Daawoo Zɛʋɛi

Lo tùɠɔ pelei zu

¹ Guye loo ɠundiɠii nɔnɔi ʋe. É loozu ga kooleiti. Davide ná-guyei.

² Ɠɔoɠɔ GALAGI, woilo gòoi ma! Kpalagi gè bosu gaaɠa!

³ Ɠida nà-kpee loligi wu, nà-masagi, nà-GALAGI, mazɔlɔɔ ɗa ɠa gè è valizu.

⁴ Ɠɔoɠɔ GALAGI, gosui, ɗa ɗa gòoi mɛni, sobui, nà ɗa ʋa è ʋɔ bɛ, gè ɗa è maaɓɔun.

⁵ Mazɔlɔɔ è la ga GALAGI, nii faa ɲɔi nɛai bɛ. Faa ɲɔi la zeizu zɔlɔɔga è ɠobaʋɛ.

⁶ Ɠimalala nuiti ti la zooga ti ʋa lo è ɠaazu, naati wɔin la è ma, niiti ti faa ɲɔi ɠɛɛzu.

⁷ Ɗa zɛɛ wo nuiti kpein undaaʋili. Nu ʋaa nuiti ta yaava nuiti wɔin la Ɠɔoɠɔ GALAGI ma.

⁸ Ɗa-wooɠɛɠilada wolai ʋɔ, nii kpela ge la ba, nà zoo gè lɛ ɗa-ʋɛlɛi wu, è ɠaazuluabai é zèa, nà nɔkɔ è wu, è zei ʋɛlɛ ɲadegai wu.

⁹ Ɠɔoɠɔ GALAGI, lo tùɠɔ ɗa-lelebodai zu, sìli nuiti maaʋele ma. Ɗa-ʋelei ɠaa ɠɛ sɔli tùɠɔ.

¹⁰ Mazɔlɔɔ nu nɔpɛ ge la laa ti-wooiti da, ti ɠoozu ɠisiɛi kpein ka ga faa ɠoloɠologi, ti-ɠɔdayeɠei ɠɛɛʋɛ eɠɛ kabayeɠei daalaogai, ti-nɛgi ɠa ga yaava anii.

¹¹ Ee, GALA, ti leve ga faa ɲɔu ɠɛ nuiti, è ti zo ɠana! Ti ɠoozu ɠisiɛi ɠɛ ga ti loo zaɓui. Ti ʋili ya ta-lɔ koloɠologiti maaʋele ma, nii gaa la luga. Mazɔlɔɔ ta wuzeɠezu è laalɔɠɔma.

¹² Kɛlɛ niiti kpein ti lɔɔɠuzu è ʋɔ bɛ, ta ɠoozunɛ è ʋɔ. Ta ɠoozunɛ eyɛsu ɠɔ, ɗa ɓaa ti maazu, ta ɠoozunɛ è ʋɔ, niiti è-laaseigi nɛai ti ʋɛ.

¹³ Mazɔlɔɔ ɗɔun ɗa, Ɠɔoɠɔ GALAGI, ɗa tuya loo telebo nui ʋɛ. Ɗa ɓaa maazu ga ɗa-nuɓɔɠɔlai, eɠɛ kɔɔɠɔ zɛpɛgi.