Guyeiti 4 - GALA Daawoo Zɛʋɛi

Ɠɔoɠɔ GALAGI ɠa ziilɛigi veezu

¹ Guye loo ɠundiɠii nɔnɔi ʋe. É loozu ga kɔnigiti. Davide ná-guyei.

² Siɛgi zu gè wooɠulazu la è ma, gòoɠaaʋote, GALAGI nii é ga nà-telebodai. Kidaaʋiligi zu, ɗa ìɲɔdɔɔzu. Zaalai la mà, è woilo nà-fali wooiti ma.

³ Wɔi wo ga nuiti, wa yɛsu nà-lɛbiyai maaɓoozu, eyɛsu yeelɛ? Wa yɛsu faa ɲakai nɛɛzu ʋɛ, wo ɗa zɛɛi ɠaiziɛ, eyɛsu yeelɛ? Lo!

⁴ À suɠwɛɛ ga Ɠɔoɠɔ GALAGI yiimazeɠeʋɛ ga zunu ɠila, nii é ga wooɠɛɠila nu tɔun bɛ, toɠa ɗa gòomɛni, siɛgi zu gè tolisu da.

⁵ Wa yiiɠaawanana, à mina koto ɠɛ. À kisiɛi wo wa-ʋetei zu, wo maaɠɛ kpɔ. Lo!

⁶ À zalaɠaiti kula, niiti ti zoloogai tɔgi ma, à ɓɔɠɔ ɠaliva Ɠɔoɠɔ GALAGI ma.

⁷ Naati mɔinʋɛ, niiti ti gaazaɠagi wosu ga: «Mini ɠa gá-undaanɛɛi ʋaazu, é zeɠe ná?» Ee, Ɠɔoɠɔ GALAGI, è-ɠaazuʋɛ ma wozakalagi lo gi ʋa!

⁸ Ɗa koozunɛɛi ʋuuzu zìimaʋɛ, é leʋe ta-molo leʋe ziɛgi zu ʋa, ta ta-lɔɔ niinɛi ʋu ziɛgi zu ʋa.

⁹ Nà laana nɔ feya, nà ɲi ziilɛigi zu. Mazɔlɔɔ ɗa ɠila kpe, Ɠɔoɠɔ GALAGI, ɗa sèizu ziilɛigi zu.