Guyeiti 2 - GALA Daawoo Zɛʋɛi

Masagi zei vai

¹ Leeni vaa zu zii ɠiligiti ti ɠɛɛzu unga wuulee? Leeni vaa zu ziiti pɛ ti kisiɛ ɲakaiti bosu?

² Zou masagiti ta kɔɔi ɓɛtɛzu, kundiɠiiti ti ɗa yaavai ɓɛtɛ Ɠɔoɠɔ GALAGI laalɔɠɔma, ta ná-zunui nii é gulɔ ɲadegai ziaai ma.

³ Ti ɠɛ ma: «Ade galui vie ɓɔɠɔ ma, nii de ɠiliai la, de ta-yɔlɔɠɔiti pili ya, maaɠooza de ʋa!»

⁴ Kɛlɛ Maliɠii GALA ka zeini ná-masa kpɔkpɔgi ɠa, geeɠɔlɔgi zu, é ɗa ɲɛɛi wo, é ɗa ɲɛɛɠula ti zu.

⁵ Toɠa ɓɔɛzu ti ʋɔ, ná-ziiɠaawanai zu, é ti maalua ná-ziiɠulagi zu, é ɠɛ ma:

⁶ «Nà ɠa gè nà-masagi zeiɗai Siyɔn, nà-gize ɲadegai ma, gè gulɔ ɲadegai ziɛ ma.»

⁷ Nà devei naa lɛ adaʋɛ pɛ, nii Ɠɔoɠɔ GALAGI boni. É ɠɛni mà: «Ɗa ga dòun zunui, za, gè è ɠɛa ga dòin.

⁸ Zii ɠiligiti fali mà, nà ti ve è ya ga ɗɔnɔ, ɗa zooi zɔlɔɔ ga ɗɔnɔ, é li zou ɓela ga,

⁹ ɗa ti maaɠolo ga kɔlu lukpɔi, ɗa ti wolowolo eɠɛ pɔlɔ liɠii.»

¹⁰ Niizu, masagiti à kidafaawui ɠɛ! À ɠigi zɔlɔɔ, wɔi wo zeini eteai unda.

¹¹ À Ɠɔoɠɔ GALAGI lɛbi dualuagi zu, à ɠoozunɛ, wo zasu ɗa ɓali gaazu.

¹² À ɓɔɠɔ unmaayei GALA doun zunui ʋɛ, nii a kɛ é mina yiiɠaawana, wo undaa a ʋa ʋili, wɔi kpein wo ziɛzu ga pelei naa. Mazɔlɔɔ ná-ziiɠaawanai zuvilɛʋɛ. Undaanɛ nu ɠa ga naati kpein, niiti ti ʋoluzeizu ba, ti lɔɔɠu pɔ bɛ.