Ɛgezɔde 11 - GALA Daawoo Zɛʋɛi

Maanɔɠɔ ɠaaɓelagi ma wooi wo fai

¹ Ɠɔoɠɔ GALAGI ɠɛni Moize ma: «Nà ʋaazu ga maanɔɠɔ ɠaaɓelagi Falaɠɔn ʋɔ ta Ezipete yooi. Naa a ɠɛɛna, toɠa ɓesu wo ʋa, wo ɠula ʋɛ ʋa. Siɛgi zu é ɓesu la wo ʋa ga wo li, toɠa wo ɓɛ ʋɛ tɛtɛ.

² Ɓɔɛ nuɓusɛiti pɔ ga, zunui ɠilagilagi ta anzanui ɠilagilagi wali aniɲakaiti ta zanu aniɲakaiti fali seiɲɔɠɔi ma.»

³ Ɠɔoɠɔ GALAGI kɛɛni ɠana, eyɛsu nuɓusɛiti ti ɠaazu unfe sɔlɔɔ Ezipete nuiti gaazu, Moize ɓɔɠɔi ɠɛni ga nui nii unfemai ɠɛni veezu bɛ gola Ezipete yooi zu, Falaɠɔn ná-botiɠɛ nuiti zea, ta nuɓusɛiti pɛ.

⁴ Moize ɠɛni: «Ɠɔoɠɔ GALAGI wooi ɠaa: ‹Kua zaamai ma yeeɠɛɠalai, nà ʋaazu, gè leʋe Ezipete yooi zu.

⁵ Doun zunu mɔungi kpein ka za Ezipete yooi zu, Falaɠɔn é zeini masa kpɔkpɔgi ɠa, é zo naa ná-doun zunu mɔungi ma, eyɛsu é zeeli botiɠɛ anzanui ná-doun zunu mɔungi ma, nii é moloi ziɠazu, eyɛsu é zeeli toganiiti ti-yiʋo zinɛ mɔungiti kpein ma.

⁶ Kpee wola ɠa loo Ezipete yooi kpein su, nii kɛɠala la dɛ ɠɛɛni kaipa, ta kɛɠala la mɔ ɠɛa pɛ.

⁷ Kɛlɛ Izilayɛle nuiti pɔ bɛ, nu la ɠite ɓalaa gilɛ ɓɔzɔ woomɛniga nu ma, ɓaa mu sua ma, naa ɠa a kɛ wo kwɛɛ ga Ɠɔoɠɔ GALAGI zɔɠɔzu ɠɛɛʋɛ Ezipete ʋa ta Izilayɛle.›

⁸ Naazu, ɗa-wotiɠɛ nuiti kpein ta ʋa, ti nɔkɔ bù, ti ɠɛ ma: ‹Ɠula ʋɛ ʋa, wa nuɓusɛiti pɛ, niiti ti è ʋolu!› Naa ʋoluma nà ɠula, gè li.» Moize ɠulani Falaɠɔn ʋɔ bɛ ga ziiɠaawana wolai.

⁹ Ɠɔoɠɔ GALAGI ɠɛni Moize ma: «Falaɠɔn la woiloga wo-woo ma, naa ɠa a kɛ gè nà-maaɓɛlɛ vaiti kɛ ga mɔinɗa Ezipete yooi zu.»

¹⁰ Moize ta Aalɔn ti naama maaɓɛlɛ vaiti kpein kɛɛni Falaɠɔn ɠaazu, kɛlɛ Ɠɔoɠɔ GALAGI Falaɠɔn ɠigi ɓaani, é la ɓeni Izilayɛle nuiti ba, ti ʋa li, ti ʋa ɠula ná-zooi ʋa.