Eɓulu 1 - GALA Daawoo Zɛʋɛi

GALA kulaʋɛ kɛlɛma ade ʋɛ ga ná-Doun Zunui maaʋele

¹ Mɔungi zu, GALA ge ɓɔɛni ade-mɛmɛwolani pɔ, ná zeizu mɔin, ta kɛʋele mɔinmɔin su, ga GALA goo wo nuiti maaʋele.

² Kɛlɛ niima voloiti su, ti ga yeeɠɛɠala ɠaaɓelagiti, é woo ʋua ná-Doun Zunui la, naa ɓɔɛ la ade ʋɔ. Tɔ ɠa é yiimazeɠea la ga é anii pɛ pu zeezu. Tɔ ɠa é eteai ɓɛtɛni ga tɔun maaʋele.

³ Doun Zunui tɔna ka é ga GALA ná-lɛbiyai ma voloi, é ga GALA ɓɔɠɔi ʋaaɠulabai. Tɔ ɠa é kpɛtɛanii pɛ suzosu ga daawooi ná-zɛbɛi. Kpegai ma ga kotoiti gba vai ɠɛ, é zeini geeɠɔlɔgi zu maazuʋɛ poun, GALA Maayikiai yeezazuʋɛ.

Doun Zunui wɔɔlɔʋɛ geezuɠeelaiti ba

⁴ Doun Zunui wɔɔlɔʋɛ gola, é leʋe geezuɠeelaiti ba, ʋele nɔ ɠana é la ɓalaa, é daasei sɔlɔɔgɛ, nii bɔɔlɔai naati tɔnɔi ʋa.

⁵ Mazɔlɔɔ geezuɠeelai ɓɛgele ɠa GALA ge ɠɛni ma: «Ɗa ga dòun zunui, za, gè è ɠɛa ga dòin.» Ɓaa mu mɔnɔ: «Nà ɠɛ bɛ ga ɠɛɛɠɛi, tɔun ge ɠɛ bɛ̀ ga doun zunu»?

⁶ Siɛgi zu GALA ge Doun Zunu mɔungi leʋeni da eteai zu, é ɠɛni ma: «GALA ná-geezuɠeelaiti pɛ ti nɔkɔ bu!»

⁷ Niima wooi ɠa é boni geezuɠeelaiti ta-vaa zu: «Tɛigi a ɗa ná-geezuɠeelaiti kɛ ga fiilɛi, é ná-botiɠɛ nuiti kɛ ga abuzogi.»

⁸ Kɛlɛ GALA ge ɠɛni Doun Zunui ma: «Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ, ɗa-masa tukpɔi ɠa ga telebo tukpɔi.

⁹ Telebodai nɛɛʋɛ è ʋɛ, è tɔ koloɠolo fai wɔinzeɠe. Naa ɠa é ba, GALA, ɗa-ƓALAGI gulɔi ziɛni è ma, koozunɛ wulɔi, é yiimazeɠe ga ɗe è ɠɛɠalaiti saama.»

¹⁰ É ɠɛni ma mɔnɔ: «Ɗa ɠa, Maliɠii, è eteai lɔɔɓadɔni tɔɔzeizu mɔunpa, geeɠɔlɔgi ɠa ga è-yeei ná-kpɛtɛanii.

¹¹ Ta ɲɛɛlɛ, kɛlɛ ɗɔun ɗa ná eyɛsu ɠɔ. Ti pɛ ta wɔlɔzaɠa eɠɛ seɠei,

¹² è ti ʋɛɛ su, è ti ɓili eɠɛ tookɔba wolai, ti maa ɠa valibo eɠɛ seɠei. Kɛlɛ ɗɔun, ɗa yɛsu ɠɛʋele ma, ɗa-ɠonagiti ti la ɓega ɠɔ!»

¹³ Geezuɠeelaiti su, ɓɛgele ɠa é ɠɛni ma: «Zei zèezazuʋɛ, eyɛsu gè è zili nuiti kɛ ga ɗa-ɠɔɠɔloma anii»?

¹⁴ Geezuɠeelaiti ti pɛ tɛi ti ʋa ɠɛ ga zɛnvuiti ti GALA ná-botii ɠɛɛzu ɓaa? É ti leʋesu ga ti kpɔba ve naati bɛ ti maanɛai ti kizogi zɔlɔɔ.