Amɔse 1 - GALA Daawoo Zɛʋɛi

Sɛʋɛ ungi

¹ Wooi niiti ka Ɠɔoɠɔ GALAGI dɛɛni ga Amɔse, Tekoa taazuʋɛ logani makɛ nui gila ge ɠɛni de. Ɠɔoɠɔ GALAGI ɓɔɛni pɔ Izilayɛle laalɔɠɔma, Zuda masagi Woziase ná-siɛgi zu, ta Izilayɛle masagi Zeloɓoame velesiɛi ná-siɛgi zu, Zoase ná-doun zunui. Niima vaiti kɛɛʋɛ kona felegɔ leʋe pɛ, zou ɓalii ʋa ɠɛ.

² É ɠɛni ɠɛɛzu ma: «Ɠɔoɠɔ GALAGI ɠa zikɔzu Siyɔn, gooi ɠa ɠulazu Zeluzalɛme. Togani lo nuiti ta-lufa lɛnugiti suɠaalɛiɗa Kaalamɛle gizei unmaʋɛ vɔa.»

Siili nuiti daalɔɠɔma

³ Ɠɔoɠɔ GALAGI wooi ɠaa: «Damase nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti Galaade nuiti koloɠologɛ ga wozawoli ɠali ɠaazoɓagi.

⁴ Nà ʋaazu abui losu Ɠazayɛle ná-pɛlɛyeɠei ʋa, toɠa Ɓɛne-Ɠadade ʋoluzeizuʋɛti gala.

⁵ Nà Damase taai ma ɓogiti galeɠale da, gè Avɛne nɛmɛi naa zu nuɓusɛiti undaaʋili, ta zɔi é masadai ɠɛɛzu Ɓɛte-Edɛne ʋɛlɛi wu. Siili nuɓusɛiti ta li duɔlai zu Kiil.» Ɠɔoɠɔ GALAGI ɠa é boga.

Filisiti nuiti daalɔɠɔma

⁶ Ɠɔoɠɔ GALAGI wooi ɠaa: «Gaza nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti liini ga kasoɠa nu mɔinmɔin, ti naati fe Edɔme ya ga duɔiti.

⁷ Nà ʋaazu abui losu Gaza ziɠigi ʋa, toɠa poluzeizuʋɛti gala ná.

⁸ Nà Asadɔde taaʋeaiti undaaʋili, ta zɔi é masadai ɠɛɛzu Asekalɔn. Nà Ekelɔn loɠa, Filisiti nuiti kpein ti undaa ɠa ʋili, kulaba la ba.» Maliɠii Ɠɔoɠɔ GALAGI ɠa é boga.

Tiil nuiti daalɔɠɔma

⁹ Ɠɔoɠɔ GALAGI wooi ɠaa: «Tiil nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti la ɠizɛni kɛɛɠɛloun minazeɠegi zu, ti liini ga taa mɔinmɔin su nuɓusɛiti pɛ Edɔme ʋɔ duɔlai zu.

¹⁰ Nà ʋaazu abui losu Tiil ziɠigi ʋa, toɠa poluzeizuʋɛti gala ná.»

Edɔme nuiti daalɔɠɔma

¹¹ Ɠɔoɠɔ GALAGI wooi ɠaa: «Edɔme nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti ʋilɛgɛ ti-ɠɛɛlointi polu ga boɠa zɔkpɔi, ti gaazumaawɔinɠai pɛ tooni ya, ti la looɠoni pɛ ga naati kpɔlɔa ga ta-yiiɠaawanai, ti ta-vaawanamai zeiʋɛ yiima kpaan.

¹² Nà ʋaazu abui losu Teman taai ʋa, toɠa poluzeizuʋɛti gala Ɓosela taazuʋɛ.»

Amɔn nuiti daalɔɠɔma

¹³ Ɠɔoɠɔ GALAGI wooi ɠaa: «Amɔn nuiti ti tɔ koloɠolo mɔinmɔin kɛɛʋɛ, da ge leʋe. Naa ɠa é ba, gè la zeɠea nà-devei ʋolu pɛ. Mazɔlɔɔ ti koma nuiti kogiti daaʋalini Galaade, nii a kɛ ti ta-yooi zuwɔɔlɔ.

¹⁴ Nà ʋaazu abui losu Laɓa ziɠigi ʋa, toɠa poluzeizuʋɛti gala ná. Naa ɠa ɠɛɛzu ga kɔɔɠɔ voloi, kɔɔi maalugi zaama, tɔngɔlɔ fiilɛi zaama, yeei fiilɛ wolai lokoleʋezu la.

¹⁵ Ta-masagi ɠa li duɔlai zu, ta ná-kundiɠiiti.» Ɠɔoɠɔ GALAGI ɠa é boga.