2 Dɔlɔ Sɛʋɛi 27 - GALA Daawoo Zɛʋɛi

Zuda masagi Yotame

¹ Yotame ná-konagi ɠɛni ga puufele maazu lɔɔlugɔ (25), siɛgi zu é zeini la ga masagi. Kona puugɔ maazu lɔzita (16) ɠa é kɛɛni masadai zu Zeluzalɛme. Dee laa ɠɛni ga Yelusa, Sadɔke ná-doun anzanui ɠɛni de.

² É Ɠɔoɠɔ GALAGI yiima vai ɠɛɛni ga kɛɛɠɛ Woziase ɠɛʋele fai pɛ su. É la ɠɛni lɛɛni Ɠɔoɠɔ GALAGI zei ʋɛlɛi wu. Kɛlɛ nuɓusɛiti ti ɠɛni dɛ ziɛ ʋele ɲɔu zu.

³ Yotame ɠa é Ɠɔoɠɔ GALAGI zei ʋɛlɛi ma ziɠidaʋɛ ɓɛtɛni ʋɛ ná ɠɛni lɛkpɛma nu ɠɔʋɛzu ʋelei. É ada mɔinmɔin kpɛtɛni siɠigi ʋa Wofɛle ɠoizu ʋele.

⁴ É taa wolaiti toni ɓalaa Zuda ɠize yooi zu, naa ʋɛɛ kɔɔlaaɠaiti ta siɠi gaaɠoozagiti ba dɔɓɔi zu.

⁵ É kɔɔi valani Amɔn masagi ʋa, é vɔni ti ma, naa maaʋele ma naama ɠonagi ta kona felegɔi niiti ti zeini da, Amɔn nuiti ti mului zalani ga walii kilo waasaʋagɔ (3.000), moloi daa ga ɓelee, naa ma ɠilo miliyɔn saʋagɔ (3.000.000), ta moloi daa ga wɔɔlezegi naa kilo miliyɔn saʋagɔ (3.000.000) ʋa konagi zu.

⁶ Yotame zɛbɛi wɔɔlɔni, tɔɔzei é ɠɛni ziɛzu telebodai zu ná-GALAGI Ɠɔoɠɔ GALAGI ɠaazu.

⁷ Yotame ná-kɛɛwotii mɔtaiti, ta ná-kɔɔi kpein, naa ʋɛɛ nii kpein ba é kɛɛni, naati sɛʋɛʋɛ Izilayɛle masagiti ta Zuda masagiti ta-zɛʋɛi zu.

⁸ Ná-konagi ɠɛni ga puufele maazu lɔɔlugɔ (25), siɛgi zu é zeini la ga masagi. Kona puugɔ maazu lɔzita (16) ɠa é kɛɛni masadai zu Zeluzalɛme.

⁹ Yotame zaani. Ti maaɠuluni Davide ná-taa wolai zu. Ná-doun zunui Aɠaze ɠa é masadai ɠɛɛni potogi zu.