Matiye 28 - Nouveau Testament en Guidar

Wəsilya na Zezu sətəki əmta

¹ Dərɓaga pay naffete*, təki biŋbiŋgi, Mari na Magdala gəm Mari maɓata azoŋko ula magamasə.

² Go'ləŋgə dələv aɓələk diiɗa, maslay na Ɗəfdaya aprikik daga sə disiŋ, akəɗəŋgələk gərəm sə magamasə, asanka kani.

³ Zən awiɗɗik va uwiɗ na buna, bəbar na lukut nan bo va ɓeɓɓrezle.

⁴ Geslne armek məzugaŋ magamas sawɓa akereŋke, tahəŋ va mimtiti.

⁵ Yaŋ maslay anah sit gil neki: Nokum kədaw geslne'eŋ ɓa, nəsənək pakə Zezu məs məkpa'ən kədaw kayanəni.

⁶ Tayaŋ ɓa, asilik va anahə. Məde mula təki an Ɗəfdaya a voŋgu.

⁷ Mədoŋ də kakara, məne sit gewleɗ nani asilik səzet ɗii mimtiti. Nan bo wambat dabəŋ kikum aka dələv na Galile, adak kədawlanəni. Aski naw nənah sukum.

⁸ Agilyoŋguk də kakara sədəv magamas ləŋgə də geslne də wəneken zit diiɗa, anzuwaŋka vi kawnah sit gewleɗ nan meɓɓeti.

⁹ Yaŋ Zezu aləm dənɗaŋ, apsit na: Nəsɗokumko, zəzay dəsan də munokum. Azoŋko zani, armanənək tələn azuliyaŋ sənənka.

¹⁰ Yaŋ Zezu anahsiti: Kədaw geslne'eŋ ɓa, mədoŋ mənesit milmiŋgiɗu meɓɓeti dədoŋ a Galile, adak adawluwəni.

Məpsiti deleɗ sit məgaŋ magamasə

¹¹ Adan adadoŋ, ɗii səmbet məgaŋ magamas adoŋko awalaŋ gəla, anahsitinik memilyeŋge net məs dəlveŋge pak an məs dəgəɗə.

¹² Memilyeŋge net məs dəlveŋge dit ɗii gugiriɗ pak akalaŋka aslereŋke, apsitinik deleɗ diiɗa sit sozeɗi.

¹³ Apsitin na: Kənəhaŋ gən na: Gewleɗ nan azoŋguk dəfɗa mənam tat wəleŋge ahalnənka.

¹⁴ An ngomna apprəməka waməpel səni, waməgilgukum sədəv tattuwãh nani.

¹⁵ Sozeɗ agiminik deleɗi, aɗɗanənək va mənahsiti. Halabara nan atərayək aweleŋgit Yahudiyenɗe ha gap pay dəpaŋka.

Zezu arbanək zən azet gewleɗ nani

¹⁶ Gewleɗ klaw kiyit taka ambataŋgək a Galile, aka mosorgo va Zezu anahsiti.

¹⁷ Adan awlanəni, azuliyaŋ sənənka, ɗii meɓɓet aɗɗaŋgək kuzuŋ.

¹⁸ Zezu adeke, apelsitke, amna: Gakdak pak məpsuwi disiŋ də dəlva fuŋ pakə.

¹⁹ Vi vaski məduwaŋ, azet ɗii pak məkpaŋget dəsoŋ gən gewleɗ nawa məɗɗe sit baptem də iya na Affən də iya na Wətən də iya na Əmpəs Salala.

²⁰ Mərban sit dərmanən gən an məs nərban sukum pakə. Wanəsaw də munokum pay pak ha wəgrak na dəlva.