Markus 14 - Nouveau Testament en Guidar

Kuket narma zuzu

¹ Appələk uvoŋ sula wəzləra na Paska* wagəɗə, də dupeŋ wəza wuɗo aran ɓa: Ɗii net məs dəlveŋge na Maŋgəlva dit məsənaŋ zəga na ma henziŋ akayaŋgək tive karma Zezu də məɗama, vi kawbayni.

² Aɓɗaŋ mədarman də wəzləraŋ ɓa, vi ɗii adaw gayaŋ ɓa.

Guluk təmanək mel aka Zezu

³ Yaŋ Zezu asan a Baytaniya, eŋgil ana Simoŋ da məskokolo. Pay asan kawzəma, ɗak tədek də bəbər na mel avata, iya na mel van na tursan (nard) wərəh nan tuwãhi, guluk nak təkoluk ma bəbəra, tmanək mel nak aka Zezu.

⁴ Ɗii meɓɓet sə waleŋgit gədivit adəka, vi mi təray gən mel nat mekeleŋ vaŋdi?

⁵ Va təvələk mel nan tərah gən suleyɗe səkat hoku na ɗəɗaah ɓasa, təpsit gin məs saheŋɗe, watər wəray kəta. Vaski aɗɗaŋ wərwər akata.

⁶ Zezu apsit na: Məppata! Vi mi kədawtakən kiyit di? Təgəɗswək wəza mogoni.

⁷ Məsaheŋɗe tahəŋ də munokum ɗayɗayə, wa kəɓapən wəɗɗa sit mogon ko dewɗe kəŋglaŋ pakə. Amma nawa, nəsaw na də munokum pay pak ɓa.

⁸ Nat təgəɗək məs təŋgələ. Daga pay dəɓəl ɓa təpayək mel sən gəɓa zu vi kawndəkwa.

⁹ Gesiŋ nədawnah sukum: Atəki adawpelin Wən Nenek a duniya pakə, kawpelin ni an məs ɗak kəŋ təgəɗəŋ ka, vi kaɗumon wənnata.

Zudas azəmək ki Zezu

¹⁰ Yaŋ Zudas Iskariyot məs taka suweleŋgit gewleɗ klaw kiyit sula, ambatək azet ɗii net məs dəlveŋge na Maŋgəlva, vi kawzəm ki Zezu azeti.

¹¹ Adan apprəmənən wənnani, annekik zit sawɓa. Apsənənək suleyɗe. Daga dəpaska Zudas atəŋ wəkayan kuket narma Zezu məza tuwã ɓa.

Zezu tay zəm way na Paska* dit gewleɗ nani

¹² Pay dabəŋ na wəzləra net dupeŋɗe məza wuɗo ɓa, məs adawtawaŋ botol na Paska, gewleɗ na Zezu assohonənka: Aŋgay kəŋgəl məmbat gən wəzaɓan təki nawazəm way na Paska vi yuk di?

¹³ Zezu andək sula suweleŋgit gewleɗ nani, apsit na: Mugul awalaŋ gəla. Wakəlmaŋ sənən ɗəf də hinziwe.

¹⁴ Məsbani adəv gəla an agulu, mə nah sən affən gəla vana: Mərbə zəga amna: Aŋgay gəla naw məs nawzəm way na Paska dit gewleɗ naw di?

¹⁵ Warban sukum gəla an məɓayin, metiŋgini, dit zigeɗ pak məzaɓet adaka, adaki kədawzaɓanən waya.

¹⁶ Gewleɗ nan adoŋko aguloŋguk awalaŋ gəla, arəhənək zəga pak va anahsiti. Azaɓanənək way na Paska.

¹⁷ Adan moskoy agəɗə Zezu adek dit gewleɗ nan klaw kiyit sula neki.

¹⁸ Pay adasoŋ atəki wəzəm waya, Zezu anahsitike: Nəsənək fəkatə, ɗəf taka suwaloŋkum məs dədawzəm way də ina wazəm kiwa.

¹⁹ Assanək makret gewleɗ nani, atəŋgaŋgək wəssohoŋ taka taka: Əntə soko?

²⁰ Zezu azlansitike: Ɗəf taka səmbokum klaw kikum suləŋki: Ɗəf məs dədawgul van sap də in adəv hiluwəŋki.

²¹ Fəkatə Wətən Ɗəf*, wamtə va məver wənnani. Amma bonoy warəh ɗəffan dədawzəm ki Wətən Ɗəffa. Ɗəf nan ɗəɗaah va muwani ɓa.

Way an Salala*

²² Adan adawzəmaŋ, Zezu agəmək dupeŋ, agəɗək soko sən Maŋgəlva, arɗanəka, apsitik gewleɗ nani, apsit na: Aŋka gəba zuwi.

²³ Agəmtək həloŋ na biya net wəleŋɗe, agəɗək soko sən Maŋgəlva, apsitike, asanənək pak sədəvət həloŋku.

²⁴ Zezu anahsitike: Eŋki mbel zuwəŋ ndəɗaŋgəŋ tive nawsleret ɗii də Maŋgəlva azoŋguk viyit ɗii diiɗa.

²⁵ Gesiŋ nədawnah sukum nəsəna ɗaah biya net wəleŋɗe ɓa, say pay nədawsaa meleketen adəv məlĩ na Maŋgəlva.

²⁶ Yaŋ ayaŋ gəlya nawzləra ambataŋ aka gərəm na hereme.

Zezu də Piyer

²⁷ Zezu anah sitik gewleɗ nani: Munokum pak wakəpawəni, wakənzoŋgu, wənnan məverni na: Wanəbay məzutaɗɗa, timeŋgiɗ watrayaŋ atəki pakə.

²⁸ Amma pay nədawsilyaw sətəki əmta wanəmbat dabəŋ kikum a Galile.

²⁹ Piyer apsən na: Ko ɗii pak dəpokuni, naw kam nəpok na ɓa sam.

³⁰ Zezu azlan sənək na: Apprəma gesiŋ nədawnah suko: Ɗəfɗəŋka, pay bazlay adawhəm təl sula, wakənah na kəsənu ɓa təl hoku.

³¹ Amma Piyer anahək də sembe: Ko də dewle wanəmtə di'isi, nənah na vas ɓa. Vaski gewleɗ annahaŋ pakə.

Zezu tay zuli a Getsemane

³² Agapaŋgək atəki məs adawyaŋ na Getsemane, Zezu anah sitik gewleɗ nan na: Məssoŋ aŋka nəmbat wəzuliya.

³³ Yaŋ agəm Piyer də Zak gəm Zaŋ dəndəni. Atəŋgək wəsən geslne də wəkere.

³⁴ Anah sitik gewleɗ nani: Makraw asawəka ha tayəŋgəla wəbaywa. Məssoŋ aŋka məga.

³⁵ Ambatək abe suɗike, akduko fuŋ, azuli sənək Maŋgəlva vi pay na bonoy nan dətoŋ gəni, an va wagəɗə.

³⁶ Amna aw Affu nawa azok na ko mi pak tay tuwãh ɓa. Azargət həloŋ na bonoy kəŋ səzawa. Amma agəɗ va an nəŋgəl ɓa, say va an kəŋglə.

³⁷ Amilik əmpa azet gewleɗ hoku neki, arihik məleŋti. Apsən Piyer na: Simoŋ, əstatə leŋ sa? Kəɓapənna wəgan ko ler taka ɓa sa?

³⁸ Munokum pakə, məga məzuliyə vi kədawguloŋ adəv wərak ɓa. Əmpəs na ɗəf aŋgələk vaska, amma gəɓa zən mədakni.

³⁹ Ambatək əmpa, azuliyək də wən an madabəŋ naka.

⁴⁰ Adan amili arihik tahəŋ wəleŋgeŋ, sin armeninke. Dəsənən va adawzlan sənən ɓa.

⁴¹ Adan ade azet ma hoko'ən, apsit na: Məzuleŋgeŋ, munokum tatə fet sa? Məkki kana pay agapka. Kakaŋ na ɗii mbreyit warmanən Wətən Ɗəffa*.

⁴² Misili, mədamə. Awla ɗəf nawzəm kiyu yaŋ agapka.

Va armanən Zezu

⁴³ Daga Zezu dəɓəl wagrak wəpel nan ɓa, Zudas an taka səmbet gewleɗ klaw kiyit sula adeke. Ɗii diiɗa azoŋguk dəndən, dit kafahiɗi dit zleŋɗe, dayeɗe net məs dəlveŋge na Maŋgəlva dit məsənaŋ zəga na ma henziŋ dit ɗii gugiriɗ net məzaɓaŋ wən disliŋgini.

⁴⁴ Ɗəffan dəŋgəl wəzzan Zezu arban sitik kukete apsit na: Ɗəffan nədasɗan va baynawa, ndəni kərmanən gəni kəkanən gəni kəganən gən lewlewi.

⁴⁵ Adan Zudas agapə, ambatək aza Zezu dabəŋ, apsəna: Mərbə zəga yaŋ aklak van awlani, arəŋ gənək baran də mani.

⁴⁶ Ɗii aɗiyənək vet akani armanənka.

⁴⁷ Amma ɗəf taka suweleŋgit gewleɗ na Zezu aptuwək kafahi nani, abələk məgəɗ wəza na daya net məs dəlveŋge na Maŋgəlva, abələk sləmani.

⁴⁸ Zezu anah sitik ɗiiyi, vi mi kəzoŋ dit kafahiɗ maay zleŋɗe vi karmuwən va kəmna məvoŋ tive nani di?

⁴⁹ Pay pak əntat də munokum əntat wərban sukum zəga adəv gəla metiŋ naw zuliya* ya kərmuwən ɗaah ɓa. Amma agəɗ vas na vi an məverin dəknah gəni.

⁵⁰ Yaŋ gewleɗ pak apanəni anzoŋ.

⁵¹ Gawla maɓɓan asbanək Zezu, tay də godo azan kaaka kəlakə. Yaŋ aŋglaŋ wərmanənni.

⁵² Amma asganək godo, anzanək zən mekeleŋ.

Zezu taya ba kita

⁵³ Yaŋ akanən Zezu ana Ɗəfdaya net mətawaŋ wəla zəga sən Maŋgəlva da, akkalaŋgək adaka dit ɗii net məs dəlveŋge na Maŋgəlva dit məsənaŋ zəga na ma henziŋ gəm məzaɓaŋ wənna dəlva.

⁵⁴ Piyer tayəsbet daga sə faraɗa, aguluk aŋgil anna Ɗəfdaya da net mətawaŋ wəla zəga sən Maŋgəlva, asanək dit gewleɗi, taylu offo.

⁵⁵ Yaŋ ɗii gugiriɗ net məs dəlveŋge, dit məzu slereŋ na dələv pakə, akayaŋgək saydawa aka Zezu, vi kaslban də kita namta. Amma dərəhaŋ ɓa.

⁵⁶ Ɗii diiɗa aɗɗaŋgək saydawa na tepelke aka Zezu, amma met dəsler ɓa.

⁵⁷ Yaŋ ɗii meɓɓet asilyoŋ, aɗɗaŋ saydawa na tepelke, annəhaŋ na:

⁵⁸ Məpprəmək anahək na: Wanəɓzlu gəla metiŋ naw zuliya* məs ɗii arkaŋ də veti, pay hoku wanərka maɓɓani məza də vet ɗii ɓa.

⁵⁹ Amma saydawa net dəsler ɓa'a.

⁶⁰ Ɗəfdaya net mətawaŋ wəla zəga sən Maŋgəlva asilke, aziwik aweleŋgit ɗiiyi, assohonək Zezu. Kəzlan sit na ɗii məzəɗɗaŋ saydawa akokəŋ ɓa sa?

⁶¹ Amma Zezu ɓatɓatə, dəzlan ɓa sam. Yaŋ Ɗəfdaya net mətawaŋ wəla zəga sən Maŋgəlva assohonək əmpa: Is na Messiya* kənan sa, walla Wətən Maŋgəlva* məs də zəzaya?

⁶² Zezu amna əntə, nokum bo wakulanən Wətən Ɗəf* dawsan aka va dəzəŋ na Maŋgəlva, məs dəsən zəga pakə, wakulanən dazan aka slay buwən a disiŋ.

⁶³ Yaŋ daya net məs dəlveŋge angar lukut nani, amna: Wəray tay naw kay saydaweɗ meɓɓet ɓa.

⁶⁴ Kəpprəmənək mbrayen nani. Mbar kənahaŋ kandi? Atawənək kita akani say wəbayən.

⁶⁵ Ɗii meɓɓet atəŋgaŋgək wətuf mifɗe aka Zezu. Asərətənək harani, aslkərənka, yaŋ anahaŋ na: Asəna naway dəslkuruk di? Məzugaŋ agəmənək Zezu arganənək atapaslayən.

Va Piyer anah na dəsən Zezu ɓa

⁶⁶ Ya Piyer taya daŋgla tagay, yaŋ balamək səmbet balemɗe na daya net məs dəlveŋge na Maŋgəlva təde.

⁶⁷ Tulak Piyer taylu offo, təsəŋlanəka, təmna: Nok bo istat də Zezu na Nazaret.

⁶⁸ Amma Piyer azelenək wənnata, amna: Nəsən ɓa, nawsən gabban va kədaŋgəla wənah ɓa. Yaŋ agil appaka. Pay nan bo bazlay ahəmka.

⁶⁹ Balamək tulak əmpa, tənah sitik ɗii məs də ziweŋ adaka: Ɗəffəŋka nan bo səmbeti.

⁷⁰ Piyer azelenək əmpa. Ya dənzi ɓa sam, ɗii məs nadak nek anah sənənək Piyer: Kəɓapna wəbay mana aweleŋgit nan ɓaɓa, vi nok bo ɗəf na Galile kənani.

⁷¹ Yaŋ Piyer atəŋ wənah na: Maŋgəlva dəzawa an wən nədawa. Naw nəsən ɗəf van ɓa.

⁷² Yaŋ ləŋ bazlay ahəmək ma sula'ən. Piyer aɗumonək wən məs Zezu anahsən na: Pay bazlay adawhəm təl sula ni wakənah təl hoku na kəsənu ɓa. Yaŋ agili ahəmka.