Lilegere 20 - ZE'ELEGO PAALEGA

Yuuma Tuhere saŋa

¹ Ti mam nyɛ ti suŋera ze'ele saazuo sigera na, ti a nu'uhen, a zãli la kparehega sɛka en tari kparegera boko seko en boi tiŋa tiŋa ha la, la zɔregɔ kãtɛ.

² Ti a nyɔkɛ bunsɛla la, diimen diimen wɔbekimɔ se'em yu'urɛ en yi'iri Sagena, la Sitaani la, lu' en biŋe yuuma tuhere,

³ dikɛ en lobe bahɛ bilam kpãrɛ en gee li' en lebehe ha, ti a da le nyaŋɛ pã'ahɛ nɛreba, gura ti yuuma tuhere la ta ba'ahɛ. Ŋwana han tole, la dela ba le yu'ɛ en bahɛ na, ti la le iŋɛ fii.

⁴ Ti mam nyɛ na'am kugehi, ti sɛba en zi' si zuto la, ba bo' ba la paŋa ti ba gakera. Mam me nyɛ sɛɛhi en de sɛba ti ba fige ba zuto, ban nam Yezu, gee muula Yinɛ yelehum la zuo. Bama ka lagum pu'uhɛ bunsilemasio la bii a naanɛ la, bii ba to'e a daalehum la ba gbɛ'ɛran bii ba nu'uhen. Ba vo'e me na, dɛna kiinduma, la Kiresta yuuma tuhere la puan.

⁵ (Gee sɛba woo en pun ki la, ka lagum vo'e na sankaŋa puan la, gura ti yuuma tuhere la ta ba'ahɛ. Yia vo'ore en ŋwana)

⁶ Sum, la tuntɔɔnɛ dela sɛba en ta lagum vo'e yia vo'ore la dinɛ. Bana ti kum buyi' la ka le tana la. Gee ba wan dɛna malema duma bo' Yinɛ, la a Kiresta la, gee dɛna kiinduma la en, yuuma tuhere la puan.

Sagena la ba'ahegɔ

⁷ Yuuma tuhere la han ta ba'ahɛ, ba wan bahɛ Sitaani la yehe a paka zi'an la puan na.

⁸ A wan yehe na ti a pã'ahɛ nɛreba en boi timpaberɛ wa luga anaahi wa puan za'a. Gɔg la Magog, la a lagehɛ ba ti ba tɛ' pɛɛma. Ba kãlɛ zo'e mɛ wuu kulaa tintombi'ihego la.

⁹ Ti ba lagehɛ kiŋɛ zom timpaberɛ wa zuɔ la gɔbega, kiŋɛ ta kaaɛ nɛresunduma bɔŋa zi'an la, la tinkãtɛ la mum, gee bugum en ze'ele saazuo na di ba za'a filam.

¹⁰ Ti Sagena se'em en pã'ahɛ ba la, ba lobe eŋa bahɛ la bugum mɔgerɛ la en diti la tahi bugum la puan, zi'an ti bunsilemasio la, la a pumpã'ahum nɔtɔgeha la bɔna la, ti ba bɔna mɛlehegɔ puan bulika la yu'uŋɔ za'a, ka malum tara ba'ahegɔ.

Kum gakerɛ

¹¹ Ti mam nyɛ ti na'am kuka kãtɛ pɛɛlega en ze', ti se'em en zi' ka zuo la, timpaberɛ wa la saazuo wa mɛlum mɛ a nɛŋan ti zi'an ka bɔna bo' ba.

¹² Ti mam nyɛ ti sɛba en ki la, nɛre kãreba la tarenduma, zɛ'a na'am kuka kãtɛ la nɛŋan, ti gɔnɔ lagehɛ, gee ti gɔŋɔ kuyima me lakɛ, gɔŋɔ seko en de vom gɔŋɔ la, ti ba gakɛ sɛba en ki la, doohe la ban tum sɛla wuu lan gulehɛ se'em gɔnɔ la puan la.

¹³ Ti ateko dikɛ sɛba en ki bu puan la tihɛ, ti kum la ki'intiŋa dikɛ sɛba en ki ba puan tihɛ, ti ba gakɛ ba za'a doohe ban tum sɛla la.

¹⁴ Ti ba nyaa lobe kum, la ki'intiŋa bahɛ bugum mɔgerɛ la puan. Kum buyi' zi'an la en bala en de bugum mɔgerɛ la puan la,

¹⁵ ti se'em woo yu'urɛ ti ba ka nyɛ ti de gulehɛ bɔna vom gɔŋɔ la puan la, ba lobe a daana bahɛ la bugum mɔgerɛ la puan.