Yudit 9 - Bible en Guidar

Əkkam nat Yudit

¹ Yudit ŋgom hã mirbizit afuŋ nisi, moŋglo pikpik akata gəm təkos kan zəga səzat ərban lukut na gəlabay məs tugulu, aka pay adawzlaŋ tursan na moskoy a Yerusalem addəv gəla na Maŋgəlva. Təhəm sən Daya də wəlat dayadaya dawnəh na:

² «Daya, Maŋgəlva na afu Simeyoŋ, məs kəɗi masalam ammba vani vi kampəlkiya aket ɗiy-ɗarə, məs dəgəɗ sətən vavyak sət məlməm gbuɓɓo, arbaŋ sətən wili adan aŋgarənək lukut nata, avoŋgətən na gagayə, aɗɗaŋ məs kətak lahəŋka.

³ Vini kəppet deyeɗe net ama əmta gəm məmbəɗeti, zəga nawvoŋ net nak məs arbaŋ sətən wil sət waŋ gbuɓɓo akan naka, aknahək dit mbel neti. Kəbeyik belemɗe amaŋgevet deyeɗe neti gəm deyeɗe tam aket mezeŋgeɗ na məlĩ neti.

⁴ Kəppetik gil net kappoheti, kirtit məguluŋgit kawket aka balamə, məppoheti zəgeɗ net pak ka nawɗak a walaŋgit ɗiy nok məs kəŋgələ, məs mekret adasset vi wən noko, məs dəŋgəmaŋ Dina mbel net tərnokgən ɓa, ayukunək kəbbah sitgini. Aw Maŋgəlva, Maŋgəlva nawa, aprəmwa in məs gagəbaya.

⁵ Vi an dətoŋ farə, an dədawtoŋ kakaŋka də an nazzan abe, istə kəɗɗe; kəɗɗumək aka an naɗɗa kakaŋka, aka an nazzani gəm an dəsan aka əɗɗum nok agəɗəka

⁶ Zəgeɗ məs kəziwgit naɗɗa azzoŋguk ənah sukun na: “Mənam yakəŋkə.” Vi tiveɗ nok pak məzeɓetiŋ səkayə gəm wən an kədawtaw pak kəsənək dafsəni.

⁷ Awle mə Asiriɗe azzoŋguk də gbogboŋgo, tay əkaɓaŋ aka heret pilseŋge gəm aka heret məpeŋgəŋ pilseŋge neti, tahəŋ əɓaygən ki zit ammba gbogboŋ na vet məbayaŋ ɗiyi, aɗiyənək əɗɗum net aka baray, pokoro, bəle gəm məbəŋbəŋga; dəsənnən na Daya məziwgin əgay kənani ɓa.

⁸ Iya nok na Daya. Araygən kəkərtəh net də əɓap noko gəm azan gbogboŋ net də ədagədəv noko; vi aɗiyənək a mekret nawreygit təkiɗe salala noko, karnokon gizlirke nalma də Maŋgəlva a təki iya nok məs də gagdak asani gəm kawpoŋ mohõ təki nawzaɓ-Maŋgəlva nok də təbza.

⁹ Awla əkaɓ neti, aslən ədagədəv nok aketi, ənta gbogboŋ naɗɗa an nəɗɗum naɗɗa in gagəbaya.

¹⁰ Arga balam a maŋgava məlĩ də hərzlumu məmak ɗəfa gəm məlĩ a maŋgava balam nani; aŋzlan əɓay net zigiɗzigiɗiŋ də vat gulku.

¹¹ Vi gbogboŋ nok addəv əŋɗa net ɗiy diyɗa yi ɓa, mãy əɓap nok azet məs gbogboŋɗe iyi ɓa, Maŋgəlva net məvoŋgənən kiyit kənani, məzəbbah sit ɗiy memeɗeŋɗe, məkə wən ammbet ɗiy məddekti, məzuge ɗiy məndolti, məkõhgit ɗiy məs əɗɗum net tay ɓa.

¹² Ha'aw, ha'aw Maŋgəlva na afuwa, Maŋgəlva nawray va Israyel, Daya na disiŋ də na dəlvafuŋ, məs dəzəmiɗ iŋkile, məlĩ na məs kəzəməɗ pakə, aprəm əkkam nawa

¹³ gəm aɗɗa ka əpel naw məmbəɗ ɗəfəŋ dətoŋ səngən gəm dəbeygin ɗiy en dəziwginin wən tatwãh aka wənmiyna noko, gəla nok salala, dadwarki Siyoŋ gəm gəla dəsan avet kirtuko.

¹⁴ Arban sit ɗiy-ɗar pakə gəm sən mahəlfa pak na Maŋgəlva afən əɓap pak gəm afən gbogboŋ pak kənani, ɗəf tay maɓɓan məzuga Israyel abbəruk ɓa.»