Yudit 8 - Bible en Guidar

Yudit tat əkõhgit ɗiyi ( 8:1—14:19 ) Ətoŋ nat Yudit əka wən ammbet mə Yudeɗi

¹ Aka dəpaski gogoyo net vetis agapət Yudit. Wətən Merari tə, wətən Os, wətən Yosef, wətən Uziyel, wətən Elkiya, wətən Ananiyas, wətən Gedeyon, wətən Rafayin, wətən Akitob, wətən Eli, wətən Helkiyas, wətən Eliab, wətən Nataniyel, wətən Selumiyel, wətən Sarasaday wətən Israyel.

² Manase yi zilta, həlfəti gəm məlma taka. Manase məs dəmtə də pay nawtaw hakəmari pepreŋge.

³ Aka adawge məzinanən maŋgav bepbepi a təki məpəlayya, pay armak aka kiyni yaŋ ambat aka zəga nawvoŋgo. Amtə a Betuli walaŋgəla-metiŋ nani, yaŋ məɗiyən addəv magamas net efiŋgiɗin addəv guli dəsan a walaŋ Dotayim də Balamon.

⁴ Yudit təsatək gagəbay əzva hoku də təla poɗo anatda,

⁵ aka təgbalka na gəla nata, təmpək balakə. Tiynanək boɗoko addəv lukut na gəlabaya.

⁶ Təŋ səza əmta na zəlta, tat əɗɗa meme pay pakə, abbər naddaŋ pay naffete gəm pay naffete awaniɓa təlaperi gəm pay naddaŋ na təlaperi, vaska'e pay net əzləreɗi awaniɓa nannek net ɗiy na Israyel.

⁷ Lalawəktə nawsime. Manase zələt apəl sətək meleŋge, təbəz babara, belemɗe mezeŋgleket dit məguluŋgiti, zəgeɗ memeyẽɗi gulyeŋge, tat də arya diyɗa.

⁸ Ɗəf tay nawpel mbərayən akat ɓa, vi tat də geslne na Maŋgəlva diyɗa.

⁹ Əpel mbərayən net ɗiy aka məlĩ tay əgapta, vi ma sleŋsleŋgin aŋgəzlka vi iŋkile tahəŋ ɓa. Əpel məs Oziyas apel sit tam aka asway sit na wappan walaŋgəla-metiŋ ammba vet mə Asiriɗe addəv əvoŋ sle' tay əgap a sləmat Yudit.

¹⁰ Təsləntək ɗak nabat məzərma arya nat pak iye mãy Oziyas, Kabris gəm Karmis ɗiy məsɓet na walaŋgəla-metiŋ nata.

Yudit təgəmək wən nani

¹¹ Agapaŋgək anadda, tənah sit na: Deyeɗe net ɗiy na Betuli məprəmwa, vi əpel məs kəpeleŋ abet ɗiy dəpaŋkəŋ tay moggon ɓa, aka kəswayaŋ də iya na Maŋgəlva gəm də iya nokum kiynanən nappan walaŋgəla-metiŋ ammba vet məzuzelɗe, an Daya dəki əbbah nan addəv əvoŋ sle'əŋ ɓa.

¹² Ya kakaŋ na mədəŋga kənanaŋ mənokum məs kəslanən naza Maŋgəlva dəpaŋka gəm kəziweŋ a gəla Maŋgəlva a walaŋgit ɗiy di?

¹³ Kakaŋ na mənokum tat əsla məlĩ Maŋgəlva, ya zəga tay kədawsənaŋ ɓa hã faɗə.

¹⁴ Vi kərəhnən na kpumkpum na makra ɗəf ɓa gəm kəprəmnən na gabba əsən nan ɓa. Mbarmbar kan kədakkesin naza Maŋgəlva ndən məs dəɗɗa as pakə, kawsən əɗɗum nan gəm kəprəməngən an aziwgin naɗɗa di? Vaski ɓa milmiŋgiɗwa kədawdanən gədəv daya Maŋgəlva nokum ɓa.

¹⁵ Vi an tay də əɗɗum nabbah səm addəv əvoŋ sle'əŋ ɓa, tay də gagdak nawkõhgəmə addəv pay məs aŋgələ awaniɓa nawzam abet məzuzelɗe namə.

¹⁶ Ya kədawgəmaŋ zəga taf bas aka an Daya Maŋgəlva nam aziwgin ɓa, vi Maŋgəlva tay va ɗəf ka kawhãyan ɓa, awaniɓa tay va ɗəf ka dəɓe' səngən an ɗəf adawnah sən ɓa.

¹⁷ Vini də əga əkõh səzan na, məyasəm dəbbah səmgəni, waprəm wəlamə an əŋgla nani.

¹⁸ Vi dəgil aka say nam ɓa, hã dəpaŋka mahəlfa, mazlalwan, zeŋvit ɗiy awaniɓa walaŋgəla-metiŋ tay a walaŋgəm məzəgagdeketin meŋgilveɗ məɗɗe də va ɗəf ɓa, va adaɗɗa lahəŋ ɓa.

¹⁹ Sən aski masalam azim efiŋgiɗmə gəm məppoheti, yaŋ amtaŋ abet məzuzelɗe namə.

²⁰ Ya namə, məsən maŋgəlva maɓɓan abbərən ɓa. Ya məsənək na azeləm na ɓa'a, akkpaŋgan na ulasahã nan gəm əkõh nan səka mazlalwã nan ɓa.

²¹ An məmõhni walaŋgəla-metiŋ namə, walaŋgəla-metiŋ na Yuda pak kawmõhni yi'e, kappõhoni təki salala namə, Maŋgəlva wattokon mbel nam akamə.

²² Waki wən nan akamə an milmiŋgiɗim mə Israyelɗe azaŋka, an məketi aka balamə gəm məzani dələv namə. Waməkkpaŋ belemɗe net ɗiy ɗarə, ɗiy dəskanən wəlam wawləmən də əzelemə, waraməni.

²³ Vi əssa nam aka balam aki na ulasãhã net deyeɗe nam ɓa, ya Daya Maŋgəlva waɗɗa ka ərba wili.

²⁴ Kakaŋ kan na, milmiŋgiɗwa, mərban səm sit milmiŋgiɗim na zeŋgilet na ammba vami, zay na təki salala, na gəla na Maŋgəlva gəm na təki nawzaɓ-Maŋgəlva na akami.

²⁵ Mbəksa aska, məsokon səm Daya Maŋgəlva nam məzusləm va efiŋgiɗmə.

²⁶ Məɗɗumon məs agəɗ də Abraham pakə gəm va asla Isak gəm an dərəh Yakob pak a Mezopotami na Siri, aka adawteɗ gilew na Laban məlmət mani.

²⁷ Vi va asle də ətoŋgit dəka offo vi kawla an na mekreti, vaska'e ampəl na kiya akam ɓa. Ya tay vi karban sit na Daya awpik ɗiy en məzəzzoŋ azani.

²⁸ Oziyas aɓsət na: Addəv an kəpel mokrok takas pak ɗəf tay nawɓoŋ aka əpel nok ɓa.

²⁹ Vi maɗɗula nok na dəpaŋki arbə ɓa, ya təŋ də ətəŋ na zeŋgiloki, ɗiy pak asənənək əsən noko gəm moggon na əɗɗum na mokroko.

³⁰ Ya ɗiy tay əmtaŋ sit meme, yaŋ askanən wəlam məɗɗa va məpel siti gəm məsway də əsway məs məggarna kiyən ɓa.

³¹ Kakaŋ kan na, akkam vimə, vi guluk məgeslne sən Maŋgəlva kənani; Daya waslən buna, waknah vov net iŋkile namə, məddak na sit meme əmpa ɓa.

³² Yudit təɓsit na: Məprəmwa: Wanəgəɗ zəga məs kirtəm pak adaɗɗumonən pay pak hã faɗə.

³³ Dəfɗəŋka, miziw a maddamba na walaŋgəla-metiŋ, wanəgil dət balamək nawa. Tak əvoŋ sle' məs kətawaŋ nappan walaŋgəla-metiŋ ammba vet məzuzelɗe nam adawgapa, Daya wabbah sən Israyel də vawa.

³⁴ Ya nokum, kədattokonən zukum aka məs nədaɗɗa ɓa, vi tay məs nədawnah sukum ɓa hã gap an nədaɗɗa dəgrakgən gərakə.

³⁵ Oziyas dit deyeɗe aɓsətən na: Dok addəv zazaya, Daya Maŋgəlva dəsan aboko vi kampəlkiya aket məzuzelɗe namə.

³⁶ Yaŋ agilyoŋ səddəv gizlirke nat Yudit addoŋ aket wəzeɗe neti.