Markus 15 - Bible en Guidar

Yesu aba Pilat

¹ Təki əddaŋ ləŋgə, deyeɗe net məsdəlveŋge dit ɗiy məsɓeti dit mərbaŋ-mahenziŋ gəm məzaɓaŋ wən baymeti, aslerinik met pakə. Aɓrukunək Yesu, akanənka, apsənənək ava Pilat.

² Pilat assohõnək na: Istə məlĩ net mə Yudeɗ sa? Azlan sənək na: Is kədawnəhən.

³ Deyeɗe net məsdəlveŋge akiyaŋgək dolgoyɗe akan diyɗa.

⁴ Yaŋ Pilat assohõn əmpa dawnəh na: Tay məs kədawzlan ɓa sa? Awle va adawkiyaŋ dolgoyɗe akoko.

⁵ Ya tay an Yesu azlan ɓa, agəɗ sənək Pilat gərəŋgə.

Tay ətawwən wən nawbay Yesu

⁶ Aza əzləra pak na, Pilat awpəl sit məfərsəna taka, ɗəf an məs assohoŋgu.

⁷ Ya ɗəf taka məs adawyaŋ na Barabbas tay a fərsəna dit məsilgənən wəna, vi abayək gəbay aka wən asili.

⁸ Ɗiy asilgininik geŋgere, atəŋgənək əssohon Pilat dəgəɗ sitgən va asərək əɗɗa.

⁹ Pilat azlan sit dawnəh na: Kəŋglaŋ nəppan sukumgən məlĩ net mə Yudeɗ sa?

¹⁰ Vi asənək na, daya net məsdəlveŋge akansənən Yesu na, na kotoroki.

¹¹ Yaŋ deyeɗe net məsdəlveŋge ahhaɗanən vanday, vi dəppan sitgin Barabbas.

¹² Pilat azlan əmpa, aɓsit na: Mi kəŋglaŋ kan nəgəɗgən də ɗəf məs kədawyaŋ na məlĩ net mə Yudeɗ di?

¹³ Aɗiyaŋgək geŋgere əmpa na: Akkpa' aka məzliwrihe!

¹⁴ Pilat assohotik na: Mambray mi agəɗ di? Ya net aɗɗaŋgək geŋgere diyɗa, aɓɗaŋ na: Əkkpa'ən aka məzliwrihe!

¹⁵ Pilat aŋgələk əɗɗa an nanneken zə vanday. Vini appan sit Barabbas, aɗi wən nani, avərənək Yesu, apsitik avet dəkkpa'nəngən aka məzliwrihe.

Məzəlpaŋ tay əmasaŋ aka Yesu

¹⁶ Yaŋ məzəlpaŋ akanənək Yesu a daŋgla na məlĩ da, addəv gəla nawtaw wəna, ayenin məzəlpaŋ pakə.

¹⁷ Aguloŋ sənənək lukut pepreŋge, atroɗinik gedirgeɗi ka mətərkiya, aɗupsənən akani.

¹⁸ Yaŋ atəŋ əsɗanəni: Əsɗoko məlĩ net mə Yudeɗi!

¹⁹ Arganənək aza kiyən də vəlar, atufinik mifɗe akani, akdukun takpreti, appu'oŋguk abani.

²⁰ Adan agrakən əmas akani, agbukunək lukut pepreŋ naka, agul səninik lukutɗe nani. Yaŋ akanən vi kakkpa'ən aka məzliwrihe.

Məkkpa'ni Yesu aka məzliwrihe

²¹ Simoŋ ɗəf na Sirene afən Alekzaŋdər də Rufus, tay ətoŋ dədak əzzan sə gulyo. Yaŋ məzəlpaŋ aɗɗaŋ sənən vavyak dəslangən məzliwrihe na Yesu.

²² Akanənək Yesu a təki məs adawyaŋ na Golgata, va ənəh na «Bəbər kiya».

²³ Yaŋ apsənən mbazla məslahan də zəga tatrah dəsagəni, ya dəŋgəm əsan ɓa.

²⁴ Yaŋ akkpa'nən aka məzliwrihe, awɗeketin lukutɗe nan də əɗɗa vẽpəlu ka kawsən an nawsan sən naway di pakə.

²⁵ Dəpas na də təbəz vaytaki, də mompumo yi akkpa'nən aka məzliwrihe.

²⁶ An mətaw wən akan viyən tay məverin aka zəga vaŋka: Məlĩ net mə Yudeɗi.

²⁷ Akkpa'inik məvoŋgoŋ tive sula a maŋgavani, taka aka van dəzəŋ, taka aka van zlaɓay. [

²⁸ Vaski an məverin addəv Ɗerewel asan gesiŋ, amna: Məŋɗani aweleŋgit ɗiy mbəreyti.]

²⁹ Məzutoŋgoŋ dədak aranənka, aɓlanənək kiyti, aɓɗaŋ na: Iskəŋ naɓzlu Gəla na Maŋgəlva, karkan addəv pay hokuŋ,

³⁰ akõhgən kiyuk kana, aprik səka məzliwriheŋka.

³¹ Vaska'e deyeɗe net məsdəlveŋge amasaŋ a walaŋ zit dit mərbaŋ-mahenziŋ, ənahaŋ na akõhgitik ɗiy meɓɓeti, ya aɓap əkõhgən zən ɓa.

³² Kristu məlĩ net mə Israyelɗe dəprik kakaŋ səka məzliwrihe, mulagəni, mətafgəni. En məkkpe'it dəndən əranəni'e.

Əmta na Yesu

³³ Aka pay ziwi, guzli titir agəɗək aka dələv pak hã gap təbəz hoku na moskoyo.

³⁴ Də təbəz hoku Yesu aŋgəslək vaŋvəla: Eloy, Eloy, lema sabaktani. Va ənəh na: Aw Maŋgəlva nawa, aw Maŋgəlva nawa, vimi kəzgaw frik di?

³⁵ Ɗiy səret en dəziweŋ adak, adan aprəməni, aɓɗaŋ na: Awle tay iya Eliya!

³⁶ Yaŋ ɗəf taka anzani, aguluk gizlete ara mbazla ɓaɓlaka, aslək ama vəlar. Yaŋ atəl sən dəsagəni, amna: Məgasəmə, mulagəni kuzuŋ Eliya wade əprigin soko.

³⁷ Yaŋ Yesu aŋgəsl vaŋvəl dayadaya, abaymani.

³⁸ Gabaga məs mətawan gədəv Gəla na Maŋgəlva aŋgarək sek sula təŋ sə disiŋ hã afuŋ.

³⁹ Daya net məzəlpaŋ səkat tay ziwwe adak haran sek akani, awlak va Yesu amtə, amna: Ɗəfəŋka Wətən Maŋgəlva yi gesiŋ.

⁴⁰ Gil meɓɓet tahəŋ adaka, tay ulanən səka faraɗa. Aret na Miryam mə Magdala, dət Miryam ma Yakob muzliya də Yose gəm Salome.

⁴¹ Məzəzbanən Yesu aka asan a Galile gəm tay əgəɗ sənən wəza. Gil meɓɓet tahəŋ diyɗa məs dəpeŋgeŋ dəndən a Yerusalem.

Məɗiyni Yesu addəv Magamasə

⁴² Səza moskoy agəɗə, adan pay nawzaɓan zəga yi, naddaŋ pay naffete,

⁴³ Yosef na Arimate, adeke. Ɗəf gagdaki aweleŋgit məzaɓaŋ wəna. Nan pak tay əga məlĩ na Maŋgəlva. Armak makrani, aguluk aza Pilat assohõnək kigəbay Yesu.

⁴⁴ Pilat aggətək sawɓa, vi amtə go'u. Ayak Daya net məzəlpaŋ səkat naka, assohonəka, an far amtə.

⁴⁵ Adan Daya net məzəlpaŋ səkat nak aprəman səni, Pilat apsənək tive sən Yosef dəslangən kigəbay Yesu.

⁴⁶ Yosef albahək gabaga, adan aprigin kigəbay nani, atərək də gabaga naka, avoŋgunək addəv magamas məs məso'ən addəv milɓe. Yaŋ akəɗəŋgəl gərəm ama vov naka.

⁴⁷ Miryam mə Magdala dət Miryam ma Yose awlanənək a təki məɗiyni.