Baruk 3 - Bible en Guidar

¹ Daya məlyã, Maŋgəlva na Israyel, də makram gbawgbaw də zəm baybay mədawɓuh mam kəlazoko.

² Daya aprəmmə, awləm sãhə, vi məgəɗək mbərayən azoko.

³ Vi, nok is tat hã faɗə ya nam məzək faɗə!

⁴ Əmpa na, Daya məlyã, Maŋgəlva na Israyel, aprəm əɓuhma net ɗiy mimtit na Israyel, kirtit ɗiy en dəɗɗaŋ mbərayən azoko: dəprəmnən ma Daya Maŋgəlva net ɓa, ndəni əray azbamə

⁵ kəddaɗumon an efiŋgiɗim aɗɗaŋ məza də tiveni ɓaŋ ɓa, ya aka payəŋ na, aɗɗumon gbogboŋ noko gəm aka iya noko,

⁶ vi istə Daya Maŋgəlva namə, waməɗi kiyko Daya!

⁷ Vi aski kəɗi geslne' nok a makramə: vi məyagən iya noko. Waməɗi kiyuk addəv əssuwa balam namə, vi məkkpaŋganək makram səza an efiŋgiɗmə aɗɗaŋ məza də tiveni ɓa, aɗɗaŋ mbərayən azokuŋka.

⁸ Mənam yakəŋ pay dəpaŋ aka balam a təki məs kətərayam ka zəgeɗ na əra mãy na mefɗeke, vi kazga' səm aka an efiŋgiɗim aɗɗaŋ məza də tiveni ɓa pakə, aɗohnən zit səza Daya Maŋgəlva naməŋka.

Addəv əɗi ki maɗɗula ( 3:9—4:4 ) Maɗɗula məzgət kiyən

⁹ Israyel aprəm mahenziŋɗe na zeŋgile; appak sləmoko vi kəyagangən əwelen zəga.

¹⁰ Mi dəgəɗ di ɗiy na Israyel? Vimi kəssoŋ aka dələv net məzuzelɗe di? Vimi kəgalaŋ aka dələv na guw di?

¹¹ Vimi kərnokon zuk dit ɗiy mimtit di, vimi aŋɗokun aret ɗiy məzəddoŋ a təki net mimtit di?

¹² Wasan kəzgə sləma aka slalwãy maɗɗula ɓa.

¹³ Va kəzbanək tive na Maŋgəlva na, wakənzi addəv zazay faɗə.

¹⁴ Akayan na aŋgay əweleŋ zəga di, aŋgay gbogboŋ di, aŋgay əsən di vi kawsən ŋgosa na aŋgaŋ ənziya zeki gəm zeŋgile di, aŋgay əssa nenek gəm zazay di.

Ɗəf tay nalma aza maɗɗula ɓa

¹⁵ Naway dəgap a təki maɗɗula asani mãy dətoŋ a təki əzaɓ nan asan di?

¹⁶ Ŋgaŋ məlyeŋge net dəlveŋge gəm ɗiy desinnin zəgeɗ məmeyẽɗ nawra di?

¹⁷ Ŋgaŋ ɗiy məzusərəkgitiŋ biŋgeɗ na disiŋ di? Ŋgaŋ ɗiy məkkalaŋ təbəz babara gəm meleŋge məza meŋge nan ɓa məs ɗiy adawɗinən əɗɗum net pak akanəŋ di?

¹⁸ Ŋgaŋ ɗiy məhəsən təbəz babar əzaɓaŋ zəga va aza əɗɗum netiŋ di? Ndəɗaŋ məs wəza net aday ki əɗɗum na ɗəfəŋ di?

¹⁹ Məzeti, məddikti aret ɗiy məmtiti, ɗiy meɓɓetiŋ dəgəmən gəleti.

²⁰ Muway gewleɗ mədayaŋ kiyiti, assoŋguk də gəla aka dəlva ya dəsənnən tive na əsən ɓa,

²¹ dəsənnən tiven va adawrəhnən ɓa, dəzgaŋ sləma akan ɓa; kirin azaraŋgək səket tiveɗ net efiŋgiɗti.

²² A Kana'an məprəm ɓa, a Teman mulani ɓa;

²³ kirtət Agar məzukayanən əsən naka dəlva daydayə, ɗiy məmanən vet na Meran mãy na Teman, ɗiy mənahaŋ mambamamba mãy ɗiy məkayaŋ əsən pak dəsənnən tive na maɗɗula ɓa, tiveɗ nan azzoŋ aket ɓa.

²⁴ Aw Israyel, gəla na Maŋgəlva memetiŋgaɓ ɓa, təki nan slosloprokkaɓ ɓa!

²⁵ Metiŋgini meŋge nan tay ɓa, məɓayni awsla ɓa!

²⁶ Adaki məwel dogomɗe en də ətəŋ nan neki, məɓeyit sawɓa gəm məskokoneɗ nawgaya.

²⁷ Eneti Maŋgəlva awel ɓa, siti arban sit tive na əsən ɓa;

²⁸ azaŋka, vi dəsənaŋ əkoson gabba zəga ɓa; azaŋgək sən əɗɗum tay aket ɓa;

²⁹ naway dəpeŋ a disiŋ dərma vi kawpirikgin səddəv slaybuwən di?

³⁰ Naway dəl balsən pehe, dəraha, dəlbah də meleŋge na sləma di?

³¹ Dəf tay dəsən tive nan ɓa, ɗəf tay dədaŋgla əzban tive nan ɓa.

Maɗɗula na, əvəl məs Maŋgəlva aɗi ta' vi Israyel iyi

³² Ya Maŋgəlva dəsən zəga pak asənka, də əsən nan arəha; azaɓanək dəlvafuŋ dəsangən faɗə, aknəh dit zəgeɗ memeyẽɗi;

³³ aslənək əkeɗeɗe'e ambatka; ayaka: tay əprəm man də əkkere;

³⁴ ŋgərzlet tay əwiɗeŋ a gəlet zit neki;

³⁵ ayeke, azlanənək na: Mənam yakəŋkə! Ewiɗeŋgək də əbabyakan zit sən məs dəzəmiɗe.

³⁶ Ndəni Maŋgəlva namə, tay mbərən nawsla dəndən ɓa.

³⁷ Arəhək tive nadda aza əsən pakə, yaŋ arban sənək Yakob gawla nani gəm sən Israyel baynan na makrani.

³⁸ Siske məɗiyən aka dəlvafuŋ asan a waleŋgit ɗiyi.