2Alabaraɗe Də Mabərkiziti 6 - Bible en Guidar

¹ Yaŋ Salomoŋ amna: «Yawe amna wasan addəv guzli titire.

² Ya naw nərkə sukuk gəla nassa ɗayɗayə, kəsokgən addəvən ka faɗə!»

Əpel nawpesl Gəla na Maŋgəlva

³ Yaŋ məlĩ akkpaŋgan haran aka əsap net mə Israyelɗe məkkelit baymet ziwziwi, afet aketi.

⁴ Amna: «In tat əgəɗ sən soko sən Yawe, Maŋgəlva na Israyel məs dəpel də man sən afu Davit, yaŋ aknahan an apeli.

⁵ “Təŋ səza pay nəgilgit ɗiy naw sə Eziptə, nəwel ɗah walaŋgəla temme səret walaŋgəleɗe na Israyel, narka Gəla na Maŋgəlva, vi nərbangən kiyzu adak ɓa. Nəwel ɗəf temme dəsangən məlĩ na Israyel, aket ɗiy naw ɓa'e.

⁶ Ya nəwelik Yerusalem, ka iya naw dəsangən adaka gəm nəwelik Davit dəsangən aket ɗiy naw mə Israyelɗe.”

⁷ Ya afu Davit aynanək a makran narka gəla sən Yawe Maŋgəlva na Israyel.

⁸ Yawe aɓsən afu Davit na: “Adan kərmak a mokrok narka gəla aka iya naw na, kəgəɗək moggoni, vi sə mokroki.

⁹ Ya kan hara na, istə narka gəla van ɓa, wətuk an dəgil sədduvuk dədarka gəla aka iya naw vani.”

¹⁰ Yawe aknahanək əpel an apeli: Nəsawək aka mazaŋga na məlĩ a Israyel a gəla afu Davit va Yawe anahə, yaŋ nərka gəla aka iya na Yawe Maŋgəlva na Israyel.

¹¹ Nəɗiyək akoti məs wənmiyna na Yawe aziwgin dit mə Israyelɗe asan addəvnəŋ adaka.»

Salomoŋ tay əkkam na paya

¹² Salomoŋ tek ziw aba matuya na Yawe, haran sek aka ŋgboŋ net mə Israyelɗe pakə, aslan van sulagən a disiŋ.

¹³ Salomoŋ azaɓək zəga nawziw nawtəl ma akan na təbəz pepreŋ, aɗi addak adaŋgla; zezek nan metir sula də wəɗakə, slosloprok nan pak metir sula də wəɗakə, əɓay nan tam metir taka də wəɗakə. Salomoŋ adak peŋ, də matakpran gbuduk aba ŋgboŋ net mə Israyelɗe pakə; aslan van sulagən a disiŋ

¹⁴ yaŋ amna: Yawe, Maŋgəlva na Israyel, Maŋgəlva tay va is a disiŋ də aka dəlvafuŋ pak məzərma wənmiyna gəm moggon viyit məɗɗaŋ wəza nan məzədawaŋ aban də mekret taka ɓa.

¹⁵ Kədawək aka an kəpel sən gawla nok afu Davit. Vaski, məs kənah sən də mok pak, kəɗɗak də vok va dəpaŋkəŋka.

¹⁶ Ya, yaŋ na, Yawe Maŋgəlva na Israyel, aɗɗa an kəpel sən afu Davit gawla noko, aka an kəpel sən dawnəh na: Ɗəf nok abew na dawsan aka mazaŋga na məlĩ a Israyel abaw an kirtuk azlgaŋgək sləma aka ədaw net də əɓe' sən mahenziŋ naw va kədaw abawa ɓa.

¹⁷ Gəgaŋ na, Yawe Maŋgəlva na Israyel, asɓan əpel nok an kəpel ammba gawla nok Davit!

¹⁸ Kaŋna, ya kpak Maŋgəlva wasan də gəla aweleŋgit ɗiy aka dəlvafuŋ sa? Adan disiŋ də disiŋ an balsən disiŋ atafəkun na ɓa! Gəla nərkəŋ nawtafuk dərəŋ sa.

¹⁹ Apak sləmok ammba əkkam də əɓuhma na gawla noko, Yawe, Maŋgəlva nawa, kəprəmgən əhəm də əkkam məs gawla nok adakkamokuŋka.

²⁰ Horok dəsan sekke aka gəlaŋ dəfəɗ də kapay pakə, a təki məs kənah nawɗi iya nok adaka, kaprəm əkkam na gawla nok adakkamok sədakəŋka.

²¹ Aprem əkkam na gawla nok də an net ɗiy nok mə Israyelɗe, dədakkamaŋ heret sek dəka təkiyəŋka. Kəprəmgən sə təki kəsok hã sə disiŋ, kəprəmgəni, kəvvuyon sitgini.

²² An ɗəf araygən sənək meggeni, an akiyək dolgoy naswaygəni, an adek əsway aba matuya nok addəv gəlaŋ na,

²³ Nok kəprəmgən hã sə disiŋ, kədawsok ɓatɓat ɓa, kətawgən wən naweleŋgit gewleɗ noko, də əmndagan mambray na məs mambray akani gəm kawgəɗ sən ɗəf təstəs aza təstəs nani.

²⁴ An meseŋgiɗit ɗiy nok mə Israyelɗe askanənək wəlet vi aɗɗaŋ mambray akoko, an amilyoŋko, agagdakanənək iya noko, akkamaŋgək də əɓuh met abok addəv gəlaŋka,

²⁵ asna nok kəprəmgən hã sə disiŋ, kəvvuyongən mambray net ɗiy nok mə Israyelɗe, kəmndegetgin aka dələv məs kəpsit anet dit efiŋgiɗti.

²⁶ Pay disiŋ amsə, buwən awzi ɓa, vi mə Israyelɗe aɗɗaŋgək mambray akoko, an tay əkkamaŋ heret sek dəka təkiyəŋka, an tay əgagdakanən iya noko, amilyoŋguk səka mambray net vi kəsər meti,

²⁷ Nok kəprəmgən sə disiŋ, kəvvuyongən mambray net məɗɗaŋ wəza nok ɗiy nok mə Israyelɗe, vi wakərban sit tive moggon məs adawdawaŋ akani, kəzigən buwən aka dələv nok məs kəpsit ɗiy nok ka neti.

²⁸ Paysən may agəɗ aka dəlva, awaniɓa gəbaymərma, doŋgoyoŋ, muŋgusu, an zaray may deberzeɗek azziyaŋka, an meseŋgiɗit mə Israyelɗe asərŋgəslənək walaŋgəleɗe gugriɗ naka dələv neti, əray awandi də gbəgba awandi pakə,

²⁹ əkkam də əɓuhma awandi pak məs dəsil səza ɗəfa awaniɓa əkkal net ɗiy nok mə Israyelɗe, an naway pak asənək əray də əzəmsahã nani, atələk van dəka gəlaŋka,

³⁰ nok kəprəmgən hã sə disiŋ, sə təki kəsoko, kəvvuyongəni, kəfaɗ səngən ɗəf pak aza ədaw nani, vi kəsənək makrani, vi istə kaka kəsən makra ɗəf titire.

³¹ Vasna wageslne'eŋ sukuni, pay ənziya egge net aka dələv məs kəpsit efiŋgiɗti, wadawaŋ aka tive nok pay pakə.

³² An malaka, zeŋvit ɗiy nok mə Israyelɗe yi ɓa, səka dələv faraɗa, dəka aprəm əpel aka gagdak na iya noko, va gbogboŋ noko gəm vok təlla, yas ade əkkam addəv gəlaŋka,

³³ nok kəprəmgən hã sə disiŋ, hã sə təki məs kəsoko, kəzlangən va malaka assohõko, vi ɗiy naka dələvfuŋ pak dəsənnəngən iya noko, dəgeslne'eŋ sukungən va ɗiy nok mə Israyelɗe gəm dəsəngən na iya nok tay iya aka gəla məs nərkəŋka.

³⁴ Paysən ɗiy nok agilyoŋ dəka tive nok məs kəslin kawgay dit meseŋgiɗti, an tay əkkamokun heret sek dəka walaŋgəla-metiŋ məs kəweli, dəka gəla məs nərkə aka iya nokəŋka,

³⁵ nok kəprəmgən əkkam də əɓuhma net hã disiŋ, kəɗɗa sitgən an dəslə azeti.

³⁶ Pay aɗɗaŋ mambray akoko, vi ɗəf tay məza aɗɗa mambray ɓa ɓa, an kədək gədəv aket kəppeti ammba va məzuzelti yas ake aka balamə aka dələv faraɗa awaniɓa go'o,

³⁷ an səka dələv məs assoŋ belemɗe, mekret akkpaŋka, aɗiyaŋgək marava, aɓuhunək met suk aka dələv na balam net dawnəh na: məgəɗək mbərayən, məgəɗək heslepe, məraygənəka.

³⁸ An amndoŋguk azok də mekret taka, də zeŋgilet pak aka dələv akki məket balam, an akkamaŋgək heret dəka dələv məs kipsit efiŋgiɗti, dəka walaŋgəla məs kəweli, dəka gəla məs nərkə aka iya nokuŋka,

³⁹ nok kəprəmgən əkkam də əɓuhma net hã sə disiŋ, hã sə təki kəsoko, kəɗɗa sitgən an dəslə azeti.

⁴⁰ Kakaŋ na, Maŋgəlva nawa, horok dəsan kollo gəm sləmok pakka ammba əkkam na təkiyəŋka.

⁴¹ Yaŋ na, Yawe Maŋgəlva, asil ade a təki naffet noko, is dəndə akoti məs gbogboŋ nok asan addəvni. Məsdəlveŋge nok dugulun əkõh azeti, məzəprəmən mok dəssoŋ addəv ənnek sən zazaya.

⁴² Yawe Maŋgəlva, kəzargən horok səka məpesle nok ɓa. Aɗɗumon moggon na gawla nok Davit.