ESAII 1 - Kalata Ko SƆ̧ DC

KUTI MƆ ZAŊ KALATA KO ESAII (Zɔk 1—39 )

¹ Mɔ nɛ Esaii bem ko Amɔs zɔka tɛ hɔɔ-zu nɛ Sɔ̧ hɔɔ ha̧ a̧ zu Juda in Jerusalɛm ŋgimbi ko o wannu Ozias, Yotam, Ahaz in Ezɛkias nɛ ɔɔ so wan zu Juda nɛ mɔ'ɔ.

Sɔ̧ tɔ̧ɔ̧ ŋga wen zu dukbíí kɔ‘i

² Yiwese a̧ zii, ɓɛɛ nu a̧ yeŋ zer tɛ wen nɛ GASA WAN tɛ tɔ̧‘i. Gba̧a̧ wen-aa nɛ mɔ'ɔ: «Mi daia o bem gasi kaɗi, ɓɛɛ nɛ mɔ'ɔ nɛ wa zika tɛ tɛ́ɛ̀ de ŋgazu in am.

³ Ndai iŋa wan kɔ‘i, tuifuu mbɛt iŋa fara nɛ wan-dai-a a nyɔŋmɔ sɛnɛ ha̧ a̧, ɓɛɛ Israɛl iŋ wan kɔ‘i na; dukbíí kɔ‘m zii mɔ na.»

⁴ Bɔnɛ a̧a̧ zu'nɛ́, ɛnɛ o tugun bíí de ɗaŋmɔ; yí-tom k’ɛ́nɛ́ nɛ gbɛɛ zu, ɔr nɛ o bíí nyɔŋ nɛ mɔ er-wa sɔɔ gee! GASA WAN nɛ duk nɛ Sa̧a̧ Wi ko Israɛl, nɛ mɔ'ɔ nɛ wa ea a̧ duk, e a̧ tɛ geemɔ, ɓɛɛ zik ɗoŋ e ha̧ a̧.

⁵ Ɛnɛ o yaa-ŋgazu nɔ'ɔ, gè tɛ‘nɛ́ ge a'i tɛ gusi ɓɔ ge? Wen zu'nɛ́ kpee nɛ da̧i̧, ŋgai bo yí-see'nɛ́ ɓɔna.

⁶ Nɛ̀ naŋ‘nɛ́ hɔ nɛnɛ bɛɗɛ zu'nɛ́ mɛ, ŋma oi tɛ‘nɛ́ duk na, kana nɛ da̧i̧ in o mɔ nɛ sui tɛ‘nɛ́ fok nɛnɛ nɛ mam in o gba-da̧i̧. Wi fɔr yi da̧i̧‘i na; wi hɛr na, kà bó nɛ̀ aa nɔ̧́ sɛnɛ na mbɛt.

⁷ Nu k’ɛ́nɛ́ kifa bɛɛ-oi, o ye k’ɛ́nɛ́ bia wee. O gɛnɛ ɗaŋa nu k’ɛ́nɛ́ ɓɔn gbaayí‘nɛ́, gɔni bíí ɗaŋa nu k’ɛ́nɛ́ kifi geemɔ;

⁸ ɓɛɛ ye Jerusalɛm tɛ duk hee ŋma be tua-pɛm-mɔ sɛn kpɛɛfɔ-nyak-dɔ̧ɔ̧ ga, kóó hee ŋma gbáksák sɛn kpɛɛfɔ-gala ga; a̧ tɛ duk hee ŋma ye nɛ biro kɛra ga.

⁹ Kà GASA WAN nɛ̀ a̧a̧ nɛ ŋgayamɔ lɛŋ nɛ́ kpasa so o ŋma bíí na, ɛɛ tɛ̀ɛ́ hɔ ŋmaa in o bíí Sɔdɔm in Gɔmɔr.

¹⁰ Ɛ̀nɛ̀ zíí wen ko GASA WAN, ɛnɛ o gasawi Sɔdɔm; ɛ̀nɛ̀ yeŋ zer'nɛ́ tɛ usamɔ ko Sɔ̧ k’ɛɛ, ɛnɛ o bíí Gɔmɔr.

¹¹ Wen nɛ GASA WAN tɔ̧ nɛ mɔ'ɔ: «Ŋma demɔ n'am kpa tɛ zɔm ɗafa-sɔ̧ k’ɛ́nɛ́ bo na. O kpoo vala gbadua in nɔ be ndai k’ɛ́nɛ́ ŋgia'm kaɗi; tɔk wiwii-ndai k’ɛ́nɛ́, ká bá nɛ̀ tɔk o sami in o gbadua k’ɛ́nɛ́ de tɛ‘m ɓɔna.

¹² Ɛnɛ o wi nɛ de ɓɛɛ tɛɛ tɛ‘m’ɛ, nɛ o'o saa'nɛ́ mɛ tɛɛ i̧si̧ nú-zala Tua kɔ‘m nɛ naŋ‘nɛ́ o?

¹³ Ɛ̀nɛ̀ káɗí baa kokoɗo ha̧a̧mɔ k’ɛ́nɛ́ tɛnɛ ha̧‘m; zi-wee ha̧a̧mɔ k’ɛ́nɛ́‘i de tɛ‘m na. Gbaŋa mbe yí-zɛ, o wese-ɔm-tɛ in o gasa wese-mɔi̧a-a, ká bá nɛ̀ o wese-ɓɔɔ-mɔ k’ɛ́nɛ́, mi kɔ̧ ɓɔna mbɛt.

¹⁴ Mi sɛna o gbaŋa mbe yí-zɛ in o wora-sɔ̧ k’ɛ́nɛ́, tɛ‘m mbɔia tɛ mɔ‘i kaɗi!

¹⁵ Ŋgimbi n’ɛnɛ nyɛi̧ er'nɛ́ si ŋgɔn wor nɛ‘m, ɓɛɛ mi wɛra yí‘m si mgbɔɔr; ɛ́nɛ́ kɔfa Sɔ̧ bó nɛ́ mɔɔ-tɔ̧-na, ɓɛɛ mi zii na, wen er'nɛ́ duna nɛ tɔk.

¹⁶ Ɛ̀nɛ̀ zúi tɛ‘nɛ́ ɓɛɛ ɛ̀nɛ̀ ɗáfí war-tɛ‘nɛ́. Ɛ̀nɛ̀ bá ɗaŋ deemɔ k’ɛ́nɛ́ yinɛ yí‘m; ɓɛɛ ɛ̀nɛ̀ káɗí dee ɗaŋmɔ!

¹⁷ Ɛ̀nɛ̀ yámbí dee demɔ, ɛ̀nɛ̀ kíí mɛ de mɔ nɛ yuwar-a; ɛ̀nɛ̀ gbák o wi nɛ bíí de ŋgamɔ nɛ saka-yí in wa, ɓɛɛ ɛ̀nɛ̀ dé mɔ nɛ yuwar-a in o be-oi; ɛ̀nɛ̀ yé ɗoŋ o ko-gera.

¹⁸ Ɛ̀nɛ̀ tɛ́ ɛ̀ɛ̀ bá keta ɛɛ zɔk, GASA WAN a̧ tɔ̧. Kà o ɗaŋmɔ k’ɛ́nɛ́ gbɛ̧ kerere, wa tɛ fɛŋ hee ɓɔrɔ ga; kà wa nɛ gbɛ̧ɛ̧ hee tɔk ga, wa tɛ fɛŋ ndáká-ndáká hee talum ga.

¹⁹ K’ɛ̀nɛ̀ kɔ̧ mɛ mbo zu ha̧‘m, ɓɛɛ ɛnɛ tɛ nyɔŋ o gba de nyɔnɔ tɛ nu k’ɛ́nɛ́;

²⁰ ɓɛɛ k’ɛ̀nɛ̀ ɓɔn tɛ dee ŋgazu, gba-paa tɛ gɔm'nɛ́ a nu.» Nɛ́ GASA WAN a̧ tɔ̧ wen’ɛ.

Bura war-tɛ ye Jerusalɛm

²¹ Siɔŋ nɛ̀ duka so nɛ́ ŋma ko-mbo-zu, nɛ mɔ'ɔ nɛ kifa nɛ ɗaŋ-a hee kó-de-mɔ nɛ mbɔɗɔnu ga. Kasa heembea in deemɔ nɛ yuwar-a duka so tɛ ye'i, ɓɛɛ kinii nɛ o wi-gbɛ-zu a̧ ɔɔ wan sɛnɛ.

²² Bu-mbɔi kɔ-mɛ kifa nɛ duia-yì; gba de dɔ̧ɔ̧ kɔ-mɛ gɔna yì.

²³ O gasawi kɔ-mɛ nɛ o wi-ŋgazu, wa nɛ o gbama-yari ko o wi-zuzu. Wa kɔ̧ɔ̧ mɛ kpa nɛ mɔ er o bíí; wa de demɔ nɛ yuwar-a in o be-oi na, ɓɛɛ wa ye ɗoŋ o ko-gera na mbɛt.

²⁴ Nɛ mɔ‘i a̧ dee ha̧ GASA WAN Sɔ̧ nɛ a̧a̧ nɛ ŋgayamɔ lɛŋ, ŋga-wi ko Israɛl mɛ tɔ̧‘e: «Bɔnɛ tɛ tik zu o wi-kur-zu'm, mi tɛ kifi er-am ha̧ wa ɓɛɛ sɛka see-am ga̧a̧.

²⁵ Mɛ tɛ zɔk bɔnɛ er-am; mi tɛ dɔ mɛ tɛ wee dɔra hee mɔ'ɔ nɛ‘i dɔ nɛ kpáná-wii wen ha̧ ndiŋmɔ mɛ kɔ̧ a̧ mɛ bìì wee nɛ sa̧a̧-a̧'ɛ ga.

²⁶ Mi tɛ de ha̧ o wi-gɔn-kita kɔ-mɛ, mɛ duk nɛ de-a hee kuti-a ga; mi tɛ de kalemɔ‘i in o wi-tɔ̧-mbɔrɔ kɔ-mɛ mbɛt, ɓɛɛ nɛ́ tɛ ŋgimbi'i a̧ wa tɛ sa nɛ mɛ‘e: ‹Ye-mbo-zu› in ‹Ye-de-mɔ nɛ yuwar-a.› »

²⁷ Siɔŋ tɛ kpasi tɛ deemɔ nɛ yuwar-a, ɓɛɛ o wi-gbar-ɗaŋmɔ tɛ kpasi wen deemɔ nɛ yuwar-a mbɛt.

²⁸ O wi-ŋgazu in o wi-de-ɗaŋmɔ tɛ kum gbuɗuk lɛŋ, ɓɛɛ o wi bɛ̧ GASA WAN tɛ yambali.

²⁹ Nɛ mbetɛ, ɛnɛ o bíí-gasi o gasa te, búù tɛ ba'nɛ́ zu o te nɛ see'nɛ́ duk sɛnɛ‘i; ɓɛɛ foe tɛ ba'nɛ́ zu o fɔ n’ɛnɛ hoka nɛ ɔr'nɛ́‘i mbɛt.

³⁰ Ɛnɛ tɛ duk hee ŋma gasa te nɛ wa̧a̧-a̧ aia a nu ga, ɛnɛ tɛ hɔ ŋmaa in ŋma fɔ nɛ yi bo sɛnɛ ɓɔna mbɛt.

³¹ Ŋga bíí tɛ kifi de geemɔ; o tom kɔ̧-a̧ tɛ duk hee fu̧u̧-wee ga, ɓɛɛ wa yiitoo lɛŋ tɛ bìì wee, ɓɛɛ bíí nɛ tɛ bi wee'i bo na.