ABDIAS 1 - Kalata Ko SƆ̧ DC

¹ Ɛ̧ɛ̧ nɛ hɔɔ-zu nɛ GASA WAN hɔɔ ha̧ Abdias, tɔ̧ nɛ ŋga wen a zu dukbíí Edɔm. Tom nɛ tɛ̀ɛ́ nɛ tɛ GASA WAN, nɛ ŋma betom baa tɛnɛ ha̧ o tugun bíí n’ɛɛ zia nɛ mɔ'ɔ: «Ɛ̀nɛ̀ kúr ɛ̀nɛ̀ tík ye Edɔm nɛ biro!

GASA WAN tɛ usi bɔnɛ ha̧ Edɔm

² Edɔm, mi tɛ de ha̧ mɛ mɛ duk nɛ ziɓa-wi mgbara o tugun bíí lɛŋ; o bíí tɛ zɔk mɛ hee geemɔ ga.

³ Nɛ́ ŋmaŋa-tɛ kɔ-mɛ a̧ ɔra mɛ, mɛ wi ɔ kɔ̧ ta’ɛ. Mɛ́ nɛ̀ ɔ nɛ zu o gasa kaya, ɓɛɛ nɛ̀ ta nɛ kɔ̧ see-mɛ‘e, nɛ́ o'o tɛ fo wi pi̧ mbɔɗɔnu o nde’ɛ.

⁴ Kóó mɛ bu̧i̧a so nɛ kusa-a hee zua ga, ha̧ mɛ mɛ e yaa kɔ-mɛ mgbara o sɔra ŋgɔn mɛ, mi tɛ fo mɛ pi̧ mbɔɗɔnu. Nɛ GASA WAN a̧ tɔ̧ wen’ɛ.

⁵ Kà o wi-zu̧zu̧ nɛ ɓar mɔ er-wi mɛ zɛ tɛ tɛ kɔ-mɛ, kà mɛ̀ fo tɛ-mɛ na, ɓɛɛ bó nɛ wa tɛ kai mɔ nyɛm wa na nde? Kà o wi ɓi waya-nyak-dɔ̧ɔ̧ tɛ kpɛɛfɔ kɔ-mɛ, wa beka ɓi waya-nyak-dɔ̧ɔ̧ ɓɛɛ wa ee be oi-aa ha̧ mɛ na nde?

⁶ Ɓɛɛ ho! Wa sara mɔ ko o bezaŋ Esau kpáŋgálá kpáŋgálá; o mbɔi kɔ-wa nɛ hu̧sa̧ so aa zan.

⁷ Wa ndaka'nɛ́ tɛ nu k’ɛ́nɛ́ yinɛ; o wi-yor-ɗoŋ‘nɛ́ tɛ biro ɔr nɛ ɛnɛ. O sɛm k’ɛ́nɛ́ e nɛ ɗɔra tɛ‘nɛ́; o wi nɛ nyɔŋa so mɔ in'nɛ̀ɛ́ pi̧ nɛ ndɔra h’ɛ́nɛ́ tɔ̧ nɛnɛ‘e, ‹Ɛnɛ iŋ mɔ ɓɔna.›

⁸ Bo nɛ wese nyimsea kɔ‘m'i, mi tɛ ɗaŋ o wi-iŋ-mgbara-mɔ sɛn Edɔm in o wi-iŋ-mɔ sɛn zu kaya ko Esau na nde? Nɛ GASA WAN a̧ tɔ̧ wen’ɛ.

⁹ Ye Teman, tɛ o ŋgaŋa-wi kɔ-mɛ tɛ nak, ɓɛɛ o bíí tɛ kum zu kaya ko Esau mbɔlɔlɔ.

Gba̧a̧ bɔnɛ ko Edɔm

¹⁰ «Ɛnɛ fee ɓɔn sɔɔ, ziimɔ baa'nɛ, wen zu ŋgamɔ n’ɛnɛ dee so in o nya'nɛ́ bezaŋ Jakob.

¹¹ Wese nɛ o gɔni bíí kaia nɛ o mbɔi ko Jerusalɛm lɛŋ, ɛnɛ yaa hi̧i̧ zɔk nɛnɛ. Ŋgimbi nɛ o wisɛn yee nɛnɛ nu garo pi̧ nɛ tani kɛ̧ nɛ Jerusalɛm, ɛnɛ mbɛt, ɛnɛ duka hee o ŋma wi nɔ‘i ga.

¹² Edɔm, ká mɛ kpa desee zu mɔ nɛ hɔɔ zu nya-mɛ na; ká mɛ kpa desee wen ŋgamɔ nɛ kpaa a̧ na. Ká mɛ kpa desee zu o be Juda wese yɔa-a kɔ-wa na; ká mɛ da̧ wa ŋgimbi ŋga bɔnɛ kɔ-wa na.

¹³ Ká mɛ ye tɛ o ye ko dukbíí kɔ‘m wese tika-a kɔ-wa na; ká mɛ de nyɛŋɛ wese bɔnɛ kɔ-wa na; ká mɛ pi̧ er-mɛ tɛ kpaamɔ kɔ-wa wese tika-a kɔ-wa na.

¹⁴ Ká mɛ yor sasa-war mɛ gbɛ o wi-yu-mɔ yak na; ká mɛ kai o wi-yu-mɔ a er o wisɛn ŋgimbi ŋga bɔnɛ‘i na.»

GASA WAN tɛ gɔn kita zu o tugun bíí

¹⁵ «Nɛ mbetɛ wese ko GASA WAN hɛɗa kaɗi; mɛ̀ nɛ́ wese nɛ tɛ nasi o tugun bíí lɛŋ. Ye Edɔm, mi tɛ de mɔ in mɛɛ hee mɔ'ɔ nɛ mɛ dee so in o ŋma bíí ga; o tom kɔ-mɛ tɛ tik kana zu mɛ.

¹⁶ «Ɛnɛ o be Israɛl, hee mɔ'ɔ n’ɛnɛ nɔɔ so be tasi nyimsea kɔ‘m zu sa̧a̧ kaya kɔ‘m ga, o tugun bíí lɛŋ tɛ nɔ kana hegɔ, wa beka ɔm na. Wa tɛ nɔ be tasi'i gbɛ nɛnɛ; wa tɛ kum ɓɔn sɔɔ hee bo nɛ wi koo so wa koo ga na.»

Gbina-biro ko o be Israɛl

¹⁷ «O wi nɛ mɔ hɔɔ yɔɔ zu wa tɛ hu̧si zu kaya Siɔŋ, ɓɛɛ Siɔŋ kifa nɛ sa̧a̧ kaya woyo. O bíí ko Jakob tɛ ba nu kɔ‘i, er o wi nɛ baa so nu er-wa.

¹⁸ O bíí ko Jakob tɛ kifi nɛ́ wee; o bíí ko Jozɛf tɛ kifi nɛ́ leɓe-wee, ɓɛɛ o bíí ko Esau kifa kɔ‘i nɛ́ yuɗu. O bíí ko Jakob in o bíí ko Jozɛf tɛ dɔ wa a nu, ŋma bíí kpɔk beka ɓɔn kpasa ha̧ Esau na. Nɛ GASA WAN a̧ tɔ̧ɔ̧ hegɔ.»

¹⁹ O be Juda nɛ ká̧-zan-mɛ́-ɗɔɔ tɛ ba kaya ko Esau, o wi ká̧ naŋ kaya tɛ ba nu ko o be Filistii; o be Israɛl tɛ ba nu ko be Efraim in nu ko o be Samarii, ɓɛɛ o bíí ko Bɛnjamin baa kɔ‘i nɛ nu Galad.

²⁰ O wi-biro nɛ wa kaia so yaknɛ nɛ bara-biro tɛ ba nu Kanaŋ hɔ sɛn Sarɛpta. O wi nɛ wa kaia so nɛ bara-biro yaknɛ sɛn Jerusalɛm nɛ ya sɛn Sɛfarad tɛ ba kɔ-wa nɛ o ye Juda nɛ ká̧-zan-mɛ́-ɗɔɔ.

²¹ O wi-gbin-biro ko Israɛl tɛ daŋ si zu kaya Siɔŋ mɛ duk hi̧i̧ ɔ nɛ wan zu kaya ko Esau, ɓɛɛ nɛ́ GASA WAN a̧ tɛ ɔ wan!