Matiye 28 - Bible en Guidar

Əsilye səka əmta gəm ərba na Daya ( 28:1-20 ) Əsilye na Yesu səka əmta

¹ Dərɓaga pay naffete, də mompumo na pay maddaabəŋ na lumu taka, Miryam mə Magdala gəm Miryam maɓɓat addoŋguk ula magamasə.

² Yaŋ dələv aɓələk diyɗa, maslay na Daya prik sə disiŋ, pay gərəm kəɗəŋgəl sə ma magamasə, asanək akani.

³ Zən tay va uwiɗ na buna, lukut nan babar va ɓeɓrezlerizze.

⁴ Məzugaŋ akkereŋgik sən geslne' səni, kpaŋgaŋ va mimtiti.

⁵ Yaŋ maslay anah sit gil neki: Nokum kədawgeslne'eŋ ɓa, nəsənək pakə Yesu məs məkkpa'ən kədawkayanəni.

⁶ Tay aŋ ɓa, vi asilik va anahə. Məde mula təki an avoŋgu.

⁷ Məddoŋ də kakara, mənah sit gewleɗ nan na: «Asilik səzet ɗiy mimtiti.» Tay əmbat yaŋ daabəŋ kikum a Galile, adak kədawlanəni. Nənah sukumuk yaŋka.

⁸ Agilyoŋguk də kakara səddəv magamas ləŋgə də geslne gəm ənnek diyɗa, anzoŋguk əka alabara sit gewleɗ nani.

⁹ Yaŋ Yesu ade ələm siti, amna: Əsɗokum. Addereŋgik azani, armanənək tələni, appu'oŋ abani.

¹⁰ Yaŋ Yesu anah sit na: Kədawgeslne'eŋ ɓa, məddoŋ mənah sit milmiŋgiɗu na, dəddoŋ a Galile, adak adawluwəni.

An məgaŋ magamas apeleŋgi

¹¹ Aka adaddoŋgu, ɗiy səmmbet məgaŋ magamas addoŋguk a walaŋgəla-metiŋ ənah sit an dəgəɗ pak sit deyeɗe net məsdəlveŋge.

¹² Adan deyeɗe net məsdəlveŋge vet akkalaŋ dit ɗiy məsɓeti, aslerin meti, apsitinik deleɗ diyɗa sit məzəlpaŋgə.

¹³ Aɓsitin na: Kənəhaŋgən na: Gewleɗ nan azzoŋguk də dəfɗa ahalnən aka mənam tat əleŋge.

¹⁴ An daya na kivadələv aprəməka waməbasani, waməgay ka kədassoŋ də geslne' ɓa.

¹⁵ Məzəlpaŋ atefinik deleɗi, aɗɗanənək va mənah siti. Alabara nan atərayək aweleŋgit mə Yudeɗi hã gap pay dəpaŋka.

Yesu tay ərban zən azet gewleɗ nani

¹⁶ Gewleɗ kəlaw kiyit taka ambataŋgək a Galile, aka mossorgo metiŋ a təki Yesu aɗi sit wən nani.

¹⁷ Adan awlanəni, appu'oŋko, ya ɗiy meɓɓet tahəŋ mekret sula sula.

¹⁸ Yesu adderik azeti, apel sitik dawnəh na: Gagdak pak məpsuwi sə disiŋ gəm səka dəlvafuŋ pakə.

¹⁹ Vi vaski məddoŋ azet ɗiy pak məkkpaŋget gewleɗ nawa, məɗɗe sit baptem də iya na Afəni, na Wətəni gəm na iya na Zeŋgile Salala.

²⁰ Məyagan sit dərmanəngən an məs nəɗi sukum wən nan pakə. Wanəsaw də munokum pay pak hã əgrak na dəlva.