Markus 13 - Bible en Guidar

Yesu tay əpel wən na əɓzla na Gəla na Maŋgəlva

¹ Adan Yesu agil səddəv Gəla na Maŋgəlva, ɗəf taka səmmbet gewleɗ nan aɓsən na: Mərbəzəga awle gərmeŋge, va mərkani!

² Yesu aɓsən na: Kulak ərka moggonəŋ ɓa sa? Sessel, apəl na kuwən aka kuwən ɓa. Sessel kaɓzluni.

Tatwãhɗe gəm əsərma temtemi

³ Adan Yesu asan aka gərəm net heremeɗ aba Gəla na Maŋgəlva. Piyer də Yakob gəm Yohanna gəm Andre abitginən assohõnən na:

⁴ Anah səm ɗa dewɗe zəgeɗis adaɗɗaŋ di? Mi narban səm pay nagrak net zəgeɗ vet di?

⁵ Yaŋ Yesu atəŋ ənah sit na: Məzi zukum, ɗəf adawzokum ɓa.

⁶ Ɗiy diyɗa wazzoŋ də iya naw dawnəh na: In vattə. Wazetin ɗiy diyɗa.

⁷ Wakəprəmaŋ alabaraɗe na əgay go'o də faraɗa, kədawɓuhnən mokum ɓa. Aslək dəgəɗgən vaska, ya əgraki tagay ɓa.

⁸ Ɗiy wagayaŋ dit ɗiy meɓɓeti. Məlĩ wagay də məlĩ maɓɓani. Əɓla na dələv də mãy wagəɗ a təki temtemi. Zəgeɗis na ətəŋ na tatwãhĩ.

⁹ Məzi zukum, vi warmukuməni, wakukumən aba ətaw wəna, wargukumən addəv gəla nakkal net mə Yudeɗi. Waziwgukumən abet deyeɗe na kivadələv temtemi dit məlyeŋge vi iya nawa, dəsangən əman ma nokum abeti.

¹⁰ Vi aslək Wən Nenek dərbəgən azet ɗiy naka dələv pak tagay.

¹¹ An armukumənək kappokum aveti, kədawgeslne'eŋ də əɗɗum aka an kədawpeleŋ ɓa. Ya an pay nan agapka. Məpel əpel an məs kərəhaŋ, əpel nan agil na sə mokum ɓa, səza Zeŋgile Salala adazzani.

¹² Ɗəf wagəm məlmən əkan ama əmta, afən wəyin tam wətəni. Kirin wasilyoŋ aket migilti, kawbeyti.

¹³ Ɗiy pak wazelkumən vi iya nawa. Ya ɗəf an dəziw ɓəlɓəl hã aza əgrak na wakõhu.

Ɗiy wazəmaŋ sãhã diyɗa

¹⁴ An kulanənək daryaw məraygən təkiya, aziwik a təki məs dəslə dəziwgən ɓa. (Məzənɗani dəprəm gabbani.) Asna ɗiy en dədassoŋ a Yude dənzoŋ aket mossorgoɗe gugriɗe.

¹⁵ Ɗəf an naka təgbalka adawpirken kawmbat əgəm zəgeɗ siŋgil ananda ɓa.

¹⁶ Ɗəf məs na gulyo, adawmilyen dərɓe vi kawgəm zəga nawgul nan ɓa.

¹⁷ Əray aket gil en dədaway gəm en məzuweɗgitin kirin pay nani.

¹⁸ Məkkaman Maŋgəlva vi pay nan adawsan pay səmyã ɓa.

¹⁹ Vi pay nani, pay na əzəm sahã adawsani, əzəmsahã wasan diyɗa, va ndən dəgəɗ ɗah ɓa va dələv asan hã gap kakaŋka, sessel agəɗ na ɗah ɓa'e.

²⁰ Va Daya duduɗukon pay nan ɓa, ɗəf tay nawkõh kəta ɓa, ya aka wən net məweleɗe nan en aweli, aduduɗukonək pay vani.

²¹ Pay nani, an ɗəf anah sukumək na: Kristu tay aŋka, awaniɓa tay ada, kədawtafnən ɓa.

²² Vi Kristuɗə məwaŋ wəna gəm məskəleŋɗe məwaŋ wən wazzoŋgu, waɗɗaŋ zəga narba dit sekeneɗ diyɗa vi kawzet ɗiyi, va wagəɗ na ɗiy en məwele na Maŋgəlva daydayə.

²³ Ya nokum məzi zukum, vi nənah sukumək zəgeɗ pak dafsəni.

Əziya na Wətən Ɗəfa

²⁴ Pay nani, dərɓaga tatwãh əska, pay wattiri, təla akasak na ɓa,

²⁵ Ngərzleɗ wayyo'oŋ sə disiŋ, gagdakɗe na disiŋ waguguslu'oŋgu.

²⁶ Asna kawlani Wətən Ɗəf əzzan aka slaybuwən də əɓapa gəm addəv gagdak diyɗa.

²⁷ Asna waslən maslayɗe nani, wakkelet məweleɗe nan sə tapaslay pay poɗo pakə, təŋ sə metteɓ ma dəlva hã a metteɓ ma disiŋ.

Əyak də wən na sokoyo

²⁸ Məprəm wənməkkpaŋga səza an sokoyo adarba: An kivan tay liɓuwliɓiwi, gaslamban andəfka, kəsənənək na mənzi go'oy.

²⁹ Vaski yi'e an kuleninik zəgeɗiski, məsən na, go'oy a maddamba.

³⁰ Gesiŋ nədawnah sukum: Sessel sayit ɗiyəŋ atoŋ na məza zəgeɗis dəɗɗaŋ ɓa ɓa.

³¹ Disiŋ də dəlvafuŋ pak wagrakaŋgə ya əpel naw agrak na ɓa.

Maŋgəlva kaka dəsən pay na əgrak dəlva

³² Aka wən na pay nani awaniɓa wənziya nan na ɗəf tay dəsən ɓa. Maslayɗe na disiŋ ɓa, wətən ɓa, abbər ki Afən ɓa.

³³ Məzi zukum, məssoŋ ɗezleŋge vi kəsənən pay nan ɓa.

³⁴ Wagəɗ va ɗəf adaddan malaka, appanək gəla nani, appanək wəza nan avet məɗɗaŋ wəza, naway pak apsənək wəza nani, anah sən məzuga memeŋle na aga.

³⁵ Məga kana, vi kəsənən pay afən gəla adazzan ɓa, kuzuŋ moskoyo, kuzuŋ tətaŋ dəfɗa, kuzuŋ aba pumpum, kuzuŋ də mompumo.

³⁶ Vi adazzan girzik kawrəhkum məleŋkum ɓa.

³⁷ Məs nənah sukuməŋka, in tat ənah sit ɗiy pakə: Məga.