2Alabaraɗe Də Mabərkiziti 12 - Bible en Guidar

Sisak məlĩ na Eziptə tay əgul Yuda

¹ Səza Robo'am aziwgən dələv nani, nan van arahək gbogboŋgo, yaŋ ndən dit mə Israyelɗe məs dəssoŋ dəndən pak azganən mahenziŋ na Yawe.

² Addəv əzva ma sle'ən na Robo'am aka məlĩ na, Sisak məlĩ na Eziptə pay wak sən Yerusalem də wəgaya, vi appanən əzban Yawe.

³ Tay dit mawteŋɗe nawgay gabal də səkat sula, məŋkoroŋ pilseŋge gabal kaklaw sləre, məzəlpaŋ məza əŋɗa net ɓa dəzzoŋ dəndən sə Eziptə: mə Libiɗe, mə Sukkotɗe gəm mə Etiyopiɗe.

⁴ Yaŋ azəm walaŋgəleɗe gugriɗ na korgu na Yuda, ade hã a Yerusalem.

⁵ Məskəleŋ Semaya pay aza Robo'am dit ɗiy gugriɗ na Yuda məkkelit a Yerusalem aka wən na Sisak, aɓsit na: «An Yawe adawnəh yaŋka: “Kəzgawənka! Ya naw van tam nəzgokumko addəv va Sisak.”»

⁶ Məlĩ dit ɗiy gugriɗ na Israyel aɗiyaŋgək marava, aɓɗaŋ na: «Yawe təstəsi!»

⁷ Adan Yawe awla na aɗiyaŋgək marava, əpel na Yawe agapək aza Semaya də ənəh na: «Aɗiyaŋgək marava, nəppet na əkkãhaŋ ɓa. Wanəpsit tive nawkõh abe aŋ siɗikke. Nəke na herɗe naw aka Yerusalem dəmmba va Sisak ɓa.

⁸ Ya wakkpaŋgaŋ belemɗe nani, dəsənəngən walaŋ əgəɗ su wəza na balam gəm əgəɗ sit wəza na balam sit milyeŋge net dilveŋge.»

⁹ Sisak məlĩ na Eziptə kan wak sən Yerusalem də wəgaya. Anda arya səddəv gəla na Yawe də an naddəv gəla na məlyã. Andak zəga baymani, barayɗe na meleŋge məs Salomoŋ azaɓ dayday andeke.

¹⁰ Kpaŋ Robo'am azaɓ barayɗe na təbəz pepreŋ a gəleti, apsit avet deyeɗe net məhayaŋ ammba məlĩ məs dədawganən maddamba na gəla na məlyã.

¹¹ Asna, va məlĩ ammbat addəv gəla na Yawe pak, məgaŋ meŋgle əmbataŋ əgim barayɗe, əmilgitin addəv gəla net məzugaŋgə.

¹² Adan aɗimarava, ədagədəv na Yawe azarək səkani, məza əgap nawzan kəkãh ɓa, vi də as pak na, zəgeɗ mogget tahəŋ a Yuda.

Əbayma əzəm məlĩ na Robo'am

¹³ Məlĩ Robo'am akkpaŋgək gboŋgboŋ a Yerusalem, azəmək məlyã. Robo'am tay də əzva kaklaw poɗo kiyən taka gala akkpaŋ məlyã, yaŋ azəm məlĩ əzva kəlaw kiyən buhul a Yerusalem, walaŋgəla-metiŋ məs Yawe awel a weleŋgit mahəlfaɗe na Israyel gərak kawɗi iya nan adaka. Iya nat man na Na'ama, mə Ammonkə.

¹⁴ Yaŋ agəɗ mbərayən, vi dəsok zən əkayan Yawe də makran pak ɓa.

¹⁵ Wəzeɗe na Robo'am en maddaabəŋ gap azet en meddirɓe na, ndəɗaŋgə məverit addivit wəzeɗe na məskəleŋ Semaya gəm addivit wəzeɗe na məwəl helik Iddo ɓa sa? Əgay asanək pay pak a walaŋ Robo'am də Yerobo'am.

¹⁶ Robo'am amtəka, azbetik efiŋgiɗni, yaŋ məndəkən a walaŋgəla-metiŋ na Davit. Abiya wətən dəgəm məlĩ a gəlani.