2Alabaraɗe Də Mabərkiziti 11 - Bible en Guidar

Milyeŋge na Yuda ( 11:1—36:12 )

¹ Əgap na Robo'am a Yerusalem na, ndən ləŋ əkkelet məzəlpaŋ gabal səkat də kaklaw dədopoɗo məs vet awbəta afuŋ ɓa, səddəv mahəlfa na Yuda gəm na Benyamin, vi kadda əgay dit mə Israyelɗe kaska wəleti, dəsangən məlĩ neti.

² Yaŋ Yawe apel sən ɗəf na Maŋgəlva Semaya aɓsən na:

³ «Apel sən Robo'am wətən Salomoŋ, məlĩ na Yuda, gəm sit mə Israyelɗe dit ɗiy na Benyamin pakə; anah sit na:

⁴ An Yawe anah yaŋka: Kəddoŋ əgay dit milmiŋgiɗkum tusso ɓa; nawãy pak dəmndan eŋgili, vi wən nan səzaw asili, yas aprəmən ma Yawe, amndoŋ ki əmbat aka Yerobo'am.»

Robo'am tay əsɓet walaŋgəleɗe gugriɗe

⁵ Robo'am asanək a Yerusalem də gəla, ampe walaŋgəleɗe na korgu na Yuda.

⁶ Yas ampa Bet-Lehem, Etam, Tekowa,

⁷ Bet-Sur, Soko, Adullam,

⁸ Gat, Maresa, Zif,

⁹ Adorayim, Lakis, Azeka,

¹⁰ Soreya, Ayalon gəm Hebron, walaŋgəleɗe na korgu na Yuda gəm na Benyamin.

¹¹ Askəsənək zlava vani, yaŋ aɗi deyeɗe na dəlva, akol maha na zəga nawzəma, na mẽlẽ gəm na mbazla adaka.

¹² Addəv walaŋgəla-metiŋ pak barayɗe gugriɗi gəm dit tulhõŋge tahəŋ. Apsitik gagdak diyɗa sawɓa. Yuda gəm Benyamin pak assoŋguk ka nani.

Məsdəlveŋge dit mə leviɗe tay ərmanən vet aza Robo'am

¹³ Məsdəlveŋge dit mə leviɗe dəssoŋ a Israyel baymet, azzoŋguk səka dələv net temtem karma vet azani.

¹⁴ Mə leviɗe appannək mapoho nawtaɗ neti may hara dələv neti, addoŋ a Yuda gəm a Yerusalem, vi Yerobo'am dit kirtin ətekinik daɗɗa wəza na məsdələv na Yawe.

¹⁵ Yas Yerobo'am aɗi məsdəlveŋge na kiyən na gəleɗe-nettuyeŋge kawgagdaket porsokɗe gəm kirit wasliɗe məs azaɓə.

¹⁶ Dəzbetin mahəlfaɗe baymet na Israyel məs dəppanən mekret sən əkayan Yawe, Maŋgəlva na Israyel dəzzoŋ a Yerusalem vi kawzaɓ-Maŋgəlva sən Yawe ana Maŋgəlva net efiŋgiɗti.

¹⁷ Ampaŋ sənənək ɓəɓəl sən məlĩ na Yuda gəm aziweŋ sənənək Robo'am wətən Salomoŋ əzva hoku, vi agəmənək təlit may Davit də Salomoŋ addəv əzva hoku vani.

Daŋgla na Robo'am

¹⁸ Robo'am akaytək Mahalat wətən Yerimot wətən Davit awə dət Abihayel wətən Eliyab wət Yesse.

¹⁹ Tuwə sənək kirin mezeŋgleketi: Ye'us, Semariya gəm Zaham.

²⁰ Səbbərət na, agəmtək Ma'aka wətən Absalom, tuwe sən may Abiya, Attay, Ziza gəm Selomit.

²¹ Robo'am aŋglutək Ma'aka wətən Absalom daykiyit gil nan dit gəreŋgiɗin pakə; vi aɗiyək gil kəlaw kiyit dədopoɗo gəm gereŋgiɗin kaklaw sləre, awə mezeŋgleket kaklaw sula kiyit dədopoɗo, muguluŋgit kaklaw sləre.

²² Yaŋ Robo'am aɗi Abiya wətət Ma'aka, ka daya net milmiŋgiɗin, vi man aka dəkkpaŋgən məlyã.

²³ Əsən adek akani, attəreyetik kirtin beymet aket dələveŋge na Yuda də Benyamin gboŋgu gəm a walaŋgəleɗe gugriɗ na korgu pakə; yaŋ apsit zəga nawzəm ndoɗoɗ ndoɗoɗə, akay sit gil diyɗa.