Markus 15 - Alkawali Woiwoyi

Owo Wada Nwo Wu-wuyi

¹ N labmiyi, a pirist tukwoda, a byeda, a malami, n na Yahudawayi apadawa yi vinya ɓa kpesa ɓa zhin shawara nyaɓa ɓa zhin. Ɓa zhin shawara ge ɓa tun n Yesu yi dna na soja tasin n Bilatus aba a Romawayi Gomna.

² Bilatus wa nyawo. “Ho zhin a Yahudawayi Esu nu?” Yesu wa yewo ge, “Ho ku da dai-dai.”

^3-4 Nsayi a pirist tukwoda a kpewo aɓo na katayi mwa. Bilatus wa nyawo ge, “Knihi zhin to hoi ɓa dna ɓe-gbe ma? Aɓeye na datu ho tukwo nyi ma?”

⁵ Ama Yesu to ɓei shan ɓe gbe dnam. Ca wo Bilatus n mwa.

⁶ Kwo ɓei zhin Bilatus kunnu nu n Paska esa, wa loʼza wan-wan ya ga a Yahudawayi, ezaho-zaho yi nɓa ye.

⁷ Kurkuku da ho ai yi ge Barabas. Wo ɓei zhin evi yakwo nu n na zajeyi.

⁸ Safewyi, aza ya yezhi n Bilatus aba, Ɓai gyiwo wye ge wo lo eza papayi ya gaɓa gmanyi she wo shin zhin.

⁹ Bilatus wa nyaɓa, “Fye ye malo a Yahudawayi osu nu ya ga fye? Owo nu n fye ye ma leya?”

¹⁰ (Ntuge, wo ɓo ku kpe n ge a pirist tukwoda munafici nu ɓa pa, ntuge Yesu ɓei n zafun yi n duɓa.)

¹¹ Ama a pirist tukwoda ɓa gna aza nge ɓa gnage ɓa ye Barabas nu to ge Yesu m.

¹² Bilatus wa nyaɓa, “Nma lo Barabas ya, ma zhin wuna n zadeye yiʼa n fye yi ge efye ʼsu nyia?”

¹³ Ɓa ye na kuyi viyan, “A zunwo du.”

¹⁴ Bilatus wa nya ɓa, “Ntu Kniɓeya? Wo ku kniɓei nukwoyi zhan?” Ama ɓa gna aku fyi-fyi ge, “A zun wo du.”

¹⁵ Shikwonyi Bilatus, wo aza yezhi dna, wo ye njesun aza yewo wa lo Barabas ya. Wa ga gbe ge a zhin Yesu bulala n bulalayi n kwo na sinknayi fyi. Wa gawo m ɓa kun nge ɓa zun wo du.

^16-17 A Romayi a soja ɓa la wo lo cei n bariki, ɓa yi a soja je ɓe cei, ɓa kpewo aje asu nya pya, ɓa zhin lawonyi aknawuyi nya, ɓa kun wo n tukwo.

¹⁸ Ɓa ya zhi ɓai sa wo ami, ɓai ci ge, Shekwomwasa, osu a Yahudiyi nya.

¹⁹ Ɓaluwo n tukwo n na busiyi ɓa kni akni kpewo, ɓa kni a kwo-kwo zhi ɓai ɓiwo gna agyekpe nya.

²⁰ Sanu n na ɓei kuɓa ɓe mɓa wyefan agye-kpe nya yi, ɓa kma woje mɓa ɓei kpewo nyi ɓa kpe Wo owohin aje njesun ɓa lo woi a zunwo du.

²¹ Siman Siriniyi, woye bwa loloɓe, ayi wo wa ɓe wa bma Yesu zundu la (Siman nu zhin Alezanda dada n Rufus yi.)

²² Ɓaɓe n Yesu yi aba n na yi ge Golgota (wato Kwalluwa nu).

²³ Agawo nuwan mamayi to wa yesin ɓom.

²⁴ Ɓa pmi ɓa zunwo-du ɓa she kuriya n wa je tukwo.

²⁵ Ɓa ɓei zunwo du n sinkna ciwagmanyi nu n labmi yi.

²⁶ Ɓa ka nya kpe n wo Zundu she, ɓai wuwo laifi, “A Yahudawayi ʼsu.”

²⁷ Aɓei zun wodu n gnisun na vihoyi nu gun-aba n labmi yi, gmanyi nwo bwapmi, gmanyi nwo bwai-zhe bwa.

²⁸ Anabi ɓeda nwo ɓei da ge, “Aɓa Wo ɓedo na laifi da yi,” nyi kwa ku nu.

^29-30 A zokwo wanhi ɓai duya ɓai bmiya ba tukwo, ɓai da ɓeda nukwoyi agyekpe nya, ɓai gna, “Gye oza nwo gna ge wo ɓa mi wa ɓa aduwa nyakun ya, waje ɓa mi dna anyipyei ngun ata. Gni hohin ha ka shi nzundu.”

³¹ A pirist tukwoda n na adini amalemi yi bei zhi ɓo ɓai kpe Yesu agye. Bai cige, “Wo mi n na zaje gni ɓo, ama wo tami wa gni wo hin m.”

³² Ba yaku kpewo, “Wo tunu. A Israila yi Esu, kashi n zundu n na bai ya gaho gaiciya.” Harma aviyi ngun aba ɓai kniwa kmi.

³³ Nyipyeyi atukwogunyi ekni vinya kwa dna wyegma har sinkna ngun ata wyeshe nya, wyegma yi yedna.

³⁴ Yesu wa yi n begye Kalayi, “Eli, Eli Lama Sabach thani” (Emi Shekwoyi, emi Shekwoyi, kni nu zhin hoi yamiʼa?)

³⁵ Aza m ɓa ɓei ihi ɓo, ɓa gye ge wo yi Annabi Iliya nu.

³⁶ Ntu cenu zaknayi wa busi ɓe n nuwan mamayi shi n fi n soso wa kuwo ko ngbe n busiyi. Fye pmi ya gye, kwo Iliya ɓa ɓe wa kawo shi.

³⁷ Safyewyi Yesu wa je wyisa n kalayi wa gna wo zafun a mi.

³⁸ Labule nkwo ɓei sa n na aduwa nyakun nyi kwa saya n she har ekni.

³⁹ Sanu Romawayi soja Tukwoda ɓei gye shi wo ɓei gnawo zafun ami, wa cige, “ɓehin-hin, wo ɓei zhin Shekwoyi Nugun nu.”

⁴⁰ Anyi-kwoza ho ɓai shi awye n tagni-Maryamu Magadalin, Maryamu (Yakubu Biyi n Joses ya yi), Salomi, n naza-je yi.

⁴¹ Oɓa n na Galiliyi anyikwo aje yi mɓa zhin owo aviyi nyi, ɓa bma wozhin n na tun-tnuyi sa nwo ɓei dna n Galili nyi, ɓa ɓe Urushelima ngnisun nwoi.

^42-43 Aɓeye vinya ɓei zhin n Jumawyi nu. Dna n wyeshe yi mi Yusufu Arimatiya ʼza yakwo dna na Yahudawayi apadawa (nwo-hin tukwo wo ɓei pmi Shekwoyi bemi ɓeɓe). Wa bwa bugba kala wa lo Bilatus aba wa nyawo Yesu nayi ɓo i wa bi.

⁴⁴ To Bilatus wa ga gaiciya ge Yesu la fin Ntu lonu wayi Romawayi soja gadi tukwoda wa In Yawo.

⁴⁵ Soja tukwodayi wa gna Bilatus ge, wola fi. Bilatus wa ga Yusufu gbe wa la Yesu nayi.

⁴⁶ Yusufu wa si linen ʼje, wa ka Yesu shi n zundu, wa puwo linin ʼje yi, wa yawo dna n vingwo n wo ɓei jikwo nna pma, wa pmi kutaya lo cei wa gu kwo n vingwo gbe.

⁴⁷ Maryamu Magadalin n Maryamu Yesu ʼya yi ɓei zhi ɓai shi awye she a bi Yesu.