ફિલિપ્પીઓનેં પત્ર 1 - ગરાસિયા નવો કરાર

¹ આ કાગળ પાવલુસ અનેં તીમુથિયુસ નેં તરફ થી હે ઝી ઇસુ મસીહ ના સેંવક હે. ઇયુ ઇસુ મસીહ મ હેંનં પવિત્ર મનખં અનેં વડીલં અનેં સેંવકં હારુ હુંદું હે ઝી ફિલિપ્પી સેર મ રે હે.

² આપડા બા પરમેશ્વર અનેં પ્રભુ ઇસુ મસીહ ની તરફ થી તમનેં અનુગ્રહ અનેં શાંતિ મળતી રે.

પાવલુસ ની પ્રાર્થના અનેં ધનેવાદ

³ હૂં ઝર-ઝર તમનેં ઇયાદ કરું હે, તર-તર મારા પરમેશ્વર નું ધનેવાદ કરું હે.

⁴ અનેં ઝર બી હૂં તમં બદ્દ હારુ પ્રાર્થના કરું હે, તે હમેશા ખુશી થી પ્રાર્થના કરું હે.

⁵ એંતરે હારુ કે તમેં ઝેંને દાડે થી ઇસુ મસીહ ના તાજા હમિસાર ઇપેર વિશ્વાસ કર્યો તર થી લેંનેં આજ તક હેંના તાજા હમિસાર નેં ફેલાવા મ મારં ભાગિદાર રિય હે.

⁶ મનેં ઇની વાત નો ભરુંહો હે કે પરમેશ્વરેં તમારી મ અસલ નું કામ સરુ કર્યુ હે, વેયોસ હેંનેં ઇસુ મસીહ નેં પાસો આવવા ના દાડા તક પૂરુ કરહે.

⁷ તમારા બદ્દ ના બારા મ મારો ઇયો વિસાર ઠીક હે, કેંમકે હૂં તમારી હાતેં ઘણો પ્રેમ કરું હે. કેંમકે મનેં જેલ મ હોવા સતં તમું તાજા હમિસાર ની રખવાળી કરવા મ અનેં હેંનેં સાબિત કરવા મ તમું બદ્દ મારી હાતેં પરમેશ્વર ના અનુગ્રહ મ ભાગિદાર હે.

⁸ એંનેં મ પરમેશ્વર મારો ગવાહ હે કે હૂં ઇસુ મસીહ નેં જુંગ પ્રેમ કરેંનેં તમં બદ્દનેં મળવા ની આહ રાખું હે.

⁹ હૂં એંમ પ્રાર્થના કરું હે, કે એક-બીજા હારુ તમારો પ્રેમ, જ્ઞાન અનેં બદ્દી પરકાર ની હમજ હાતેં હઝુ વદાર વદતો જાએ.

¹⁰ એંતરે કે તમું બદ્દ કરતં ખાસ વાતં નેં વળખેં સકો, અનેં ઇસુ મસીહ નેં પાસો આવવા ના ટાએંમ તક દોષ વગર ન અનેં પવિત્ર રો.

¹¹ અનેં પરમેશ્વર ની મહિમા અનેં વાહ-વાહી હારુ પરમેશ્વર નેં પસંદ પડે એંવા સોભાવ થી ભરપૂર થાતં જો, ઝી ઇસુ મસીહ દુવારાસ મળેં સકે હે.

પાવલુસ નેં જેલ જાવા થી તાજા હમિસાર ની બડોતરી

¹² હે ભાજ્યોં, હૂં સાહું હે કે તમું એંમ જાણ લો કે મારી હાતેં ઝી બણાવ બણ્યો હે, હેંનેં થી તાજા હમિસાર ની બડોતરી થાઈ હે.

¹³ આં તક કે મુંટા રાજા ના રાજ ભવન ની સેનિકં ની બદ્દી ટુકડજ્ય મ અનેં બાકી બદ્દ મનખં નેં ઇયે ખબર લાગેં ગઈ હે, કે હૂં ઇસુ મસીહ ની સેવા કરવા નેં લેંદેસ જેલ મ હે.

¹⁴ અનેં પ્રભુ મ ઝી વિશ્વાસી ભાઈ હે, હેંનં મહા ઘણાક મનેં જેલ જાવા નેં લેંદે વિશ્વાસ રાખેંનેં પરમેશ્વર નું વસન બીક વગર હમળાવવા હારુ વદારે હિમ્મત કરે હે.

¹⁵ અમુક જણા તે બળતરા થી અનેં ઝઘડા નેં લેંદે મસીહ ના તાજા હમિસાર નો પરસાર કરે હે, પુંણ અમુક જણા તાજા ઈરાદા થી પરસાર કરે હે.

¹⁶ અમુક જણા ઝી તાજા ઈરાદા થી પરસાર કરે હે વેયા પ્રેમ ને લેંદે કરે હે, કેંમકે વેયા જાણે હે કે હૂં તાજા હમિસાર ની રખવાળી હારુ જેલ મ બંદ હે.

¹⁷ પુંણ અમુક જણા ગલત ઈરાદા થી એંમ વિસારેંનેં ઇસુ મસીહ નો પરસાર કરે હે, કે હેંમ કરવા થી પાવલુસ નેં જેલ મ વદારે પરેશાની થાહે.

¹⁸ કઇ વાંદો નેં, બદ્દી રિતી સાહે ભુંડા ઈરાદા થી કે તાજા ઈરાદા થી, ઇસુ મસીહ ના તાજા હમિસાર નો પરસાર કરવા મ આવે હે, એંતરે હારુ હૂં એંનેં થી ખુશ હે અનેં ખુશ રેં હુંદો.

જીવતું રેંવું મસીહ હે

¹⁹ કેંમકે હૂં જાણું હે કે તમારી પ્રાર્થના દુવારા, અનેં ઇસુ મસીહ ના મુંકલેંલા પવિત્ર આત્મા ની મદદ દુવારા, એંનો બદલો જેલ થી મારો સુટકારો થાહે.

²⁰ મારી ઘણી અસ્યા અનેં આહ ઇયેસ હે, કે હૂં કઇની યે વાત મ લાજેં નેં મરું, પુંણ મનેં ઇસુ મસીહ ના બારા મ બુંલવા હારુ હિમ્મત મળે, ઝેંમ કે પેલ મેંહ કર્યુ હેંતું. સાહે હૂં જીવતો રું કે મરેં જું, હૂં મારા પૂરા જીવન થી ઇસુ મસીહ નું માન કરતો રેં.

²¹ કેંમકે હૂં જીવતો રેં તે ઇસુ મસીહ હારુ જીવેં, અનેં મરેં જએં તે મારી હારુ ફાએંદો થાહે.

²² પુંણ અગર શરીર મ જીવતો રું તે હૂં ઇસુ મસીહ હારુ ફાએંદા મંદ કામ કરેં સકેં, એંતરે હારુ હૂં નહેં હમજેં સક્તો કે હું પસંદ કરું.

²³ કેંમકે હૂં બેય નેં વસ મ ટંગાએંલો હે, મન તે કરે હે કે શરીર મહું નકળેંનેં ઇસુ મસીહ કન જાએંનેં રું, કેંમકે ઇયુ ઘણુંસ તાજું હે.

²⁴ પુંણ તમારી હારુ, મારે શરીર મ જીવતું રેંવું વદાર જરુરી હે.

²⁵ અનેં મનેં હેંનો ભરુંહો હે, હાં નેં હૂં જાણું હે કે હૂં જીવતો રેં, અનેં તમારી બદ્દનેં હાતેં રેંનેં તમનેં વિશ્વાસ મ મજબૂત થાવા અનેં હેંનેં મ ખુશ રેંવા હારુ મદદ કરેં.

²⁶ એંતરે કે ઝર હૂં ફેંર પાસો તમારી કન રેં, તે તમું મારી લેંદે ઇસુ મસીહ ના બારા મ હઝુ વદાર ઘમંડ કરેં સકહો.

²⁷ ખાલી એંતરું કરો કે તમારો વેવહાર ઇસુ મસીહ ના તાજા હમિસાર નેં લાએંક વેહ. એંતરે કે સાહે હૂં આવેંનેં તમનેં ભાળું કે નેં હુંદો આવું, તમારા બારા મ ઇયુસ હામળું કે તમું એકેંસ મન અનેં એક સિત થાએંનેં તાજા હમિસાર ના વિશ્વાસ હારુ મેહનત કરતં રો હે.

²⁸ અનેં કઇની યે વાત મ વિરોધ કરવા વાળં થી સમક્તં નહેં. ઇયે તમારી હિમ્મત હેંનં હારુ નાશ ની સાફ નિશાની હે, પુંણ તમારી હારુ ઇયે પરમેશ્વર ની તરફ થી તારણ ની નિશાની હે.

²⁹ કેંમકે ઇસુ મસીહ નેં લેંદે તમારી ઇપેર ઇયુ અનુગ્રહ થાયુ કે તમું નેં ખાલી હેંનેં ઇપેર વિશ્વાસ કરો પુંણ હેંનેં હારુ દુઃખ હુંદું વેંઠો.

³⁰ અનેં તમારે વેમેંસ દુઃખ વેંઠવું હે, ઝેંવો તમેં મનેં ફિલિપ્પી સેર મ દુઃખ વેંઠતં ભાળ્યો હેંતો, અનેં હમણં હુંદં તમું હામળો હે કે હૂં વેવુંસ દુઃખ વેંઠેં રિયો હે.