2 થેસ્સલોનિકીઓનેં 1 - ગરાસિયા નવો કરાર

આભાર

¹ આપડા બા પરમેશ્વર અનેં પ્રભુ ઇસુ મસીહ મ થિસ્લુનીકે સેર ન વિશ્વાસી મનખં હારુ પાવલુસ, સિલવાનુસ અનેં તીમુથિયુસ ની તરફ થી આ કાગળ લખવા મ આયુ હે.

² આપડો બા પરમેશ્વર અનેં પ્રભુ ઇસુ મસીહ તમનેં તરફ થી તમનેં અનુગ્રહ અનેં શાંતિ આલે.

નિયા નો દાડો

³ હે વાલોં, તમારા બારા મ હમારે પરમેશ્વર નું ધનેવાદ હમેશા કરવું જુગે, એંવું કરવું હમારી હારુ સહી હે, એંતરે હારુ કે ઇસુ મસીહ ઇપેર તમારો વિશ્વાસ ઘણો વદતો જાએ હે, અનેં એક-બીજા નેં હાતેં તમારો પ્રેમ ઘણો વદાર વદતો જાએ હે.

⁴ એંતરે હારુ હમું પરમેશ્વર ની મંડલી મ તમારા બારા મ વખાણ કરજ્યે હે, કે ઝેંતરું દુઃખ અનેં સતાવ તમું વેંઠો હે, હેંનં બદ્દ મ તમારી ધારેંણ અનેં ઇસુ મસીહ ઇપેર નો તમારો વિશ્વાસ ભળાએ હે.

⁵ તમું પરમેશ્વર ના રાજ નેં લાએંક બણો એંતરે હારુ તમું દુઃખ હુંદું વેંઠો હે, ઇયુ પરમેશ્વર ના હાસા નિયા નું સાફ સબૂત હે.

⁶ કેંમકે હાસો નિયા કરવા વાળો પરમેશ્વર, ઝી મનખં તમનેં દુઃખ આલે હે, હેંનનેં વેયો બદલો આલહે.

⁷ અનેં ઝર પ્રભુ ઇસુ મસીહ પુંતાનં સામ્રતી હરગદૂતં નેં હાતેં ધધકતી આગ મ હરગ મહો આવહે, તર તમનેં ઝી દુઃખ વેંઠો હે હમારી હાતેં શાંતિ આલહે.

⁸ અનેં ઝી મનખં પરમેશ્વર નેં નહેં જાણતં, અનેં પ્રભુ ઇસુ મસીહ ના તાજા હમિસાર નેં નહેં માનતં, હેંનનો વેયો બદલો લેંહે.

⁹ વેય મનખં પ્રભુ થી અનેં હીની સામ્રત ની મહિમા થી અલગ થાએં જાહે. અનેં પરમેશ્વર હેંનનેં એંવો દંડ આલહે, કે વેય હમેશા હારુ નાશ થાએં જાહે.

¹⁰ ઇયે બદ્દી વાતેં તર થાહે, ઝર પ્રભુ ઇસુ મસીહ પુંતાનં પવિત્ર મનખં મ માન અનેં મહિમા મેંળવવા હારુ પાસો આવહે. હેંને ટાએંમેં તમું હુંદં હેંનેં મ ભેંગં રેંહો, કેંમકે ઝી હમવેં કેંદું હેંતું હેંનેં ઇપેર તમવેં વિશ્વાસ કર્યો હે.

¹¹ એંતરે હારુ હમું લગધર્યા તમારી હારુ પ્રાર્થના હુંદા કરજ્યે હે, એંતરે કે પરમેશ્વર તમનેં હેંના જીવન નેં લાએંક બણાવ દે, ઝેંનેં જીવવા હારુ હેંને તમનેં બુંલાય હે. અનેં બદ્દ ભલાઈ ન કામં કરવા ની આહ અનેં વિશ્વાસ થી કરેંલં બદ્દ કામં નેં વેયો પુંતાની સામ્રત થી પૂરં કરે.

¹² હમું એંમ પ્રાર્થના કરજ્યે હે, કે આપડા પરમેશ્વર અનેં પ્રભુ ઇસુ મસીહ ના અનુગ્રહ ને પરમણે, આપડા પ્રભુ ઇસુ મસીહ નું નામ તમારી મ મહિમા મેંળવે, અનેં તમું હેંના મ મહિમા મેંળવો.