2 Timote 1 - Alkawal Kesal

¹ Miin Bulus *lilaaɗo Yeesu *Almasiifu gada e nyumo Allah vinndi ngo'ol ɗereewol. O hokkii yam anndingo yimɓe habaru yonki. Allah resanii en ɗum gada e Yeesu Almasiifu.

² Emi vinndan maa, aan Timote ɓiyam giɗaaɗo. Allah *Baabiraawo e Jawmiraawo meeɗen Yeesu Almasiifu kokke barkaa e yurmeende e jam.

Yettoore e semmbiɗingo

³ Emi yetta Allah mo kuwammi e *nyumo ɓernde laaɓngo, noon no maamiraaɓe am kuurani mo. Jemma e nyalawma fuu emi hiimto maa nder do'aaje am.

⁴ Emi hiimtoo gonɗi maaɗa. Mi yeewnii yi'igo ma korey, gam faa mi nana belɗum ɗuuɗɗum.

⁵ Emi hiimtoo goonɗinki ki ngoonɗinɗaa Allah e ɓernde laaɓnde nde walaa munaafukaare, goonɗinki iri ki maama maaɗa debbo bi'eteeɗo Looyis, e inna maaɗa Enis ngoodi. Mi tabbitinii aan boo noon ngoonɗinirɗaa mo.

⁶ Gam ma'ajum emi hiimtin ma : ɓesdaa huutinirgo kokkal ngal Allah hokku maa wakkaci nde njowanmaami juuɗe am.

⁷ Allah hokkaay en Ruhu gam kulen yimɓe, ammaa gam keɓen semmbee e yiɗde e nantaare.

⁸ Gam ma'ajum ta'a hul yeccaago yimɓe habaru Jawmiraawo meeɗen, ta'a semtiram miin boo omndaaɗo nder kaso gam ma'ako. Ammaa jaɓ torrodaago e am nder saaydingo *Habaru Belɗum gada e baawɗe Allah.

⁹ Allah hisnii en, o noddii en laatooɗen yimɓe ma'ako seniiɓe. Wanaa gam en mbaɗii kuuɗe booɗɗe o hisni en, ammaa ɗum gam caahu ma'ako e nyumo ma'ako. O hokkii en caahu nguun gada e kawtal meeɗen e Yeesu *Almasiifu ila duuniyaaru tagaaka.

¹⁰ Ammaa jo'oni caahu nguun vannganii en gada e garki Yeesu Almasiifu kisnoowo en. Kanko o halkii baawɗe maayde. O vannginanii en yonki ɗum re'ataa, gada e Habaru Belɗum.

¹¹ Allah laatinii yam ga'ajotooɗo e lilaaɗo e ekkitinoowo Habaru Belɗum ɗuum.

¹² Gam ma'ajum njareymi ɗi'i torraaji, ammaa mi semtaay, gam emi anndi mo ngoonɗinmi. Mi tabbitinii emo waawi reengo ko o hokki yam faa *nyannde-jahango.

¹³ Tokku ekkitinooje goongaaje ɗe ekkitinmaami. Joga ɗe booɗɗum faa ɗe nafa goonɗinki e yiɗde meeɗen nde keɓɗen gada e kawtal meeɗen e Yeesu Almasiifu.

¹⁴ Reen ekkitinol booɗngol ngol kokkeɗaa gada e ballal *Ruhu Ceniiɗo gonɗo nder meeɗen.

¹⁵ A anndi yimɓe wonɓe lesdi Aasiya fuu kibinii yam. Nder maɓɓe e woodi Fayjelus e Hermojenes.

¹⁶ Onesifoor boo, Jawmiraawo yurmoo wuro ma'ako, gam o de''itinii ɓernde am nde ɗuuɗɗum. O semtiraay boo kaɓɓeeki am nder kaso.

¹⁷ Nde o yottii *Rooma, o yillake yam korey, faa o mooɓi yam.

¹⁸ Jawmiraawo yurmoo mo nyannde-jahango. A anndi booɗɗum no o vallirnoo yam nder si'ire Efesu.