Vosavakaibalebale 9 - Ai Vola Tabu (Vakadewa Makawa Vakavoutaki 2021)

A Cakacaka kei nai Vakavuvuli ni Vuku

¹ Sa tara oti na nona vale ko vuku, sa taya na kena duru e vitu.

² Sa vakamatea na nona manumanu, sa ulia na mena waini, sa vakarautaka talega na nona tepeli.

³ Sa talai ira yani na nona goneyalewa, sa kaci tu e na veitiki ni koro e cecere, ka vaka,

⁴ “Ko koya sa sega ni vuku, me curu mai ki ke!” Ko koya sa sega ni yalomatua, sa kaya kina vua,

⁵ “Mo lako mai, mo mai kania na noqu madrai ka gunuva na waini ka'u sa ulia.

⁶ Biuti ira na lialia mo bula kina, ka muria na sala ni yalomatua.”

⁷ Ko koya sa vunauca na dauveivakalialiai ena kana madua kina; ia ko koya sa vunauca na tamata ca ena tauvi duka kina.

⁸ Kakua ni vunauca na dauveivakalialiai, de cati iko; vunauca na tamata vuku, ka na lomani iko.

⁹ Vakavulica na tamata vuku, ka na vuku cake ko koya; vakavulica na yalododonu, ka na tubu kina e na kila-ka.

¹⁰ A rerevaki Jiova na vu ni vuku, kei na kilai Koya sa Yalosavasava sa ka ni veivakayalomatuataki.

¹¹ Ni sai au ga ena vuqa kina na nomu siga, ka na levu na yabaki ni nomu bula.

¹² Kevaka ko vuku, sa na nomu na kena yaga; ia kevaka ko sa beca, a kemu duaduaga na kenai sau.

A Nona i Tovo na Yalewa Lialia

¹³ Na yalewa lialia sa daudomolevu; sa yalowai, ka sega na ka e kila.

¹⁴ Sa dautiko mai na katuba ni nona vale, e nai tikotiko e na veitiki ni koro e cecere,

¹⁵ me kacivi ira era lako vakadodonu tu e na nodra i lakolako,

¹⁶ “Ko koya sa sega ni vuku, me curu mai ki ke!” Ia ko koya sa sega ni yalomatua, sa kaya kina vua,

¹⁷ “Na wai e butakoci sa kamikamica, kei na madrai sa laukana lo sa ka vinaka.”

¹⁸ Ia sa lecava ga ko koya ni ra tiko mai kea ko ira na mate, io ko ira era a dautiko kaya era sa lewe ni bulubulu mai Eli.