Vosavakaibalebale 6 - Ai Vola Tabu (Vakadewa Makawa Vakavoutaki 2021)

Nai Vakasala Eso

¹ Na luvequ, kevaka ko sa yalayala mo kenai sosomi ni kai nomu, ka sa ia na veiyalayalati kaya na kai tani,

² ko sa coriti e na vosa ni gusumu, ko sa vauci e na vosa ni gusumu.

³ Mo ia mada na ka oqo, na luvequ, ka mo sereki iko, ni ko sa lutu ki na ligana na kai nomu; lako mada, mo mani vakayalomalumalumutaki iko, ka mo vakamasuti koya na kai nomu.

⁴ Kakua ni solia me moce na matamu, se me sosovu na dakudaku-ni-matamu;

⁵ vakabulai iko me vaka na kaseli mai na ligana na dauvakasasa, manumanu kei na manumanu vuka mai na ligana na daubiri dai.

⁶ Mo lako vua na qasikalolo, ko iko na dauvucesa; mo nanuma mada na nona i valavala, mo vuku.

⁷ Sa sega e dua me tuberi koya se vakaraica, se lewa vua,

⁸ ia sa vakarautaka na kena e na vula i katakata, ka kumuna na kena kakana e na vula i matua.

⁹ Me vakaevei na kena dede na nomu moce, ko iko na dauvucesa? Ko na duri ninaica mai na nomu moce?

¹⁰ Me vakalailai tale na moce, vakalailai na sosovu, vakalailai na roqoveinu me moce,

¹¹ ia na nomu vakadravudravuataki ena lako mai me vaka na tamata dauveilakoyaki, kei na nomu viakana tiko, me vaka na tamata i valu.

¹² A tamata wale io, na daucaka ca, sai valavala tiko ko koya e na gusu takelo,

¹³ sa sauriva e na matana, sa vosa tiko e na yavana, sa vakavuvuli e nai qaqalo ni ligana,

¹⁴ sa tiko e lomana na ka cala, sa vakanananu ca tikoga, sa kaburaka na veileti;

¹⁵ o koya ena yaco vakidacala kina vua na ka ca; ena musuki vakidacala ko koya, ka sega ni vakabulai.

¹⁶ Sa ono na ka sa cata ko Jiova, io, e vitu sa ka vakasisila ki na yalona:

¹⁷ na mata viavialevu, na yame daulasu, kei na liga sa vakadave-dra sa sega ni cala,

¹⁸ na yalo e veinanuyaka na ka ca, na yavai koya sa kusarawa ni ciciva na ca,

¹⁹ na dautukutuku vakailasu sa dauvosataka na ka lasu, kei koya sa kaburaka na veileti vei ira era veiwekani.

Nai Vakasala me Kakua na Veibutakoci

²⁰ Na luvequ, mo vakabauta nai vakaro i tamamu, ka kakua ni biuta na vunau i tinamu.

²¹ Vauca tikoga ki lomamu, bukia ki domomu.

²² Ni ko sa lako voli, ena tuberi iko; ni ko sa moce koto, ena maroroi iko; ia ni ko sa yadra cake, ena veivosaki kei iko.

²³ Ni sa cina nai vakaro, ka rarama talega na vunau, ka sa kena sala ni bula nai vakavuvuli ni vunau,

²⁴ me maroroi iko mai na yalewa ca, kei na nona vosaveicavilaki na yalewa tani.

²⁵ Kakua ni domona e lomamu na nona matavinaka, me kakua talega ni rawai iko ko koya e na dakudaku-ni-matana;

²⁶ e na vuku ni yalewa dautagane sa kena walega na tagane e dua bauga na tiki ni madrai: ia na yalewa dautagane sa segata me ca na bula talei.

²⁷ Me mokota li e dua na tagane na bukawaqa ki lomaserena, ka sega ni kama kina na nona i sulu?

²⁸ Me dua li e butuka na qilaiso sa waqa tu ka na sega ni qesa na yavana?

²⁹ Sa vakakina ko koya sa mocera na watina na kai nona; ena sega sara ni donu ko koya sa tarai koya.

³⁰ Sa sega e dua e cati koya na butako kevaka sa butako me mamau kina ni sa viakana.

³¹ Ia kevaka sa kune, ena sauma vakavitu; ena solia na ka kecega e nona vale.

³² Ia ko koya sa ia na veibutakoci sa yali na nona vuku; ko koya sa kitaka sa vakarusa na yalona.

³³ Ena mavoa kina ka na rogo ca ko koya, ia na kenai rogorogo ca ena sega ni bokoci rawa.

³⁴ Ni sa kena vu ni nona cudru dina na tagane na vuvu, ia ena sega ni vosota e na siga ni veisausaumi.

³⁵ Ena sega ni ciqoma e dua na ka me saumi lesu vua, ka sega ni taura nai solisoli ni veivaqumi, ka veitalia na kena levu.