Vosavakaibalebale 5 - Ai Vola Tabu (Vakadewa Makawa Vakavoutaki 2021)

Ai Vakasala me Kakua na Veibutakoci kei nai Tovo Ca

¹ Na luvequ, mo vakarorogo ki na noqu vuku; vakalakala daligamu ki na noqu yalomatua,

² mo vakabauta kina na lomavuku, ia me tu ga e na tebenigusumu na vosa ni vuku.

³ Ni sa titiri na deni oni mai na tebenigusu ni yalewa duatani, ka sa dravia vinaka sara na gusuna mai na waiwai;

⁴ ia sa gaga na kenai cavacava me vaka na duva gaga, ka sa gata me vaka nai seleiwau batirua.

⁵ Sa lako sobu ki na mate na yavana; sa yacova nai bulubulu na nona i lakolako.

⁶ De ko vakasamataka na sala ni bula, ni sa veilakoyaki na nona i valavala, ka dredre mo kila.

⁷ Dou rogoci au mada, ragone, ka kakua ni lako tani mai na vosa ni gusuqu.

⁸ Mo muria ga na sala tani mo drau veiyawaki kaya, mo kakua ni torova na katuba ni nona vale;

⁹ de ko solia vei ira na tani na kemui rogorogo vinaka, kei na nomu veiyabaki vei ira sa sega ni loloma;

¹⁰ de mamau ko ira na tani e na nomu i yau, ka tiko e na vale ni kai tani na ka ko oca kina;

¹¹ ia ko qai vutugu mai muri, ni sa laukana oti na lewemu kei na yagomu,

¹² ka kaya, “Ulei, ni'u a cata na veivakatavulici, ka beca na vunau na lomaqu!

¹³ Ka sa sega talega ni vakarogoca na domodra era vakavulici au, ia vei ira era vunauci au ka'u a bese ni vakalakala daligaqu!

¹⁴ Sa vo vakalailai me'u cakava na ka ca kecega e na kedra maliwa nai vavakoso era sa soqoni tu.”

¹⁵ Mo gunu wai mai na nomu keli-wai, kei na wai drodro mai na nomu mata-ni-wai.

¹⁶ Me sa dui dave voli yani na nomu i vurevure, kei na veiuciwai e na saqata ni koro?

¹⁷ Me nomu duaduaga, ka sega ni nomudou vata kei ira na kai tani.

¹⁸ Me kalougata na nomu i vurevure, ia mo marautaki koya sa watimu ni ko sa cauravou,

¹⁹ me sa vaka na dia rairai totoka ko koya, kei na me yalewa sa matavinaka. Mo mamau ga e na sucuna e na veigauna kecega; mo marau tikoga e na nona loloma.

²⁰ Na luvequ, a cava ko via marautaka kina na yalewa tani, mo mokota kina na lomaserena na tani?

²¹ Ni sa tu e na mata i Jiova nai valavala ni tamata, ka sa daunanuma kecega na nona i lakolako.

²² Ena lauti koya na tamata ca na nona caka cala, ia e nai vau ni nona i valavala ca ena vesu kina ko koya.

²³ Ena mate ga ko koya ka sega ni vakavulici, ia e na vuku ni nona lialia levu ena lako sese ga.