Vosavakaibalebale 4 - Ai Vola Tabu (Vakadewa Makawa Vakavoutaki 2021)

Nai Vakavuvuli Vakaitubutubu Dauveisusu

¹ Dou rogoca, na luvequ, na nona i vakavuvuli na tamamudou, ia dou vakarorogo mo dou kila kina na vuku;

² ni'u sa solia vei kemudou nai vakavuvuli vinaka; dou kakua ni biuta na noqu vunau.

³ Ni'u a luvena bau ko tamaqu, au a nona gone ni toko ka sa vakamenemenei au ko tinaqu,

⁴ sa vakavulici au ko koya ka kaya vei au, “Me taura matua na noqu vosa na lomamu; mo muria na noqu i vakaro, ka bula.

⁵ Mo rawata mada na vuku; mo rawata talega na yalomatua; kakua ni guilecava; mo kakua talega ni lako tani mai na vosa ni gusuqu.

⁶ Kakua ni biuti koya, ka na maroroi iko ko koya; mo lomani koya, ka na taqomaki iko ko koya.

⁷ Nai vakatekivu ni vuku oqo: Mo rawata mada na vuku, ia e na ka kece ko sa rawata, mo rawata vata kei na yalomatua.

⁸ Mo vakabibitaki koya vakalevu, ena vueti iko ki cake ko koya; ena vakavuna na nomu dokai kevaka ko sa tauri koya matua.

⁹ Ena vakaisalataki iko e nai ukuuku talei; ena solia vei iko nai sala vakaiukuuku.”

Veivakavulici me Muri Tikoga na Sala e Dodonu

¹⁰ Mo rogoca na luvequ, ka vakabauta na noqu vosa, ena qai vuqa na yabaki ni nomu bula.

¹¹ Au a vakavulica vei iko na sala ni vuku; au sa tuberi iko e na sala dodonu.

¹² Ni ko sa lako tu, e na sega ni vakaleqaleqai na yavamu; ia ni ko sa cici tu ko na sega ni tarabe.

¹³ Taura matua nai vakavuvuli; kakua ni laiva; mo vakabauti koya, ni sa nomu vu ni bula ko koya.

¹⁴ Mo kakua ni lakova na nodra sala nai valavala ca, kakua talega ni muria na nodra i lakolako na tamata ca.

¹⁵ Mo biuta ga; kakua ni torova; gole tani mai kina, ka lako tani yani.

¹⁶ Ni ra sa sega ni moce kevaka era a sega ni cakava na ka ca; a ra sa sega ni moce rawa, kevaka era sega ni ia mada na veivakacacani.

¹⁷ Ni ra sa kania na madrai ni ca ka gunuva na waini ni valavala kaukauwa.

¹⁸ Ia na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.

¹⁹ Ia na nodra sala nai valavala ca sa vaka na butobuto; era sa sega ni kila na ka era sa tarabe kina.

²⁰ Na luvequ, mo vakarorogo ki na noqu vosa; mo vakatu daligamu ki na ka ka'u sa tukuna.

²¹ Me ra kakua ni yali e matamu; mo tugana ga ki na vu ni yalomu.

²² Sa vu ni bula vei ira era sa kunea, ka sa ka-ni-bula ki na yagodra taucoko.

²³ Mo vakatawa vakavinaka sara na yalomu, ni sa taka mai kina nai vurevure ni bula.

²⁴ Biuta tani vei iko na gusu takelo, ia na tebenigusu vosaveve mo vakayawataka vei iko.

²⁵ Me rai vakadodonu yani na matamu, kei na dakudaku-ni-matamu me qara donu ga ki liu.

²⁶ Mo lewa deivaki nai lakolako ni yavamu, ia na nomu sala kecega ena vakadodonutaki.

²⁷ Kakua ni ko gole tani ki nai matau se ki nai mawi; tarova na yavamu mai na ca.