Vosavakaibalebale 30 - Ai Vola Tabu (Vakadewa Makawa Vakavoutaki 2021)

Na Veika e Tukuna ko Akuri

¹ Na vosa i Akuri, na luve i Jake, na parofisai: Sa vosataka ko koya vei Icieli, io vei rau ko Icieli kei Ukali.

² E dina ni'u sa lialia ka ra yalomatua na tamata kecega; ka sa sega vei au na vuku vakatamata.

³ Au a sega ni vulica na vuku, ka'u sa lecavi koya talega na Yalosavasava.

⁴ Ko cei sa cabe cake ki lomalagi, se lako sobu mai? Ko cei sa kumuna na cagi ki ligana? Ko cei sa vauca na wai e nai sulu? Ko cei sa lesia kecega nai yalayala kei vuravura? Ko cei na yacana? Ko cei talega na yaca i koya na luvena, kevaka ko sa kila?

⁵ A nona vosa kecega na Kalou sa savasava; nai sasabai ko koya vei ira kecega era vakararavi vua.

⁶ Mo kakua ni vakaikuritaka na nona vosa, de vunauci iko ko koya, ka ko sa kune kina mo tamata lasulasu.

Ai Kuri ni Vosa Vakaibalebale

⁷ E rua na ka ka'u sa kerea vei kemuni; mo ni kakua ni bureitaka vei au ni'u sa bula tiko:

⁸ Mo ni kauta tani vakayawa vei au na ka lasu kei na vosa lasu; mo ni kakua ni soli au me'u dravudravua se me'u vutuniyau; ni vakani au e na kakana sa rauti au,

⁹ de'u mamau, ka lasutaki kemuni, ka kaya, “Ko cei ko Jiova?” Se'u dravudravua, ka butako, ka cavuta wale na yaca ni noqu Kalou.

¹⁰ Kakua ni beitaka na tamata e na ca vua na nona turaga, de vatonaki iko ko koya, ka ko sa vakacalai kina.

¹¹ Sa dua na tabatamata sa vatonaka na tamadra, ka sega ni vosavakalougatataka na tinadra.

¹² Sa dua na tabatamata sa nanumi ira ni ra savasava, ia sa sega ni savata tani na nodra dukadukali.

¹³ Sa dua na tabatamata—a ka vakaidina na nodra mata viavialevu, ka sa cecere na dakudaku-ni-matadra!

¹⁴ Sa dua na tabatamata sa vaka nai seleiwau na batidra, ka vaka nai sele na bati ni galegaledra, me ra kani ira laivi kina na yalomalumalumu mai dela i vuravura, kei ira na dravudravua mai vei ira na tamata.

¹⁵ Sa rua na luvena yalewa na aluka, a rau dau kerekere: “Solia mai, solia mai.” E tolu na ka sa sega ni mamau rawa; io, e va sa sega ni kaya, “Sa rauta”:

¹⁶ nai bulubulu; kei na kete yava, na qele sa sega ni mamau e na wai, kei na bukawaqa sa sega ni kaya, “Sa rauta.”

¹⁷ Na yaloka ni mata sa vakalialiai tamana ka sa beca me talairawarawa vei tinana ena tokia tani na reveni ni uciwai ka kania na vulituri.

¹⁸ E tolu na ka e veivakurabuitaki vei au; io, e va ka'u sa sega ni kila:

¹⁹ na kenai vukavuka ni ikeli mai lomalagi, na kenai dolodolo ni gata e na dela ni vatu, na we ni waqa e loma ni wasawasa, kei nai valavala ni tagane vua na goneyalewa.

²⁰ Sa vakaoqo na nona i valavala na yalewa dautagane: sa kana ka qusia na gusuna, ka kaya, “Au sa sega ni kitaka na ka ca.”

²¹ E tolu na ka sa yavavala kina ko vuravura; io, e va sa sega ni vosota rawa:

²² na tamata wale ni sa buli me turaga, kei na tamata lialia ni sa mamau e na kakana;

²³ na yalewa vakasisila ni sa vakawati, kei na vada sa veisosomitaki vua na nona marama.

²⁴ E va na ka e vuravura sa lalai, ka sa vuku vakalevu sara:

²⁵ a kadi na yavusa sa sega ni kaukauwa, ia era vakarautaka na kedra e na vula i katakata;

²⁶ a koni na yavusa sa sega so ni kaukauwa, ia sa cakava na nodra vale e na qara vatu;

²⁷ sa sega na nodra tui na vodre, ia era sa lako kece yani vakamataivalu;

²⁸ a moko sa qasi voli e rawa ni vesu e na liga, ia sa kune e na nodra vale na tui.

²⁹ E tolu na ka sa totoka na nodra i lakolako, io, e va sa lako vakatotoka voli:

³⁰ na laione, o koya sa kaukauwa vei ira kecega na manumanu ka sa sega ni dauvuki tani vua e dua;

³¹ na ose ni valu; kei na me tagane, kei na tui, sa sega ni yaga me vorati.

³² Kevaka ko sa caka vakalialia ni ko sa vakalevulevui iko, se ko sa nanuma na ka ca, mo tabonaka na gusumu e na ligamu:

³³ Ni sa rawa na bata ni sa vakayavalati na wai-ni-sucu, a sa tubu na dra ni sa laukini na ucu, a sa tubu na veileti ni sa levu na cudru.