Vosavakaibalebale 28 - Ai Vola Tabu (Vakadewa Makawa Vakavoutaki 2021)

¹ Era dro ko ira na tamata ca ni sa sega e dua sa vakasava, ia ko ira na yalododonu era sa qaqa me vaka na laione.

² Ni sa caka cala na vanua sa le vuqa kina na kena turaga; ia e na vuku ni tamata vuku ka daukila-ka ena vakadeitaki kina vakadede.

³ Na tamata dravudravua sa vakasaurarataki ira na dravudravua, sa vaka na uca tau bi sa oti kina na kakana.

⁴ Ko ira sa biuta na vunau era vakacaucautaka na tamata ca, ia ko ira era vakabauta na vunau era veivunauci kei ira.

⁵ Ko ira na tamata ca era sa sega ni kila nai valavala dodonu, ia ko ira era qaravi Jiova era sa kila rawa na ka kecega.

⁶ Sa vinaka na dravudravua sa muria na nona yalododonu, ka ca ko koya sai valavala vakaveve, io kevaka sa vutuniyau.

⁷ O koya sa vakabauta na vunau sa gone vuku, ia ko koya sa tiko vata kei ira na daukana sa vakamaduataki tamana.

⁸ O koya sa kuria na nona i yau ni sa soli lavo me vakaisausaumi vakatawadodonu, ena kumuna me nona na tamata sa dau lomani ira na dravudravua.

⁹ O koya sa vaqara tani na daligana me kakua ni rogoca na vunau, ena ka vakasisila na nona masumasu.

¹⁰ O koya sa vakasesea na yalododonu me lako sese e na sala ca, ena lutu ko koya ki na nona i keli, ia ko ira na yalododonu era na taukena na vinaka.

¹¹ A tamata vutuniyau sa nanumi koya me vuku, ia na dravudravua sa lomavuku ena vakatarogi koya.

¹² Ni ra reki na yalododonu, sa levu na kena marau, ia ni ra sa vakalevulevui na tamata ca, ena qai qarai na tamata.

¹³ O koya sa ubia na nona i valavala ca ena sega ni tamata yaco, ia ko koya sa vakatusa ka biuta ena lomani.

¹⁴ Sa kalougata na tamata sa rere tikoga, ia ko koya sa vakaukauwataka na yalona ena yacovi koya na ca.

¹⁵ A turaga ca sa lewai ira na tamata dravudravua sa vaka na laione sa tagi, kei na bea daukata.

¹⁶ A turaga sa sega ni vuku sa dauvakasaurara vakalevu talega; ia ko koya sa cata na kocokoco ena vakabalavutaka na nona bula.

¹⁷ A tamata sa ia na veiraravui ena dro ki nai keli; me kakua e dua na tamata e vakabula.

¹⁸ O koya sa lako vakadodonu ena bula, ia ko koya sai valavala vakaveve ena bale vakasauri.

¹⁹ O koya sa dau cakava na nona were ena levu na kena, ia ko koya sa muri ira na tamata wale ena levu na nona dravudravua.

²⁰ A tamata lomadina ena vakalougatataki vakalevu, ia ko koya sa kusarawa ni vutuniyau ena sega ni donu.

²¹ Sa sega ni vinaka na cakacaka ni veitotaki— ia sa rawa vua na tamata me caka cala e na vuku ni tiki ni madrai.

²² Na tamata mamaqi sa dau kusarawa me vutuniyau, ka sega ni kila ni na yaco vua na dravudravua.

²³ O koya sa vunauca na tamata ena lomani e muri, ka na cati ko koya sa vosaveicavilaki.

²⁴ O koya sa butakoca na ka nei tamana se tinana, ka kaya, “Sa sega ni dua na cala”, sai koya oqo nai tokani ni dauveivakarusai.

²⁵ O koya sa yalolevu sa dau vakavuna na veileti, ia ko koya sa vakararavi vei Jiova ena vakamamautaki.

²⁶ O koya sa vakararavi ki na lomana sa lialia, ia ko koya sai valavala vakavuku, ena vakabulai.

²⁷ O koya sa dausoli-ka vua na dravudravua ena sega ni viakana, ia ko koya sa tabonaka na matana ena vosacataki vakalevu.

²⁸ Ni ra sa vakalevulevui na tamata ca, era sa qai vunitaki ira vakai ira na tamata; ia ni ra sa rusa, era qai lewe vuqa mai na yalododonu.