Vosavakaibalebale 25 - Ai Vola Tabu (Vakadewa Makawa Vakavoutaki 2021)

Eso Tale na Vosa ni Vuku nei Solomoni

¹ Oqo talega na vosa vakaibalebale i Solomoni, ka vola ko iratou na tamata nei Esekaia na tui Juta.

² Sa rogo na Kalou ni sa vunia na ka, ia sa rogo ko ira na tui ni ra sa vakataroga matua na ka.

³ A kena cecere na lomalagi, kei na kena titobu na vuravura, kei na kena sega ni kilai rawa na lomadra na tui.

⁴ Kauta tani na kena butubutu mai na siliva, ena qai dua na kena bilo na dauriri siliva;

⁵ kauta tani na tamata ca mai na mata ni tui, ena qai vakataudeitaki e na ka dodonu na nona i tikotiko.

⁶ Kakua ni ko dokai iko e matana na tui, ia mo kakua ni la'ki tu e na nodra tikina na tamata turaga;

⁷ ni sa vinaka me ra kaya vei iko, “Mo lako cake mai ki ke”, ka ca mo vakatalai sobu e na mata i koya na tui. Na veika sa raica na matamu

⁸ mo kakua ni kusarawa ni la'ki veiletitaka e na veilewai; de ko lecava na ka mo cakava e na kenai cavacava, ni sa vakamaduataki iko na kai nomu?

⁹ Drau veivosakitaka vakadodonu na nomu leqa kei koya ga na kai nomu, ia mo kakua ni vakavotuya na ka vuni vua e dua tale;

¹⁰ de vakamaduataki iko ko koya sa rogoca, ka sega ni takali rawa na kemui rogo ca.

¹¹ A ka sa vosataki taudonu sa vaka na moli koula e na kato siliva.

¹² Sa vaka na sau koula kei nai ukuuku sa koula dina ko koya sa vunauca vakavuku na daliga rogo.

¹³ Me vaka na liliwa ni uca-vulavula e na gauna ni tatamusuki, sa vakakina ko koya nai talaki yalodina vei ira sa talai koya; ni sa dau vakaceguya na yalodra na nona turaga.

¹⁴ O koya sa dokai koya e na nona i solisoli lasu sa vaka na o kei na cagi ka sega na kena uca.

¹⁵ Na yalomalua sa rawa kina na turaga, ia na yame malumalumu sa musuka na sui.

¹⁶ Ke o sa kunea na oni, kania ga me rauti iko, de ko mamau sivia kina, ka luaraka.

¹⁷ Tarova na yavamu mai na vale ni kai nomu, de sa vakasosataki ko koya, ka cati iko.

¹⁸ A tamata sa tukuna vakailasu na kai nona sai tukituki, kei nai seleiwau, kei na gasau gagata.

¹⁹ A vakararavi vua na daulawaki e na siga ni rarawa sa vaka na bati sa ramusu, kei na yavana e dua sa mavule.

²⁰ Me vaka e dua sa kauta tani nai sulu e na siga ni liliwa, kei na livi wai wiwi ki na lase, sa vakakina ko koya sa ia na sere vua sa bibi na lomana.

²¹ Kevaka sa viakana na nomu meca, mo vakania e na madrai; kevaka sa viagunu, mo solia vua na wai ni gunu;

²² ni ko na binia kina na qilaiso sa waqa tu ki na uluna, ia ena sauma vei iko ko Jiova.

²³ Na cagi ni vualiku sa kauta mai na uca, kei na kakase vuni na mata cudrucudru.

²⁴ Sa vinaka na tiko e na tutu ni dela ni vale ka ca na tiko kaya na yalewa dauveileti e na vale levu.

²⁵ Me vaka na wai liliwa vua sa viagunu, sa vakakina nai tukutuku vinaka mai na vanua yawa.

²⁶ A tamata yalododonu sa cuva vua na tamata ca sa vaka na mata-ni-wai vuvu, kei nai vurevure ni wai ca.

²⁷ Sa sega ni vinaka mo kania vakalevu na oni, ka sa sega ni vinaka me ra viavia rogo na tamata.

²⁸ A tamata sa sega ni lewa rawa na yalona sa vaka na koro sa kabasu, ka sega ni vakabai.