Vosavakaibalebale 23 - Ai Vola Tabu (Vakadewa Makawa Vakavoutaki 2021)

¹ Ni drau sa tiko mo kana vata kei na turaga, mo nanuma matua na ka sa tu e matamu,

² ka kauta nai sele ki na nomu i tilotilo, kevaka ko sa tamata daugarogaro.

³ Kakua ni ko garova na nona kakana vinaka, ni sa kakana ni veivakaisini.

⁴ Mo kakua ni vakaceguocataki iko mo vutuniyau; mo kua ni vakararavi ki na nomu vuku.

⁵ A cava beka ko sa wanonova kina na ka sa sega? Ni sa cakava vakaidina na tabana nai yau, ka vuka tani me vaka na ikeli vaka ki lomalagi.

⁶ Kakua ni ko kania na nona madrai sa mata buroburogo; kakua talega ni ko garova na nona kakana vinaka;

⁷ ia me vaka na vakanananu ni lomana, sa vakakina ko koya. Sa kaya vei iko, “Mo kana ka gunu!” ia sa sega ni lomana dina vei iko.

⁸ A tiki ni kakana ko sa kania ko na luaraka tale, ka vakayalia na nomu vosa vinaka.

⁹ Mo kakua ni vosa e daligana na lialia, ni na beca na nomu i vakavuvuli vuku.

¹⁰ Mo kakua ni kisira tani nai yalayala makawa ni vanua; ia mo kakua ni curuma na nodra veiwere na luveniyali,

¹¹ ni sa wekadra ko Koya sa Kaukauwa; sai koya ena veilewai kei iko ka na totaki ira.

¹² Mo vagolea na lomamu ki nai vakavuvuli kei na daligamu ki na vosa ni vuku.

¹³ Mo kakua ni tarova na kuita mai vua na gone; ni kevaka ko warolaki koya e na kau, ena sega ni mate kina.

¹⁴ Kevaka ko warolaki koya e na kau, ko na vakabula kina na yalona mai Eli.

¹⁵ Na luvequ, kevaka ena vuku na lomamu, ena reki dina na yaloqu.

¹⁶ Io ena reki na yaloqu ni sa vosataka na ka dodonu na gusumu.

¹⁷ Me kakua ni vuvutaki ira nai valavala ca na lomamu, ia mo rerevaki Jiova tiko e na siga taucoko ka bogi.

¹⁸ Ni sa dua dina kina na kenai sau, ia na ka ko sa nuitaka ena sega ni muduki tani.

¹⁹ Mo vakarorogo, na luvequ, mo vuku, ka tubera na lomamu e na sala.

²⁰ Mo kakua ni tiko kei ira era daugunu waini, kei ira era daukocova na lewe ni manumanu;

²¹ ni rau na vakadravudravuataki na daumateni kei na daukana, ia na tamata sa daumoce ena vakaisulu e nai sulu sa kakadresudresu.

²² Mo vakarorogo vua drau sa veitamani dina kaya, kakua talega ni ko beci tinamu ni sa qase mai.

²³ Mo volia na dina, ka kakua ni volitaka; na vuku talega, kei nai vakavuvuli, kei na yalomatua.

²⁴ Ena reki vakalevu na tamana na yalododonu; ko koya erau veitamani dina kei na gone vuku ena levu na nona marautaki koya.

²⁵ Raica me rau na reki ko tamamu kei tinamu; raica me marau ko koya ka vakasucumi iko.

²⁶ Na luvequ, mo solia na lomamu kivei au, ia me vakabauta ga na noqu sala na matamu.

²⁷ Ni sai keli titobu na yalewa dautagane; ka sai keli qiqo na yalewa i valavala ca.

²⁸ Sa wawa vakavuni koto talega ko koya me vaka na daubutako, ka sa vakalewevuqataki ira na tamata dautalaidredre.

²⁹ Ko cei sa vakaulei? Ko cei sa rarawa? Ko cei sa veileti? Ko cei sa dauvosabalavu? Ko cei sa mavoa wale? Ko cei sa damudamu na matana?

³⁰ Ko ira era gunu waini tiko vakadede, ko ira era la'ki qara na waini sa veiwaki vata.

³¹ Kakua ni ko qoroya na waini ni sa damudamu, ni sa roka vinaka mai e na bilo, ka vinaka na kena gunuvi.

³² Sa oti, sa kata me vaka na gata levu, ka sa kata me vaka na gata dauveikata.

³³ A matamu ena kunei ira na yalewa tani, ia na lomamu ena cavuta na ka vakatani.

³⁴ Io ko na vaka ga e dua sa koto e loma ni wasawasa, se dua sa davo tu e na dela ni vana.

³⁵ Ko na kaya, “Era a vacuki au, ia ka'u sa sega ni mavoa kina; era sa mokuti au, ka'u a sega ga ni vakila. Ka'u na yadra li ninaica? Ka'u na qara tale e dua na gunu.”