Vosavakaibalebale 14 - Ai Vola Tabu (Vakadewa Makawa Vakavoutaki 2021)

¹ O ira na yalewa vuku era sa dui tara cake na nona vale, ia ko koya na lialia sa basuka sobu ga e na ligana.

² O koya sa muria tiko na nona yalododonu sa rerevaki Jiova, ia ko koya sa veve na nona i valavala sa beci koya.

³ Sa tiko e na gusuna na lialia nai waro ni viavialevu, ia na tebenigusudra na vuku ena maroroi ira.

⁴ Ni sa sega kina na bulumakau, sa savasava na lomanibai, ia sa levu na vuata e na kaukauwa ni bulumakau.

⁵ A dautukutuku lomadina ena sega ni lasu, ia ena cavuta na ka lasu ga na dautukutuku vakailasu.

⁶ A tamata be sa gu me vuku, ka sega ni kunea, ia na vuku sa rawarawa ga vua sa yalomatua.

⁷ Mo lako tani mai vua na tamata lialia, ni ko sa sega ni kunea vua na tebenigusu vuku.

⁸ Sa nona vuku na yalomatua me kila rawa na nona sala, ia na nodra lialia na yalolialia nai lawaki.

⁹ Ko ira na lialia era dredrevaka nai valavala ca, ia sa tu vei ira na yalododonu na loloma.

¹⁰ A yalo ni tamata sa kila na nona rarawa, ia ni sa marau ko koya, sa sega ni kauwai kina na tani.

¹¹ A nodra vale na tamata ca ena vukici laivi, ia na nodra valelaca na yalododonu ena vinaka tikoga.

¹² Sa dua na sala sa rairai dodonu vua na tamata, ia na kenai tinitini na sala ga ni mate.

¹³ Ni sa ia tiko na dredre sa rarawa na loma ni tamata, ia nai tinitini ni marau na lomabibi.

¹⁴ O koya sa suka tani tale na lomana ena vakamamautaki e na nona i valavala, ia ena vu mai vei koya na tamata vinaka na nona vakacegui.

¹⁵ O koya sa yalowai sa vakabauta na vosa kecega, ia na tamata yalomatua sa daulewa vakavinaka na nona i lakolako.

¹⁶ O koya sa vuku sa rere, ka sa lako tani mai na ca, ia na lialia sa cudru, ka sa via qaqa.

¹⁷ O koya sa daucudru vakatotolo sa na cakacaka vakalialia, kei na tamata sa daulawaki ca sa na cati.

¹⁸ O koya sa sega ni vuku sa taukena na ka sesewa, ia ko ira na yalomatua era na vakaisalataki e na vuku.

¹⁹ Sa cuva na tamata ca vei ira na tamata vinaka, kei ira nai valavala ca era cuva e na mata ni katuba ni yalododonu.

²⁰ Sa cati koya na dravudravua ko ira na kai nona, ia era veiwekani kei na vutuniyau ko ira na lewe vuqa.

²¹ Sa cala ko koya sa beca na kai nona, ia sa kalougata ko koya sa yalololoma vei ira na dravudravua.

²² Era sega li ni cala ko ira era tuvatuva-ka ki na veika ca? Ia na loloma ga kei na ka dina ena nodra era tuvatuva-ka ki na veika vinaka.

²³ Sa vakabetena na cakacaka kecega, ia e na vosa ni tebenigusu sa yaco ga kina na dravudravua.

²⁴ A nodra i sala na vuku na nodra i yau, ia na nodra lialia na lialia sa ka lialia ga.

²⁵ Sa ia na veivakabulai ko koya na dautukutuku dina, ia na dauveivakaisini sa cavuta na ka lasulasu ga.

²⁶ Sa tu vata kei na rerevaki Jiova na vakararavi matua, ia sa na dua na nodra i drodro ko ira na luvena.

²⁷ A rerevaki Jiova nai vurevure ni bula, me rawa kina na lako tani mai nai cori ni mate.

²⁸ Ni ra lewe vuqa na tamata, sa rogo kina na tui, ia ni ra lewe lailai mai na tamata, sa rusa kina na turaga.

²⁹ O koya sa berabera ni cudru sa vuku sara, ia ko koya sa yalo vakariri sa vakarewataka na lialia.

³⁰ Ni sa vakabulai na yalo, sa bula talega kina na yago, ia sai vakavuca ga ni sui na vuvu.

³¹ O koya sa vakasaurarataka na dravudravua sa beci Koya ka Buli koya, ia ko koya sa dokai Koya, sa yalololoma vua na dravudravua.

³² Sa vakasavi tani na tamata ca e na nona ca, ia ni sa mate ko koya na yalododonu sa nuidei tiko.

³³ Sa tiko dei na vuku e na loma i koya na yalomatua, ia na ka e tu e lomadra na lialia sa dautukuni.

³⁴ Sa vueta cake na matanitu nai valavala dodonu, ia nai valavala ca sa rogo ca kina na lewe ni veivanua.

³⁵ Sa yalovinaka na tui vua na tamata vuku, ia sa cudru vua sa ia na veivakamaduataki.