Vakatekivu 28 - Ai Vola Tabu (Vakadewa Makawa Vakavoutaki 2021)

¹ A sa kacivi Jekope ko Aisake ka sa vosavakalougatataka, ka vakarota, ka kaya vua, “Mo kakua ni vakawati kei na dua na goneyalewa ni Kenani.

² Mo cavu tu, mo lako ki Petani-erama, ki na vale i Pecueli, na tama i tinamu; ka vakawati kei na dua mai kea, mai vei ira na luvena yalewa ko Lepani, na gane i tinamu.

³ Ia me vakalougatataki iko na Kalou Kaukauwa ka qisi iko mo vakaivakawa, ka vakalewevuqataki iko, mo tubu me tamata lewe vuqa sara;

⁴ ka vakayacora vei iko na veivakalougatataki i Eparaama, io, vei iko, kei ira talega na nomu kawa; mo taukena na vanua ko sa tiko vulagi kina, ka solia vei Eparaama na Kalou.”

⁵ A sa vakatalai Jekope yani ko Aisake; a sa lako ki Petani-erama, kivei Lepani na luve i Pecueli na kai Siria, na gane i Repeka, na tina i Jekope kei Iso.

Taura na Luvei Isimeli me Watina ko Iso

⁶ Ia sa kunea ko Iso ni sa vosavakalougatataki Jekope ko Aisake, a sa talai koya ki Petani-erama, ka me kauta mai kina e dua na watina, ia ni sa vosavakalougatataka, sa vakarota, ka vaka, “Mo kakua ni vakawati kei na dua na goneyalewa ni Kenani,”

⁷ ka sa vakarorogo kina ko Jekope vei tamana kei tinana, ka sa lako ki Petani-erama.

⁸ Ia ni sa kunea ko Iso ni sa sega ni vinakata na goneyalewa ni Kenani ko Aisake na tamana,

⁹ sa qai lako ko Iso kivei Isimeli, a sa vakaikuritaka na watina sa tiko vua, ni sa tauri Meelaci, na gane i Nepeioci, me watina, ko koya na luve i Isimeli, na luve i Eparaama.

Na Tadra nei Jekope mai Peceli

¹⁰ A sa lako tani mai Peri-sepa ko Jekope, ka lako vaka ki Karana.

¹¹ A sa donuya e dua na yasana, a sa moce kina, ni sa dromu na mata-ni-siga. A sa taura e dua na vatu e na yasana ko ya, ka tauca me nona kali, a sa koto sobu e na yasana ko ya.

¹² A sa tadra, ka raica, e dua nai kabakaba sa tu e vuravura, a sa yacovi lomalagi na muana; ka raica, sa kaba cake ka kevu sobu tiko kina ko ira na agilosi ni Kalou.

¹³ Ka raica, sa tu mai muana ko Jiova, a sa kaya, “Koi au ko Jiova na Kalou i Eparaama na tamamu, kei na Kalou i Aisake; a vanua ko sa koto kina ka'u na solia vei iko, kei ira na nomu kawa;

¹⁴ ia na nomu kawa ena vaka na kuvu ni qele; ia ko na tete yani vaka ki na ra, ka vaka ki na tokalau, ka vaka ki na vualiku, ka vaka ki na ceva; ia ena kalougata e na vukumu kei na nomu kawa na veimataqali kecega e vuravura.

¹⁵ Ka raica, ka'u na tiko vata kei iko, ka vakabulai iko e na nomu i lakolako kecega, au na vakalesui iko talega ki na vanua oqo; ni'u na sega ni biuti iko, ka me'u cakava mada vei iko na ka ka'u a vosa kina vei iko.”

¹⁶ A sa yadra mai na nona moce ko Jekope, ka sa kaya, “Sa tiko vakaidina ko Jiova e na vanua oqo—ka'u a sega tu ni kila!”

¹⁷ A sa tarai koya na rere, ka sa kaya, “Sa vakariseyate dina na vanua oqo! Sa sega ni ka tani, a vale ga ni Kalou, kei na matamata-ni-koro kei lomalagi.”

¹⁸ A sa sou e na mataka ko Jekope, ka sa taura na vatu ka tauca oti me nona kali, ka sa vakaduria me duru, ka sa livia na waiwai ki delana.

¹⁹ A sa vakatoka na yaca ni tikina ko ya ko Peceli; ia na yaca ni koro ko ya eliu ko Lusa.

²⁰ A sa qai bubului ko Jekope, ka kaya, “Kevaka sa na tiko vata kei au na Kalou, ka vakabulai au e na sala oqo ka'u sa lako kina, ka solia vei au na kakana me'u kania, kei nai sulu me'u vakaisulu kina,

²¹ ka'u sa lesu vakavinaka tale kina ki na vale i tamaqu, ena qai noqu Kalou ko Jiova,

²² kei na vatu oqo, ka'u sa vakaduria me duru, e sa na vale ni Kalou; ia na ka kecega ko ni sa solia vei au, au na solia vakaidina na kenai katini vei kemuni.”