Vakatekivu 25 - Ai Vola Tabu (Vakadewa Makawa Vakavoutaki 2021)

Na Kawa i Eparaama mai vei Ketura

¹ A sa la'ki vakawati tale ko Eparaama, ia na yaca ni yalewa ko Ketura.

² A sa luvedrau ko Simirani, kei Jokisani, kei Mitani, kei Mitiani, kei Isipaki, kei Sua.

³ Ia na luve i Jokisani ko Sipa, kei Titana. Ia na luve i Titana, era tagane, ko Asuri, kei Letusi, kei Leumi.

⁴ Ia na luve i Mitiani era tagane, ko Ifa, kei Iferi, kei Enoke, kei Apaita, kei Elitea. Ko ira kece oqo na luve i Ketura.

⁵ A sa solia ko Eparaama na nona ka kecega vei Aisake.

⁶ Ia vei ira na luvedratou na watina lalai, sa solia eso na ka ni loloma ko Eparaama, ni sa bula tiko ka talai ira tani mai vei Aisake na luvena, vaka ki na tokalau, ki na vanua vaka tokalau.

Na Mate kei na Bulu nei Eparaama

⁷ Ia na yabaki ni bula i Eparaama, ka bula kina ko koya, sa dua na drau ka vitusagavulu ka lima na yabaki.

⁸ Sa qai ciba ko Eparaama, ka mate yani, ni sa qase vinaka mai, ia sa tamata qase, ka yabaki vuqa sara; a sa toki yani vei ira na kai nona.

⁹ Ia koi rau na luvena ko Aisake kei Isimeli, erau a buluta e na qara-vatu mai Makipila, e nona tiki ni vanua ko Efironi na luve i Soari na Itaiti, sa donui Mamire;

¹⁰ na tiki ni vanua ka volia ko Eparaama mai vei ira na Itaiti. Erau sa bulu kina ko Eparaama kei Sera na watina.

¹¹ Ia ni sa mate ko Eparaama, sa vakalougatataki Aisake na luvena na Kalou. A sa tiko ko Aisake mai nai keli-wai ko Leai-roi.

Na Kawa nei Isimeli

¹² Ia oqo na kawa i Isimeli, na luvedrau ko Eparaama kei Eka na kai Ijipita, na vada i Sera.

¹³ Ia na yacadra na luve i Isimeli era tagane, na yacadra me vaka na nodra veimataqali: na ulumatua i Isimeli, ko Nepeioci, kei Kitari, kei Atipieli, kei Mipisami,

¹⁴ kei Misima, kei Tuma, kei Masa,

¹⁵ ko Etari, kei Tima, ko Jeturi, ko Nefisi, kei Ketema.

¹⁶ Ko ira oqo na luve i Isimeli, kei na yacadra me vaka na nodra veikoro, kei na nodra i tikotiko; e le tinikarua na turaga me vaka na nodra veivanua.

¹⁷ Ia na yabaki ni bula i Isimeli, e dua na drau ka tolusagavulu ka vitu na yabaki; a sa ciba ko koya, ka mate yani, ka sa toki yani vei ira na kai nona.

¹⁸ A ra sa taukena na vanua mai Avila ka kauta ki Suri, ko ya sa donui Ijipita, e na sala vaka ki Asiria; ka sa tiko ko koya me donui ira na wekana kecega.

Na Sucu nei Iso kei Jekope

¹⁹ Ia oqo na kawa i Aisake, na luve i Eparaama; sa sucu na luve i Eparaama ko Aisake,

²⁰ ia sa vasagavulu na yabaki i Aisake, ni sa vakawati kei Repeka, na luve i Pecueli na kai Siria mai Petani-erama, na gane i Lepani na kai Siria.

²¹ A sa vakamasuti Jiova ko Aisake e na vuku ni watina, ni sa yava; a sa rogoci koya ko Jiova, a sa kunekune ko Repeka na watina.

²² A rau sa veivala na gone e ketena; a sa kaya ko koya, “Kevaka sa dodonu me vakaoqo, a cava na vuna ka'u bula kina?” A sa mani vakatarogi Jiova kina.

²³ A sa kaya vua ko Jiova, “E rua na matanitu sa tiko e ketemu, kei rau na mata tamata ko na vakasucuma oqo erau na tawase; ena kaukauwa cake e dua ka malumalumu na kenai karua, kei koya e qase cake ena qaravi koya ka gone.”

²⁴ Ia ni sa yaco na siga me vakasucu kina, raica, sa tiko na drua e ketena.

²⁵ A sa sucu mai nai matai ka sa damudamu taucoko, sa vaka e dua nai sulu vutivutia; a ra sa vakayacani koya ko Iso.

²⁶ Ni oti ko ya, sa qai sucu mai na tacina, ka sa taura tu na bukubuku ni yavai Iso na ligana; a sa vakayacani ko Jekope. A sa onosagavulu na yabaki i Aisake ni rau sa sucu.

Volitaka ko Iso na Nona Dodonu Vakaulumatua

²⁷ A rau sa tubu na gone; a sa yaco me kena dau ni tobo manumanu e yavai va ko Iso, a tamata daulasa mai veikau; ia ko Jekope na tamata dautiko malua, ka sa tiko e na valelaca.

²⁸ A sa lomani Iso ko Aisake, ka ni sa daukania na manumanu sa toboka, ia ko Repeka sa lomani Jekope.

Volitaka ko Iso na Nona i Tutu Vakaulumatua

²⁹ E na dua na gauna, ni vakasasaqa kakana damudamu tiko ko Jekope, a sa lako mai veikau ko Iso, ka sa viakana.

³⁰ A sa kaya vei Jekope ko Iso, “Mo vakani au mada e na kakana damudamu ko ya, ni'u sa viakana!” (O koya oqo sa vakatokai kina me yacana ko Itomi.)

³¹ A sa kaya ko Jekope, “Mo volitaka mada e liu vei au na nomu i tutu vakaulumatua.”

³² A sa kaya ko Iso, “Raica, ka'u sa vakarau mate; ka cava na kena yaga vei au na noqu i tutu vakaulumatua?”

³³ A sa kaya vua ko Jekope, “Mo bubului mada vei au e liu.” A sa bubului kina vua, ka sa volitaka na nona i tutu vakaulumatua vei Jekope.

³⁴ A sa solia vei Iso ko Jekope na madrai kei na kakana damudamu, ka sa kana ka gunu, ka cavu tu, ka lako yani. Ia sa beca ko Iso na nona i tutu vakaulumatua.