Vakatekivu 14 - Ai Vola Tabu (Vakadewa Makawa Vakavoutaki 2021)

Sa Vakabulai Loti ko Eparama

¹ A sa yaco e na gauna i Amirafeli na tui Saina, ko Arioki na tui Elasari, ko Kitoleoma na tui Ilama, kei Titali na tui ni veivanua eso;

² eratou a veivaluti ko iratou oqo kei Pira na tui Sotoma, kei Pirisa na tui Komora, kei Sinapa na tui Atima, kei Semeperi na tui Sepoimi, kei tui Pela, (ko ya ko Soa).

³ Eratou sa soqoni vata ko iratou kecega oqo mai na buca mai Sitimi, ko ya na Wasa Tuituina.

⁴ E tinikarua na yabaki a ratou qaravi Kitoleoma tiko, ia e na kenai katinikatolu ni yabaki eratou a bese.

⁵ Ia e na kenai katinikava ni yabaki sa lako mai ko Kitoleoma kei iratou na tui eratou tiko kaya, a ratou sa mokuti ira na luve i Refei mai Aseteroci Karineimi, kei ira na luve i Susi mai Ame, kei ira na luve i Emimi mai Save-kiriaceimi,

⁶ kei ira na luve i Ori mai na nodra Ulunivanua ko Sira, ka yacovi Eli-perani, ka voleka ki na vanua lala.

⁷ A ra sa lesu, ka lako mai ki Eni-misipata, (ko ya ko Ketesa,) ka samuta na nodra vanua kecega na Amalekaiti, kei na Amoraiti, era tiko mai Asesoni-tamari.

⁸ A sa lako yani ko tui Sotoma, kei tui Komora, kei tui Atima, kei tui Sepoimi, kei tui Pela, (ko ya ko Soa); a ra sa tuvai valu vei ira e na buca mai Sitimi;

⁹ io vei Kitoleoma na tui Ilama, kei Titali na tui ni veivanua eso, kei Amirafeli na tui Saina, kei Erioki na tui Elasari; e le va na tui e na dua nai taba, ka le lima na tui e na dua nai taba.

¹⁰ A sa vuqa nai keli qele dregadregata e na buca mai Sitimi; a rau a dro na tui Sotoma kei Komora, a rau a bale mai kina, ia ko ira na kena vo, era a dro ki na ulunivanua.

¹¹ A ra tokia nai yau kecega ni Sotoma kei Komora, kei na kedra kakana kecega, ka lako yani;

¹² a ra sa tauri Loti, na luve ni tuakai Eparama, ko koya ka tiko mai Sotoma, kei na nona i yau, ka ra sa lako tani.

¹³ Ia e dua vei ira sa bula, sa lako mai ka tukuna vei Eparama na Iperiu; sa tiko ko koya mai na kau eso nei Mamire na Amoraiti, a taci Esikoli, kei na taci Aneri; a ratou sa tovata kei Eparama ko iratou oqo.

¹⁴ Ia ni sa rogoca ko Eparama sa kau vakabobula na luve ni tuakana, sa vakaiyaragitaki ira na nona tamata sa vakavulici, ko ira era sa sucu e nona vale, e le tolu na drau ka tinikawalu, ka vakasavi ira ki Tani.

¹⁵ A sa wasei ira na nona tamata me sikiti ira e na bogi, a sa mokuti ira, ka vakasavi ira ki Opa, ko ya ki nai mawi kei Tamasiko.

¹⁶ A sa kauta tale mai nai yau kecega; kei Loti talega na luve ni tuakana, kei na nona i yau, kei ira talega na yalewa, kei ira na tamata.

Sa Vosavakalougatataki Eparama ko Melikiseteki

¹⁷ Ia ko tui Sotoma sa la'ki tavaki koya ni sa lesu mai ni sa mokuti Kitoleoma, kei iratou na turaga eratou a tiko kaya, mai na buca mai Seve, (ko ya na Buca nei koya na Tui).

¹⁸ A sa kauta yani na madrai kei na waini ko Melikiseteki na tui Selemi; ia ko koya na bete ni Kalou Cecere Sara.

¹⁹ A sa vosavakalougatataki koya, ka kaya, “Sa kalougata ko Eparama mai vua na Kalou Cecere Sara, ko koya sa bulia na lomalagi kei na vuravura;

²⁰ me vakavinavinakataki talega na Kalou Cecere Sara, ko koya sa soli ira na nomu meca ki na ligamu!” A sa solia vua ko Eparama nai katini ni ka kecega.

²¹ A sa qai kaya vei Eparama ko tui Sotoma, “Mo soli ira mada mai vei au na tamata, ia mo kauta ga nai toki me nomu.”

²² Ia sa kaya vei tui Sotoma ko Eparama, “Au sa dulaka oti na ligaqu vei Jiova, na Kalou Cecere Sara, ko koya sai taukei kei lomalagi kei vuravura,

²³ me'u kakua ni kauta e dua na vulovulo se dua na wa ni vava, se dua na ka sa nomu, de ko mani kaya, ‘Au sa vakavutuniyautaki Eparama.’

²⁴ Au na sega ni taura e dua na ka, ia e vakavo ga na ka era sa kania na cauravou kei na nodra i votavota na tamata keitou a lako vata—ko Aneri, ko Esikoli, kei Mamire. Me ratou kauta ga na nodratou i votavota.”