Vakatakila 4 - Ai Vola Tabu (Vakadewa Makawa Vakavoutaki 2021)

Na Sokalou mai Lomalagi

¹ Sa oti oqo ka'u sa qai rai tale, ka raica, sa dola e dua na katuba mai lomalagi! Ia na vosa taumada ka'u a rogoca sa vaka sa vosa vei au na davui, ka kaya, “Lako cake mai ki ke, au na vakatakila vei iko na ka ena yaco e na gauna mai muri.”

² Sa qai curumi au vakasauri na Yalo Tabu, ka raica, sa basika nai tikotiko-vakaturaga mai lomalagi, ka sa dua e tiko kina!

³ Ia ko koya sa tiko kina, sa rairai me vaka na vatu jasipa kei na satiusa, ka sa dua na drodrolagi sa vakavolivolita nai tikotiko-vakaturaga, sa rairai me vaka na emeralita.

⁴ A sa ruasagavulu-ka-va nai tikotiko sa vakavolivolita nai tikotiko-vakaturaga; ia ka'u sa raica e lewe ruasagavulu-ka-va na qase sa tiko e nai tikotiko, era sa vakaisulu e nai sulu vulavula, ka sa vakaisala na uludra e nai sala koula.

⁵ A sa lako mai nai tikotiko-vakaturaga na livaliva kei na kurukuru kei na vosa; a sa vitu na cina ni buka sa caudre tiko e na mata ni tikotiko-vakaturaga, o ira oqo na yalo ni Kalou eratou lewe vitu.

⁶ A sa tu e na mata ni tikotiko-vakaturaga na wasa iloilo e vaka na karisitala. A sa tiko e va na ka bula e loma ni tikotiko-vakaturaga, ka vakavolivolita, a sa vakamatana kecega na yagodra na matadra kei na dakudra:

⁷ ia sa vaka na laione nai matai ni ka bula, a sa vaka na luve ni bulumakau nai karua, a sa mata vakatamata nai katolu, a sa vaka na ikeli vakatabana nai kava.

⁸ O iratou oqo na ka bula eratou sa lewe va sa tauyaono na tabadratou; a sa robota na lomadratou na matadra. Ia eratou sa sega ni bau cegu e na siga se na bogi, era kaya tikoga, “E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula talega e muri.”

⁹ Ia ni ratou sa vakarokoroko ko iratou na ka bula ko ya vei koya sa tiko e nai tikotiko-vakaturaga, o koya sa bula tawa mudu, ka ratou sa dokai koya, ka vakavinavinaka vua,

¹⁰ sa qai cuva sobu ko ira na qase e lewe ruasagavulu-ka-va e na mata i koya sa tiko e nai tikotiko-vakaturaga, ka vakarokoroko vei koya sa bula ga ka tawa mudu, ka biuta na nodra i sala e na mata ni tikotiko-vakaturaga, ka kaya,

¹¹ “Kemuni na neitou Turaga kei na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa, ni sai kemuni ka bulia na ka kecega, era sa buli ga ka tudei talega e na nomuni lewa.”