Vakatakila 22 - Ai Vola Tabu (Vakadewa Makawa Vakavoutaki 2021)

Na Uciwai ni Bula

¹ Sa qai vakatakila mai vei au ko koya na uciwai ni bula, sa makare sese sara me vaka na karisitala na kena wai, sa drodro mai nai tikotiko-vakaturaga ni Kalou kei na Lami.

² E na loma ni kena sala, kei na batina ruarua talega, sa tei kina na kau ni bula, a sa vuataka na vuana e na veivula e tinikarua ka sa duidui na vuana. Ia na drau-ni-kau oqo sa medra wai ni bula na lewe ni veivanua.

³ Era na sega tale ni cudruvi kina, ia ena tu ga kina nai tikotiko-vakaturaga ni Kalou kei na Lami, ka na qaravi koya ko ira na nona tamata dauveiqaravi.

⁴ Era na raica na matana, ka na volai e na yadredra na yacana.

⁵ Ka na sega kina na bogi; ena sega talega ni yaga vei ira na cina, se na rarama ni siga; ni sa vakararamataki ira na Turaga na Kalou; ia era na vakaturaga tiko ka sega ni mudu.

Na Lesu Tale Mai nei Jisu

⁶ A sa kaya vei au ko koya, “A vosa oqo sa mana ka dina. Ia na Turaga, na nodra Kalou na yalo ni parofita, sa tala na nona agilosi me vakatakila vei ira na nona tamata dauveiqaravi na ka sa voleka ni caka.”

⁷ “Ka raica, sa voleka na noqu lako yani! Sa kalougata ko koya sa taura matua na vosa ni parofisai e nai vola oqo.”

⁸ Ia koi au ko Joni au a raica ka rogoca na veika oqo. Ia ni'u a rogoca, ka raica, au a cuva sobu ki na yavana na agilosi sa vakatakila mai vei au na veika oqo, me'u vakarokoroko.

⁹ Ia sa qai kaya vei au ko koya, “Mo kakua sara ni cakava oqori! Au sai tokani dauveiqaravi vata ga kei iko, vata kei ira na wekamu na parofita, kei ira era sa taura na vosa ni vola oqo. Vakarokorokotaka na Kalou!”

¹⁰ A sa kaya vei au ko koya, “Kakua ni dregata na vosa ni parofisai ni vola oqo, ni sa voleka na kena gauna.

¹¹ O koya sa tawa dodonu me tawa dodonu tikoga, kei koya sa dukadukali me dukadukali tikoga, kei koya sa dodonu me caka dodonu tikoga, kei koya sa yalosavasava me yalosavasava tikoga.”

¹² “Ka raica, au sa lako kusarawa mai; a sa tu ga vei au na ka, me'u solia vei ira na tamata yadua me vaka na nona i valavala.

¹³ Oi au na Alifa kei na Omeka, nai matai kei na kenai tinitini, nai vakatekivu kei nai vakataotioti.”

¹⁴ Sa kalougata na tamata era sa savata na nodra i sulu, me ra kania vakaitaukei kina na kau ni bula, ka me ra curu kina e na matamata-ni-koro ki loma ni koro.

¹⁵ Sa tu e taudaku ko ira na koli, kei ira era sa daukitaka na ka vakatevoro, kei ira na dauveidauci, kei ira na daulaba, kei ira era sa daumasu ki na veimatakau, kei ira kece era sa vinakata na lasu ka kitaka tiko.

¹⁶ “Oi au, ko Jisu, ka'u sa tala na noqu agilosi me vakatakila na veika oqo vei kemudou e na veisoqosoqo lewe ni lotu. Oi au na kena vu kei na kawa nei Tevita, kei na kalokalo serau ni mataka lailai.”

¹⁷ A sa kaya na Yalo Tabu, kei koya talega na watina-yalewa, “Lako mai.” Me kaya talega ko koya sa rogoca, “Lako mai.” Ia me lako mai ko koya sa viagunu. O koya sa vinakata, me mai gunuva na wai ni bula sa soli wale.

Na Kena i Tinitini

¹⁸ Au sa vakatakila vei ira na tamata kecega era sa rogoca na vosa ni parofisai ni vola oqo, Kevaka e dua na tamata ena vakaikuritaka na veika oqo, ena vakaikuritaka vei koya na Kalou na mate ca sa volai tu e nai vola oqo;

¹⁹ ia kevaka sa dua na tamata sa kauta tani eso na vosa mai nai vola ni parofisai oqo, ena kauta tani na Kalou na nona i votavota mai na kau ni bula, mai na koro savasava, ka mai na veika talega sa volai tu e nai vola oqo.

²⁰ Sa kaya ko koya sa vakatakila na veika oqo, “E dina taucoko ni sa voleka sara na noqu lako yani.” Emeni. Ni lako mai, Turaga Jisu!

²¹ Me nomudou kecega na loloma ni noda Turaga ko Jisu Karisito. Emeni.