Vakatakila 20 - Ai Vola Tabu (Vakadewa Makawa Vakavoutaki 2021)

Na Dua na Udolu na Yabaki

¹ Ia ka'u a raica e dua na agilosi sa lako sobu mai lomalagi, sa taura e na ligana nai dola kei bulubulu sa sega ni vakabotona ka dua na sinucodo levu.

² A sa laki taura na gata levu, a gata makawa, o koya oqo na Tevoro, kei Setani, a sa vesuki koya me oti mada e dua na udolu na yabaki,

³ a sa biuti koya ki bulubulu sa sega ni vakabotona, a sa sogolati koya e loma, a sa dregata nai sogo vei koya, me kakua ni temaki ira tale na veivanua ko koya, ka me oti mada na yabaki e dua na udolu. Ia ni sa oti oqo, ena qai sereki vakalailai tale.

⁴ Ia ka'u a raica eso nai tikotiko-vakaturaga, ka ra tiko kina eso, a sa soli vei ira me ia na veilewai. Au a raica na yalodra talega e tamusuki na uludra ni ra sa vakatusai Jisu, e na vuku talega ni vosa ni Kalou, o ira era sa sega ni vakarokoroko vua na manumanu, se vua na nona matakau, a sa sega talega ni volai nai vakatakilakila e na yadredra, se na ligadra. A ra sa bula ka lewa vata kei Karisito ka dua na udolu na yabaki.

⁵ (Ia na kena vo ni mate era sa sega ni bula tale ka me oti mada na yabaki e dua na udolu.) Oqo nai matai ni bula tale mai na mate.

⁶ Sa kalougata ka yalosavasava ko koya sa vakaturi cake e nai matai ni bula tale mai na mate. Ena sega ni kaukauwa vei ira nai karua ni mate, ia era na bete ni Kalou kei Karisito, ka ra na lewa vata kaya ka dua na udolu na yabaki.

Nai Tinitini kei Setani

⁷ Ia ni na sa oti e dua na udolu na yabaki, ena qai sereki tale ko Setani mai na vale-ni-veivesu sa tiko kina,

⁸ ena qai lako tani yani ko koya me temaki ira na veivanua era sa tiko e na yasa i vuravura e va, ko Koki kei Mekoki, me vakasoqoni ira vata me ra vala; a kedrai wiliwili sa vaka na mata ni nuku ni matasawa.

⁹ Ia era a lakova na raraba kei vuravura, ka vakavolivolita na nodra koro na tamata yalododonu, kei na koro daulomani, me buku na druadrua. A sa lutu sobu mai lomalagi na bukawaqa, ka kani ira.

¹⁰ Ia sa biu na tevoro sa temaki ira ki na drano bukawaqa sa vakasulifure, sa tiko kina na manumanu kei na parofita vakailasu, ka ratou na vakararawataki e na siga kei na bogi ka sega ni mudu.

Na Veilewai Levu

¹¹ Ia ka'u a raica e dua nai tikotiko-vakaturaga e levu ka vulavula, kei koya talega sa tiko kina. A sa dro tani mai vua ko vuravura kei lomalagi, ka sa sega na vanua e kune me rau tiko kina.

¹² Ia ka'u a raici ira era a mate, na tamata lalai kei na turaga, era sa tu e na mata ni Kalou, ka sa tevuki nai vola eso. E dua tale nai vola sa qai tevuki, ai vola ni bula. Ia na mate era sa lewai mai na ka sa volai e nai vola, me vaka na nodra i valavala.

¹³ Ia na wasawasa sa soli ira na mate era sa tiko kina, o Mate talega kei Bulu erau sa soli ira na mate era sa tiko kina, ka sa lewai ko ira na tamata yadua me vaka na nodra i valavala.

¹⁴ Ia ko Mate kei Bulu talega erau sa biu ruarua ki na drano bukawaqa. Sai koya oqo nai karua ni mate, io na drano bukawaqa.

¹⁵ Ia sa biu ki na drano bukawaqa ko koya yadua sa sega ni volai e nai vola ni bula.