Vakatakila 2 - Ai Vola Tabu (Vakadewa Makawa Vakavoutaki 2021)

Nai Tukutuku ki Efeso

¹ “Mo volavola vua na agilosi ni soqosoqo lotu mai Efeso vakaoqo: ‘Sa tukuna na veika oqo ko koya sa taura na kalokalo e vitu e na ligana i matau, o koya sa lako voli e na maliwa ni tutu-ni-cina koula e vitu.

² “ ‘Au sa kila na nomu i valavala, kei na nomu oca kei na nomu dauvosota, ni ko sa sega tale ni vosoti ira era sa ca; o sa vakatovolei ira talega era sa kaya era sai apositolo, a ra sa segai, o sa kilai ira ni ra sa daulasu ga.

³ Ia ko sa lomavinaka ga, ka vosota tiko, ka oca e na vuku ni yacaqu, ka sega ni guca.

⁴ Ia ka so ga na ka ko sa ca kina, e na vuku ni ko sa biuta na nomu loloma ka tu vei iko eliu.

⁵ Mo nanuma ga na ka ko sa lutu tani mai kina; ia mo veivutuni, ka cakava na cakacaka taumada; ia kevaka sa segai, ka'u na lako vakasauri mai vei iko, ka kauta tani na nomu i tutu-ni-cina mai na kena tikina, kevaka ko sa sega ni veivutuni.

⁶ Ia na ka ga oqo sa tu vei iko, ni ko sa cata na nodra i valavala nai tokani i Nikola, oqori ka'u sa cata talega koi au.

⁷ O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu. Vei koya sa gumatua ka'u na solia me kania na kau ni bula, ko ya sa tu e loma ni parataisi ni Kalou.’

Nai Tukutuku ki Simurina

⁸ “Mo volavola talega vua na agilosi ni soqosoqo lotu mai Simurina vakaoqo: ‘Sa tukuna na veika oqo ko koya sa liu sara ka muri sara, o koya ka mate, a sa qai bula tale:

⁹ “ ‘A sa kila na nomu cakacaka, kei na nomu dauvakararawataki, kei na nomu dravudravua (ia ko sa vutuniyau ga), kei na nodra vosa vakacaca era kaya era sa Jiu, ka ra sa segai, era sai vavakoso i Setani ga.

¹⁰ Kakua ni rerevaka e dua na ka ko na vakararawataki kina. Raica, na tevoro ena biuti kemudou eso ki na valeniveivesu, mo dou vakatovolei kina; ia dou na vakararawataki ka bogi tini. Dou gumatua mo dou yacova sara na mate, au na qai solia vei kemudou nai sala ni bula.

¹¹ O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu. O koya sa gumatua sara ena sega ni vakacacani e nai karua ni mate.’

Nai Tukutuku ki Perikamo

¹² “Mo volavola talega vua na agilosi ni soqosoqo lotu mai Perikamo vakaoqo: Sa tukuna na ka oqo ko koya sa taura nai seleiwau batirua:

¹³ “Au sa kila na nomu cakacaka, kei na yasana ko sa tiko kina, sa tiko talega kina nai tikotiko i Setani. Ia ko sa taura matua na yacaqu, ia ko sa sega ni cakitaka na noqu lotu e na siga sa vakatusai au dina kina ko Anitipasa, o koya sa vakamatei e na kemudou maliwa, a yasana sa tiko kina ko Setani.

¹⁴ Ia ka so ga na ka ko sa ca kina, e na vuku ni sa tiko vei iko ko ira era sa vakabauta nai vakavuvuli i Pelami, o koya ka vakavulici Pelaki me biuta na veivakacalai e na matadra na luve i Isireli, me ra kania na ka sa vakacabori ki na veimatakau, me ra ia talega na veidauci.

¹⁵ Sa tiko talega vei iko ko ira sa vakatavulica tiko na nodra i vakavuvuli nai tokani i Nikola, oqori na ka ka'u sa cata.

¹⁶ Mo veivutuni mada; kevaka e segai, au na lako vakatotolo sara yani vei iko, ka veivala kei ira e nai seleiwau ni gusuqu.

¹⁷ O koya sa vakadaligana, me mani rogoca sara na ka sa tukuna na Yalo Tabu vei ira na veisoqosoqo lewe ni lotu. Au na solia vei koya sa gumatua, me kania na mana vuni, au na solia talega vua na vatu vulavula, a vatu ga ko ya ena volai kina na yaca vou e sega e dua me kila, o koya ga sa taura sara.

Nai Tukutuku ki Caetaira

¹⁸ “Mo volavola talega vua na agilosi ni soqosoqo lotu mai Caetaira vakaoqo: Sa tukuna na veika oqo na Luve ni Kalou, o koya sa vaka na yameyame ni buka na matana, kei na yavana e vaka na parasa makumakualiliva:

¹⁹ “Au sa kila na nomu cakacaka—na nomu dauloloma, kei na dauveiqaravi, kei na vakadinata, kei na nomu dauvosota. Ka'u sa kila ni nomu cakacaka e muri sa uasivi cake mai na kena e liu.

²⁰ Ia sa vica ga na ka ko sa cala kina, ni ko sa vosota na yalewa ko ya ko Jesipeli, o koya sa vakatokai koya talega me parofita, me vakavulici ira ka vakatagarogaroi ira na noqu tamata me ra ia na veidauci, ka kania na ka sa vakacabori ki na veimatakau.

²¹ Ia ka'u a solia vua na gauna me veivutunitaka kina na nona dautagane, ia sa sega ni via veivutuni.

²² Raica, ka'u na biuti koya ki nai mocemoce, kei ira era sa veibutakoci vata kaya ki na rarawa levu, kevaka era sa sega ni veivutunitaka na nodra i valavala;

²³ ia ka'u na mokuti ira na luvena me ra mate. Ia ena kila kina na veisoqosoqo lewe ni lotu kecega ni'u sa dikeva na ivi kei na uto ni tamata, ia ka'u na solia talega vei kemudou yadua me vaka na nomudou i valavala.

²⁴ Ia ka'u sa kaya kivei kemudou, kei ira sa vo mai Caetaira, ko ira kece era sa sega ni vakabauta nai vakavuvuli oqo, ko ira era sa sega ni kila ‘na ka titobu kei Setani,’ me vaka na ka era sa vosataka; au na sega ni tauca vei kemudou e dua tale nai colacola bibi;

²⁵ ia na ka sa tu vei kemudou, dou taura matua ka malua ka'u na lako tale yani.

²⁶ Ia ko koya sa gumatua sara ka vakabauta na noqu cakacaka me yaco mada nai vakataotioti, au na solia vua me lewa na veimatanitu;

²⁷ ka na lewai ira ko koya e nai titoko kaukamea, ena vorolaki ira me ra matailalai me vaka na veibilo ni dautuli bilo, io, me vaka na ka ka'u sa rawata mai vei Tamaqu.

²⁸ Ia ka'u na solia talega vua na kalokalo ni mataka lailai.

²⁹ O koya sa vakadaligana, me mani rogoca sara na ka sa tukuna na Yalo Tabu kivei ira na veisoqosoqo lotu.