Vakatakila 12 - Ai Vola Tabu (Vakadewa Makawa Vakavoutaki 2021)

Na Yalewa kei na Gata Levu

¹ A sa dua na ka levu e veivakurabuitaki sa rairai mai lomalagi; sa dua na yalewa sa vakaisulu e na mata-ni-siga, a sa tu e ruku ni yavana na vula, a sa vakaisala e na kalokalo e tinikarua.

² Ia ni sa bukete sa qoqolou, ni sa taratara me vakasucu.

³ A sa dua tale na ka e veivakurabuitaki sa rairai mai lomalagi; sa dua na gata levu e damudamu, sa vitu na uluna ka tini na nona i leu, ka vitu nai sala-vakaturaga sa toka e uluna.

⁴ A sa yarataka nai katolu ni wase ni kalokalo ni lomalagi na buina, ka biuti ira ki vuravura. A sa tu e na mata ni yalewa na gata levu ni sa vakarau me vakasucu, ka me kania sara na luvena ni sa qai sucu mai.

⁵ A sa vakasucuma ko koya na gonetagane, sa lesi me lewai ira na veimatanitu kecega e nai titoko kaukamea. Ia sa kau yani na luvena vua na Kalou, ki na nona i tikotiko-vakaturaga talega.

⁶ A sa dro na yalewa ki na vanua lala, ki na dua na tikina ka vakarautaka na Kalou me nona, me ra vakani koya kina me dua na udolu ka rua na drau ka onosagavulu na siga.

Sa Vakadruka na Gata Levu ko Maikeli

⁷ A sa tubu nai valu mai lomalagi; o Maikeli kei ira na nona agilosi era sa veivala kei na gata levu. A sa ia vata nai valu na gata levu kei ira na nona agilosi,

⁸ ia era sa sega ni gumatua, ka sa sega tale ni kune e dua na nodra tikina mai lomalagi.

⁹ A sa viritaki sobu na gata levu, na gata makawa, a yacana na Tevoro kei Setani, o koya sa temaki ira kecega na kai vuravura—ka sa viritaki sobu ki vuravura, ka ra sa viritaki sobu vata kaya na nona agilosi.

¹⁰ Au sa rogoca e dua na domo levu mai lomalagi, sa kaya, “Sa qai yaco na bula kei na kaukauwa, kei na matanitu ni noda Kalou, kei na kaukauwa ni nona Karisito, ni sa biu sobu ko koya sa daubeitaki ira na wekada, o koya oqo sa beitaki ira tikoga e na mata ni Kalou e na siga kei na bogi.

¹¹ Era sa rawai koya e na vuku ni dra ni Lami, kei na vuku ni vosa era sa tusanaka; ia era sega ni taleitaka na nodra bula, era sa bole mate ga.

¹² O koya oqo mo reki kina na lomalagi, kei kemudou sa tiko kina! Ia dou na ca koi kemudou sa tiko e vuravura kei na wasawasa, ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.”

¹³ Ia ni sa kunea na gata ni sa biu ko koya ki vuravura, sa qai vakacacana na yalewa sa vakasucuma na gonetagane.

¹⁴ A sa rua na taba ni ikeli levu sa soli vua na yalewa, me vuka kina ko koya ki na vanua lala ki na nona tikina, sa laki maroroi kina e na dua na gauna, kei na gauna tale eso, kei na veimama ni gauna, mai na mata ni gata.

¹⁵ Ia na gata levu sa luaraka na wai mai na gusuna e vaka na dobui, me davemuria na yalewa, me vakacirima tani e na waluvu.

¹⁶ A sa vukei koya na yalewa ko vuravura, ni sa dalaga na gusuna ko vuravura, ka sa tiloma na dobui sa luaraka na gata levu mai na gusuna.

¹⁷ A sa cudru vua na yalewa na gata levu, ka laki ia na veivala kei ira na kena vo ni nona kawa, o ira sa vakabauta na vosa ni Kalou, ka taura tikoga nai tukutuku kei Jisu.

¹⁸ A sa tu e na veinukunuku mai matasawa na gata levu.