Vakarua 32 - Ai Vola Tabu (Vakadewa Makawa Vakavoutaki 2021)

¹ Mo ni vakatudaliga, na lomalagi, ia ka'u na vosa; ia me rogoca ko vuravura na vosa ni gusuqu.

² Me tau mada na noqu i vakavuvuli me vaka na uca, ka lutu na noqu vosa me vaka na tegu; me vaka na uca mirimiri ki na co, ka vaka na uca tau bi ki na veikau sa tubu.

³ Ni'u na vunautaka na yaca i Jiova; me vakalevulevui na noda Kalou!

⁴ “Na Uluvatu, sa ka taucoko na nona cakacaka, ka sa dodonu na nona i valavala kecega. A Kalou yalodina, ka sega ni ca, sa yalododonu ka daucaka dodonu ko koya.

⁵ Ia era sa vakacacani ira ga vakai ira, ka ra sa sega ni luvena e na vuku ni nodra ca, ka ra kawa tamata dauveivakaisini ka yalo vakatani.

⁶ O ni sa saumi Jiova vakaoqo, ne, oi kemuni na tamata lialia ka sega ni dauvakasama vinaka? Sa sega beka ni tamamuni ko koya, na kemuni taukei, ka sa buli kemuni, ka vakataudeitaki kemuni?

⁷ Ni nanuma na veisiga makawa, ka vakasamataka na veiyabaki e liu sara; taroga na tamamuni, ka na vakatakila vei kemuni ko koya; ko ira na nomuni qase, ka ra na tukuna vei kemuni.

⁸ Ena gauna sa solia kina na nodra i votavota na veimatanitu ko Koya sa Cecere Sara, ni sa wasei ira na kawa tamata ko koya, sa qai lesia na veiyalayala ni veimatanitu me vaka na kedrai wiliwili na luve ni Kalou.

⁹ Ia sai votavota ga nei Jiova ko ira na nona tamata, ko Jekope nai votavota sa taukena ko koya.

¹⁰ “Sa kunei ira ko koya e na vanua dravuisiga, e na vanua lala sa levu kina na tagi; sa kauti ira voli, sa vakavulici ira, sa maroroi ira me vaka na loa ni matana.

¹¹ Me vaka na ikeli ni sa seuta na nona sova, sa cakurobaroba e matadra na luvena; sa vakatetaba, sa kauti ira cake, sa vukataka e na tabana,

¹² sa tuberi ira vakakina ko Jiova duadua ga; ka sa sega kaya na kalou tani.

¹³ Sa vakavodoki ira me ra lako e na veiyasana cecere e vuravura, me ra kania na vuata ni veiwere; a sa vagunuvi ira e na oni mai na uluvatu, kei na waiwai mai na uluvatu qiwa;

¹⁴ na uro mai na sucu ni bulumakau, kei na wai-n-sucu ni sipi, kei na uro ni lami kei na sipi tagane; na bulumakau ni Pasani kei na me, vata kei na witi digitaki— ka ko ni sa gunuva na waini vinaka mai na dra ni vaini.

¹⁵ “Ia sa levulevu mai ko Jesuruni, ka veicaqe; ko ni sa levulevu, ka yagolevu, ka lumilumisa! A sa biuta na Kalou ka buli koya, ka beci koya na Uluvatu ni nona vakabulai.

¹⁶ Era sa vakavuna me vuvu ko koya e na vuku ni kalou tani, ka ra sa vakacudrui koya e na ka vakasisila eso.

¹⁷ Era soro ki na tevoro eso, ka sega vua na Kalou, ki na kalou eso era a sega ni kila, ki na veika vovou ka se qai tubu walega mai, na veika era sega ni rerevaka ko ira na nomuni qase.

¹⁸ O ni sa sega ni nanumi koya na Uluvatu ko ni sa tubu mai kina, ka sa guilecava na Kalou sa buli kemuni.

¹⁹ “A sa raica ko Jiova ka sa vakasisilataki ira e na vuku ni nodra vakacudrui koya na luvena tagane kei na luvena yalewa.

²⁰ A sa kaya ko koya, ‘Au na vunia vei ira na mataqu, au na raica se cava na kedrai cavacava; ni ra sa kawa dauyalovakatani ko ira oqo, na gone sa dau sega ni dina.

²¹ Era sa vakavuvutaki au e na vuku ni ka sa sega ni kalou, era sa vakacudrui au e na nodra veika vakailasu. Ia ka'u na vakavuvutaki ira e na vukudra era sega ni noqu tamata, au na vakacudrui ira e na matanitu sesewa.

²² Ni sa vakawaqaci na buka e na noqu cudru, ena kama talega me yacovi Eli e ra; sa kania na vuravura kei na vuana, ka vakamai ira na vu ni veiulunivanua.

²³ “ ‘Au na binia vei ira na ka rarawa, au na vakaotia vei ira na noqu gasau,

²⁴ era na suivotu e na dausiga, ka kani e na katakata levu, kei na veivakamatei gaga. Au na tala talega vei ira na bati ni manumanu kila, kei na weli gaga ni gata ni qele.

²⁵ Ai seleiwau e tautuba, kei na rere levu e loma, ena vakamatea na cauravou kei na goneyalewa, na gone sa sucu tiko, kei na tamata e sika na uluna.

²⁶ Au a kaya, “Au na vakasavi ira ki na tikina vuni, au na muduki ira me ra kakua ni nanumi tale vei ira na tamata,”

²⁷ ia kevaka ka'u sa sega ni rerevaka na cudru ni meca, de ra nanuma cala ko ira era vakasaurarataki ira, io de ra kaya, “Sa cecere na ligada; a sa sega ni kitaka na ka oqo ko Jiova.” ’

²⁸ “Ni ra sa matanitu sa yali vei ira na vuku; ka sa sega vei ira na yalomatua.

²⁹ Isa lei me ra vuku mada, me ra kila vinaka na ka oqo; me ra vakanananu ki na kedrai cavacava!

³⁰ Ena qai vakasava rawa e dua na udolu e le dua vei ira, ka vakasava e tini na udolu e lewe rua, kevaka sa sega ni volitaki ira ko koya na nodra Uluvatu, ka sogolati ira ga ko Jiova?

³¹ Ia na nodra uluvatu sa sega ni tautauvata kei na noda Uluvatu; oqo sa nodra lewa ko ira na noda meca.

³² Ni sa vaini ni Sotoma na nodra vaini, ka mai na vanua kei Komora; a nodra vua-ni-vaini sa vua-ni-vaini gaga, ka sa gaga na nodra soso vua-ni-vaini;

³³ a nodra waini na weli gaga ni gata levu, kei na gaga katakata ni gata ca sara.

³⁴ “ ‘Sa sega li ni bini vei au, ka dregati tu kei na noqu i yau?

³⁵ Na veicudruvaki e noqu, kei na veisausaumi, e na gauna me tidara kina na yavadra; ni sa toro mai na siga me ra ca kina, a sa kusarawa mai na ka ena yacovi ira.’

³⁶ Ena lewai ira na nona tamata ko Jiova, ka veivutuni e na vukudra na nona dauveiqaravi, ni sa raica sa oti na nodra kaukauwa, ka sa sega e dua sa sogolati se dua sa lako voli.

³⁷ Ni na kaya ko koya, ‘Evei na nodra kalou, na uluvatu era sa dauvakararavi kina,

³⁸ sa daukania na uro ni nodra i soro, ka gunuva na waini ni nodra i madrali liviraki? Me ra tucake mada ka vukei kemudou, me ra vakarurugi kemudou.

³⁹ “ ‘Dou raica mada ni sai au, io, koi au duaduaga; ka sega tale e dua sa kalou vata kei au. Au sa ia na veivakamatei, ka'u sa ia talega na veivakabulai; au sa ia na veivuetaki, ka'u sa ia na veivakamavomavo; ka sa sega e dua me kovea rawa mai na ligaqu.

⁴⁰ Ni'u sa dodoka yani na ligaqu vaka ki lomalagi, ka kaya: Oi au, ka'u sa bula ka tawa mudu,

⁴¹ kevaka ka'u sa vagatara na noqu i seleiwau e makamakalivata, a sa taura na lewa na ligaqu; au na qai vakayacora na noqu cudru vei ira na noqu meca, ka sauma vei ira era cati au.

⁴² Au na vagunuva na noqu gasau me mateni e na dra, ena kania talega na lewe ni tamata na noqu i seleiwau— e na dra ni tamata moku kei na bobula, vei ira sa liu ka ra turaga ni meca.’

⁴³ “Dou reki vata na veimatanitu, kei ira na nona tamata, ni sa cudruvaka ko koya na nodra dra na nona dauveiqaravi, ka na saumi ira na nona meca, ka vakadonuya nai bulubulu e na vuku ni nona vanua, io ko ira na nona tamata.”

⁴⁴ A sa lako mai ko Mosese, ka cavuta kecega na vosa ni sere oqo e na daligadra na tamata, ko koya, kei Josua na luve i Nuni.

⁴⁵ Ia ni sa cavuta oti na vosa kecega oqo ko Mosese vei ira kecega na Isireli,

⁴⁶ sa qai kaya vei ira, “Ni vaqara na lomamuni ki na vosa kecega ka'u sa tukuna vei kemuni e na siga oqo, mo ni vakaroti ira kina na luvemuni me ra vakabauta ka cakava, na vosa kecega ni vunau oqo.

⁴⁷ Ni sa sega ni ka wale vei kemuni, sa ka ga mo ni bula kina; ia e na ka oqo ena balavu kina na nomuni bula e na vanua, ko ni sa qalo kosova kina na Joritani mo ni taukena.”

Sa Tukuni Taumada na Mate nei Mosese

⁴⁸ A sa vosa vei Mosese ko Jiova e na siga dina ko ya, ka kaya,

⁴⁹ “Mo cabeta na ulunivanua oqo ko Aparimi, io na Ulunivanua ko Nipo, e na vanua ko Moapi, sa donui Jeriko, ka raica na vanua ko Kenani, ka'u sa solia vei ira na Isireli me ra taukena.

⁵⁰ Ia ko na mate e na ulunivanua ko sa cabeta, ia ko na toki yani kivei ira na kai nomu; me vaka sa mate ko Eroni na tuakamu mai na Ulunivanua ko Ori, a sa toki yani vei ira na kai nona,

⁵¹ ni drau a talaidredre vei au e na kedra maliwa na Isireli mai na wai ni Meripa-Ketesa, mai na vanua lala ko Sini, ni drau a sega ni vakarokorokotaki au e na kedra maliwa na Isireli.

⁵² O na raica ga na vanua, ia ko na sega ga ni lako yani kina—na vanua ka'u sa solia vei ira na Isireli.”